2 Pita 2 - Vengo (Babungo)

Yigi kɔ̀ŋ vɨɨ mədeesə faŋ vəŋ sɨɨ təba

¹ Luu nə, vɨɨ faŋ vəŋ nəə toꞌ, sɨ̀ɨ təba, gisə yigi laa lùu yigisə shuu Nwi, nə lùu taa ŋwaa vɨɨ Nwi nɨzi. Ŋkə ndɔ lùu taa ŋwaa viŋ sheꞌ nɨndɨŋ, vɨɨ ndɔ jwi faŋ vəŋ toꞌ deesə təba tɨ́ vɨɨ. Vəŋ taa kɨ toꞌ taa ŋwaa viŋ fɨ yiba, deesə mədeesə bwə, faŋ ŋwə taa bɨsə mbɨꞌtə vɨɨ. Vəŋ ndɔ twey tɨta Yeso, faŋ ŋwə nə bwèysə vəŋ fɨ maa vənu vəbwəvə vəŋ. Luu nə, sheꞌ fɨkɨꞌ nee, Nwi taa kwaŋ vəŋ ŋkee taa ŋɨꞌ.

² Vɨɨ vəyaŋ ndɔ beꞌsə vəŋ maa vənu vəbwəvə vəŋ faŋ vəŋ yɨsə, nɨniŋ laa vɨɨ kɨ gisə bwə kɔ̀ŋ nu Nwi yinsəŋ.

³ Vɨɨ mədeesə bwə vɔ́ ndɔ kɨ kaw maa məzɨ shɨ. Vəŋ sɨɨ təba, bwèꞌsə viŋ, tɨ́ kaꞌ vəŋ sey fɨ fuŋ. Luu nə, shù fɨshi, Nwi faŋ ŋwə yaa kɨ sɔꞌ nsɔꞌsə vɨɨ nə, kwaŋ vəŋ taa nsɔꞌ. Yighee njyə faŋ Nwi ndɔ ndisə vəŋ, lùu nshənə.

⁴ Viŋ kɔꞌ kɨɨ laa, yighee njyə faŋ ŋkee nshiisə-ŋiisə Nwi nə yɨ̀ nu bwə, Nwi nə kee mèꞌtə vəŋ me. Nwi nə kwaŋ vəŋ taa shəŋ wi faŋ ŋwə kee yaa kɨ ndɨɨnə me. Vɨ ka vəŋ nə vəsumə, vəŋ duꞌ taa shəŋ mfiŋsə, vəŋ taa goꞌ yifi gə ziꞌ tɨ́ shi nsɔꞌ Nwi.

⁵ Gə fɨ maa vɨɨ vɨsɨ faŋ vəŋ nəə yɨ vənu vəbwəvə, Nwi nə kee mèꞌtə vəŋ me. Nwi nə yɨ̀sə laa muu fuu ndìsə vəŋ, faŋ vəŋ nəə kee zɔnə Nwi me. Nə luu sheꞌ Noa ghɔ vɨɨ vi kwatia nə, faŋ Nwi nə bwèysə vəŋ fɨ ghɔ muu mbɔ́, buꞌ laa Noa nəə naysə tɨ́ vɨɨ laa vəŋ kɨ yɨ vənu vəjəəvə.

⁶ Gə fɨ maa məshɨ mə Sodom nə Gomora, Nwi nə kwàŋ vɨɨ mbɨə faŋ vəŋ nə luu taa məshɨ mbɔ́ nə taa nsɔꞌ. Nwi nə yɨ̀sə wisə twàŋ məshɨ mbɔ́ məmbɔɔ, mbə gu vəbu. Nɨniŋ, Nwi nə kɔ̀ shwenə tɨ́ vɨɨ vənshə faŋ vəŋ kee zɔnə ŋwə me, laa vəŋ kɔꞌ kɨɨ laa Nwi ndɔ ndisə vəŋ sheꞌ nɨndɨŋ.

⁷ Nə luu maa yighee yɔ́, Nwi nə bwèysə Lɔt, faŋ nə luu wuu jəə. Fwi yi nəə ghaysə ŋwə dɨdɨꞌ buꞌ vənu vəbwəvə faŋ vɨɨ vɔ́ nəə yɨsə.

⁸ Lɔt faŋ nə luu wuu ley nə, nəə shi taa ŋwaa vɨɨ faŋ vəŋ nə yɨsə vənu vəbwəvə. Ŋwə nə ye baa zɔ̀ vənu vəbwəvə vəyaŋ faŋ vɨɨ vɔ́ nəə yɨsə nə, shi shi. Vənu vəbwəvə vɔ́ za ŋwə fɨ taa fwi ŋwə ŋkee dɨdɨꞌ, buꞌ laa nshɨ-tɔ wi nə luu wuu loomə.

⁹ Vənu vəmwavə vɔ́ də̀ tɨ́ nsiŋ laa, Nwi kɔꞌ kɨɨ nə jɨɨ faŋ kaꞌ ŋwə bwèysə vɨɨ vi fɨ ghɔ məmɔŋ nə vənu vəbwəvə, baa kɨɨ nə jɨɨ faŋ ŋwə ndɔ kwaŋ vɨɨ məyɨ vənu vəbwəvə taa ŋɨꞌ, maa shi nsɔꞌ Nwi.

¹⁰ Vɨɨ mbɨə faŋ Nwi ndɔ kwaŋ taa nsɔꞌ shɔ̀ɔ ki, lùu vɨɨ mbɨə faŋ vəŋ yɨ sheꞌ vənu vəbwəvə faŋ mbɨꞌtə vəŋ də tɨ́ vəŋ, baa nə faŋ vəŋ twey maa məzɔnə Nwi. Vɨɨ vɔ́ faŋ vəŋ toꞌ deesə nu faŋ kee lùu nu yinsəŋ nə me, vəŋ koꞌsə ŋwaa vəŋ dɨdɨꞌ, kee fee maa məgi nu bwə kɔ̀ŋ vəzwitə mbɨə faŋ mbə kìi wutə yizɔ nə me. Vəŋ toꞌ ndasə vəzwitə vɔ́.

¹¹ Ŋkee nshiisə-ŋiisə Nwi, faŋ vəŋ shɔɔ vɨɨ vɔ́ nə wutə, kee bee gi nu bwə kɔ̀ŋ vəŋ vɨsɨ Nwi me.

¹² Vɨɨ vɔ́ gisə bwə kɔ̀ŋ vənu faŋ vəŋ kee kɨ̀ɨ nə mbə me, vəŋ yɨ vənu yaa nyaasə faŋ nsə kee kìi tɔ ley maa məbɨꞌtə nu me. Nyaasə kee kɨ̀ɨ nə nu me, kaꞌ wə jia zwi. Yinsəŋ vɨɨ vɔ́ ndɔ ndi yaa nyaasə sɔ́.

¹³ Nwi ndɔ ndɔꞌ tɨ́ vəŋ nə ŋɨꞌ sheꞌ faŋ vəŋ nəə kɔ ŋɨꞌ tɨ́ vɨɨ nə. Vəŋ kəə sheꞌ maa məzɨ yiŋwaa vəŋ, yɨ nu kɔ́ ŋkee nə shɨshwi. Nshinə vəŋ luu ŋkee nu tɔ dɨɨ tɨ́ vɨɨ Nwi. Viŋ vɨ vəŋ dùꞌ mɔ́ꞌ zɨ nu, vəŋ kɨ gə yiba, vəŋ yɨ vənu vəbwəvə faŋ vəŋ kàw.

¹⁴ Vəŋ bɨꞌtə sheꞌ vənu və vəki maa mətii vəŋ ghee nshə. Kaꞌ vəŋ kee bwà fɨ maa məyɨ vənu vəbwəvə me. Vəŋ bweꞌsə vɨɨ mbɨə faŋ vəŋ kee luu vəweꞌ maa nu Nwi me, laa vəŋ yɨ vənu vəbwəvə nɨzi. Vəŋ kəə sheꞌ sey ka nə vətɔ. Kəŋ vɨɨ vɔ́ lùu taa nsɔꞌ Nwi.

¹⁵ Vəŋ mèꞌtə jɨɨ yiloomə, kɨ beꞌsə jɨɨ nshiiŋii-sɔghɔ Balaam, wee Bio, faŋ ŋwə nə kàw maa məsey ka fɨ maa nu bwə.

¹⁶ Luu nə, Nwi nə shə̀ tɨ́ ŋwə maa yighee yɔ́, yɨ̀ laa jakasə gi tɨ́ ŋwə, faŋ jakasə kee yaa kɨ gisə yaa wə nə me. Jakasə ghɔ́ nə gì tɨ́ ŋwə, buu ŋwə kee baa kɨ yɨ nu vəmfaw kɔ́ me.

¹⁷ Vɨɨ vɔ́ lùu yaa koꞌ-fɨ-nsi faŋ ŋwə kee kìi muu me. Vəŋ baa lùu yaa mbɔꞌ fɨ taa yizɔ faŋ fɨɨ yaa kɨ shɔɔ saynə, tɨ́ kaꞌ mbɔꞌ yɔ́ kee baa jwì nə yighuu me. Nwi nùŋsə shəŋ tɨ́ vɨɨ vɔ́, faŋ luu ŋkee shəŋ taa mfiŋsə.

¹⁸ Vəŋ yaa kɨ toꞌ koꞌsə ŋwaa, gisə yigi faŋ nyə kee kìi tɔ ley me. Fwisə vəŋ ndɔ maa vətɔ faŋ yiŋwaa yivəŋ kàw. Vəŋ kaw maa məzɨ shɨ, suŋtə vɨɨ mbɨə faŋ vəŋ duꞌtə vəŋ nyɨŋkə fɨ ghɔ vɨɨ bwənə, laa vəŋ bəŋ kɨ toꞌ ghuu yitoꞌ vəŋ maa jɨɨ yibwə, faŋ vəŋ nə nyɨ̀ŋkə fɨ maa jɨɨ yibwə yɔ́ sheꞌ maa kuŋtə yighee nə.

¹⁹ Vəŋ kɔꞌnə vɨɨ vɔ́ laa vəŋ ndɔ duꞌ tɔ vəŋ, luu nə, nshɨ-tɔ vəŋ faŋ vəŋ gisə yigi yɔ́ nə, lùu vəbuꞌ tɨ́ nu bwə, nu bwə kɨ bii ka vəŋ. Viŋ kɔꞌ kɨɨ laa fa tɨ̀ me fa faŋ ŋkə sɔꞌ wə, wə ghɔ́ lùu buꞌ tɨ́ fa kɔ́.

²⁰ Gə fɨ maa vɨɨ mbɨə faŋ vəŋ nə nyɨ̀ŋ vənu vəbwəvə faŋ mbə lùu mbi nə, buꞌ faŋ vəŋ nə kɨ̀ɨ nə tɨta Yeso Kristo faŋ lùu wuu məbweysə vɨɨ nə, kɨ luu laa vəŋ baa bə̀ŋ gə̀ bèꞌsə vənu vəbwəvə vɔ́, ŋìi taa vənu vəbwəvə vɔ́, mbə fi vəŋ, buu ŋkə bɨ̀ maa vəŋ shɔ̀ɔ yighee vɨsɨ faŋ vəŋ nə kee ta kɨ̀ɨ nə Yeso Kristo me.

²¹ Ŋkə nə bàw tɨ́ vəŋ laa kɨ vəŋ fɔŋ bɨ kɨ̀ɨ nə jɨɨ faŋ lùu jɨɨ yiloomə me, fɨ ghɔ vəŋ kɨ̀ɨ nə jɨɨ yɔ́, baa bəŋ kìasə ŋwaa vəŋ, mèꞌtə ntɨsə Nwi, kee baa kɨ beꞌsə ntɨsə sɔ́ faŋ vɨ nə fɨ̀ꞌtə tɨ́ vəŋ nə me.

²² Nu vɨɨ vɔ́ də̀ tɨ́ nsiŋ laa, yigisə tii yimɔ́ꞌ luu nu yinsəŋ. Nyə lùu laa, «Bu yaa kɨ tu baa bəŋ zɨ̀ sheꞌ fa kɔ́,» baa nə laa, «A kɔlə sɔ̀ ŋwaa ŋkwinyaa ŋwə ley, buu ŋwə taa ye shiatə, baa kɨ bɨ̀ŋlə taa tey yi.»