2 Tesalonika 1 - Vengo (Babungo)

Shɔꞌtə Pɔɔl tɨ́ məshəŋtə vɨɨ Kristo fɨ ntɨꞌ Tesalonika

¹ Lùu mə, Pɔɔl, nə Silvanɔs, baa nə Timoti, faŋ yia tɔŋ ŋwaꞌlə ŋwə̀ tɨ́ məshəŋtə vɨɨ Kristo fɨ ntɨꞌ Tesalonika, faŋ viŋ shə̀ŋtə maa yizii Nwi, tii ŋwaa-nsiŋ, nə tɨta ŋwaa-nsiŋ Yeso Kristo.

² Tɨta Nwi ghɔ tɨta Yeso Kristo tu mənɔŋ-bwaŋnə tɔ viŋ, baa nə məduꞌ-nyɔŋ.

Faŋ Pɔɔl nə bwàŋ Nwi buꞌ vɨɨ Tesalonika faŋ vəŋ nə nùŋ fwi vəŋ maa Kristo, twèꞌ shɔ

³ Vaŋ-nshwi via, bàw yia kɨ bwaŋ Nwi buꞌ viŋ ghee nshə. Ŋkə kùꞌnə maa məyɨ nɨniŋ, buꞌ laa viŋ wèꞌ maa nu ŋkɨə faŋ viŋ nùŋ fwi siŋ shɔ nə. Ŋkawnə yiŋ faŋ viŋ vənshə kaw nə yiŋwaa yiŋ, viŋ viŋ, baa lùu yiyaŋ, gə vɨsɨ vɨsɨ nɨzi.

⁴ Nshɨ-tɔ wia ŋaytə, baa bə̀ŋsə viŋ fɨ taa vəməshəŋtə və vɨɨ Nwi, buꞌ laa viŋ jìa fwi siŋ, nùŋ sheꞌ maa Kristo ghee nshə, faŋ vɨɨ shoꞌ ghuu ghiŋ, kwaŋ ŋɨꞌ maa viŋ nə.

⁵ Nu kɔ́ lùu shwenə tɨ́ viŋ laa Nwi ndɔ shoꞌtə vənu və vɨɨ, shìa maa jɨɨ yiloomə. Ŋwə ndì viŋ laa viŋ kùꞌnə maa məzɨ nu yifwàŋ Nwi, buꞌ laa viŋ bìŋ ŋɨꞌ yɔ́ nə.

Faŋ Nwi ndɔ shia nsɔꞌ tɔ vɨɨ, nyə loomə

⁶ Lùu nɨniŋ buꞌ laa ŋkə kùꞌnə tɨ́ Nwi maa məndɔ bəŋsə kɔ̀ ŋɨꞌ tɨ́ vɨɨ mbɨə faŋ vəŋ nə kwàŋ ŋɨꞌ maa viŋ nə.

⁷ Ŋwə ndɔ baa kɔ zutə tɨ́ viŋ faŋ viŋ yè ŋɨꞌ fɨ ghɔ vɨɨ ndwə nə. Ŋwə ndɔ kɔ zutə tɨ́ nsiŋ vənshə maa yighee njyə faŋ tɨta Yeso ndɔ fuu fɨ taa yizɔ ntee, kɨ jwi ghɔ nshiisə-ŋiisə Nwi faŋ wutə ki lùu maa vəŋ nə.

⁸ Ŋwə ndɔ jwi nə wisə faŋ ŋwə kɨɨ laa wuŋ-wuŋ, bə̀ŋsə bwə tɨ́ vɨɨ mbɨə faŋ vəŋ kee kɨɨ nə Nwi me, baa nə tɨ́ vɨɨ mbɨə faŋ vəŋ kee biŋ ntɔŋ Nwi buꞌ tɨta ŋwaa-nsiŋ Yeso me, kee zɔnə ŋwə me.

⁹ Nsɔꞌ ndɔ ŋii maa vɨɨ vɔ́ ŋkee yiweꞌ, vəŋ ndɔ ye ŋɨꞌ yiyaŋ dɨdɨꞌ faŋ nyə gòꞌsə yighee muꞌ. Ŋkə taa ndɔ fɨ ghɔ tɨta Kristo, fɨ maa wutə ki kəkwalə nə, faŋ ŋkə bàw shɔ̀ɔ ki.

¹⁰ Nsɔꞌ yɔ́ ndɔ jia vəŋ maa yighee njyə faŋ tɨta Yeso ndɔ baa bəŋ jwi maa mədə yikwalə yi tɨ́ vɨɨ ley vi. Vɨɨ vənshə faŋ vəŋ nə nùŋ fwi vəŋ maa ŋwə, ndɔ bəŋsə ŋwə maa shi kɔ́. Maa viŋ nə bìŋ nu ŋkɨə faŋ yia nə gì tɨ́ viŋ ntee nə.

Faŋ Pɔɔl nə shɔ̀ꞌtə Nwi tɔ vɨɨ Kristo fɨ ntɨꞌ Tesalonika

¹¹ Nɨniŋ, yia buꞌ ghɔ tɨ́ Nwi tɔ viŋ ghee nshə, laa ŋwə yɨsə viŋ kuꞌnə maa məndɔ zɨ məbwey vəlwaŋ faŋ ŋwə nə tìi viŋ shɔ nə, baa nə laa ŋwə ndɔ gaŋtə viŋ maa məmetə vənu vəjəəvə vənshə faŋ viŋ kàw maa məyɨsə, nə vəfaꞌ vənshə faŋ viŋ faꞌ nə wutə ki, buꞌ faŋ viŋ nùŋ fwi siŋ maa Kristo nə.

¹² Bàw ŋwə kɨ yɨsə nɨniŋ, laa viŋ ndɔ kɨ bəŋsə yizii tɨta ŋwaa-nsiŋ Yeso. Vɨ baa luu bəŋsə viŋ buꞌ ŋwə, buꞌ laa Nwi ghɔ tɨta Yeso Kristo kee gəŋsə siŋ.