2 Pita 1 - Vengo (Babungo)

Shɔꞌtə Pita tɨ́ vɨɨ Nwi

¹ Lùu mə, Saymon Pita, faŋ mə luu wuu faꞌ Yeso Kristo, baa lùu wuu ntɔŋ wi nɨzi, faŋ mə tɔ̀ŋ ŋwaꞌlə ŋwə̀ tɨ́ vɨɨ mbɨə faŋ vəŋ nùŋ fwisə vəŋ maa Nwi. Nshɨ-tɔ wia nùŋ fwi sia maa Nwi sheꞌ nɨniŋ, baa nə maa Yeso Kristo, wuu məbweysə ŋwaa-nsiŋ, faŋ ŋwə nə kìasə nu kaŋ-nsiŋ, ŋkə loomə.

² Nwi kuꞌsə viŋ, kɔ mənɔŋ-bwaŋnə tɨ́ viŋ, viŋ kɨ gə vɨsɨ vɨsɨ, faŋ viŋ zɔ nu Nwi nə nu Yeso Kristo, faŋ lùu tɨta ŋwaa-nsiŋ nə.

Nshinə njyə faŋ nyə kùꞌnə tɨ́ vɨɨ Nwi

³ Nwi faŋ ŋwə kìi wutə kənshə, kèy nsiŋ nə vənu vənshə, faŋ mbə kùꞌnə maa məzɨ məbwey vəlwaŋ, nə maa məshi nə nshinə yijəə. Nwi nə kɔ̀ vənu vɔ́ tɨ́ nsiŋ buꞌ faŋ nsiŋ kɨ̀ɨ nə Yeso Kristo, faŋ ŋwə nə shòꞌ nsiŋ nə wutə ki, baa nə taa nshinə yijəə yi nə.

⁴ Nɨniŋ, ŋwə nə kèy nsiŋ nə vənu vəkwalə mbɨə faŋ ŋwə nə kɔ̀ꞌnə maa məkɔ tɨ́ nsiŋ, faŋ lùu ŋkee sey kwalə tɨ́ nsiŋ. Buꞌ vənu vɔ́, kaꞌ viŋ nyɨŋ fɨ ghɔ vənu vəbwəvə faŋ mbə lùu taa mbi, faŋ lùu mbɨꞌtə vɨɨ məyɨ vənu vəbwəvə. Kaꞌ viŋ bee kii jwi kìi nshinə yaa njyə Nwi.

⁵ Nɨniŋ, mə gì tɨ́ viŋ, faŋ viŋ bìŋ Yeso Kristo nə, laa viŋ kəweꞌ, shi nshinə yiŋ faŋ nyə bàw shɨ̀lə. Faŋ viŋ shi nə nshinə yijəə yɔ́ nə, viŋ kɨ toꞌ nə yitɔfə nɨzi.

⁶ Faŋ viŋ toꞌ nə yitɔfə nə, viŋ kɨ jia yiŋwaa yiŋ, baa weꞌ maa vənu vɔ́. Faŋ viŋ nuŋsə, jìa vənu vɔ́, wèꞌ shɔ nə, viŋ baa kɨ zɔnə Nwi nɨzi.

⁷ Faŋ viŋ zɔnə Nwi nɨniŋ nə, viŋ kɨ kaw vaŋ-nshwi viŋ maa yizii Yeso Kristo. Faŋ viŋ kaw vaŋ-nshwi viŋ nɨniŋ nə, viŋ kɨ kaw vɨɨ vənshə.

⁸ Viŋ kɔꞌ kɨɨ laa, viŋ kɨ luu kɨ yɨsə vənu vɔ́, gə vɨsɨ vɨsɨ, buu məkɨɨ faŋ viŋ kɨ̀ɨ nə tɨta Yeso Kristo nə, kee ndɔ luu nu dayday me. Vənu vəjəəvə ndɔ fuu fɨ maa vənu vənshə faŋ viŋ yɨsə.

⁹ Gə̀ fɨ maa vɨɨ faŋ vəŋ kee yɨ̀ vənu vɔ́ me, vəŋ yɨ yaa vɨɨ faŋ vəŋ lùu vɨɨ sɨ fɨsə, faŋ vəŋ kee ye vədɨꞌ me. Vəŋ ndenə laa Nwi nə sɔ̀ vənu vəbwəvə vəŋ faŋ vəŋ nə yɨ̀ yighee vɨsɨ.

¹⁰ Nɨniŋ, vaŋ-nshwi vaŋ, viŋ kɨ tɨŋnə weꞌ maa vənu vɔ́, laa viŋ ndɔ zɨ vənu mbɨə faŋ Nwi nə tìi viŋ shɔ nə. Viŋ kɨ luu kɨ beꞌsə vənu vɔ́, kaꞌ viŋ kee ndɔ baa gu me.

¹¹ Nɨniŋ, viŋ taa kii jɨɨ yinsəŋ maa məŋii taa yifwàŋ Yeso Kristo, faŋ luu mbweysə nyaa-nsiŋ; nsiŋ vɨ vəŋ taa gòꞌsə shɔ yighee muꞌ.

Ŋiꞌ ntɨ Pita kɔ̀ŋ nshinə yijəə yɔ́

¹² Lùu nu ŋkɨə faŋ mə naysə tɨ́ viŋ ghee nshə, mə taa kɔꞌ kɨ lɨlumə vənu vɔ́ tɨ́ viŋ, faŋ viŋ kɔlə kɨ̀ɨ nə mbə, baa wèꞌ shɔ maa vənu və yinsəŋ vɔ́ faŋ viŋ kɨ̀ɨ nə mbə nə.

¹³ Mə ye laa ŋkə bàw laa mə taa kɔꞌ kɨ lɨlumə vənu vɔ́ tɨ́ viŋ, gə kɔ tɨ́ yighee njyə faŋ mə ndɔ bəə fɨ mbi.

¹⁴ Mə kɔꞌ kɨɨ laa, goꞌ sheꞌ fɨkɨꞌ nee, mə gwəkə bə̀ə fɨ mbi, sheꞌ faŋ tɨta Yeso Kristo nə nàysə shee.

¹⁵ Mə kəə yɨ̀ nu ŋkɨə faŋ kaꞌ mə yɨ̀ maa məkɔ jɨɨ tɨ́ viŋ, tɨ́ kɨ kaꞌ viŋ kɨ lumə vənu vɔ́ ghee nshə faŋ mə taa kɔlə bəə fɨ mbi.

¹⁶ Viŋ kɔꞌ kɨɨ laa vənu mbɨə faŋ yia nə fɨ̀ꞌtə tɨ́ viŋ kɔ̀ŋ wutə Yeso Kristo, baa nə laa ŋwə ndɔ bəŋ jwì fùu ntee, kee luu sheꞌ mətiitii faŋ nə bɨ̀ꞌtə wə mənsaw nə yitɔfə yi me. Nshɨ-tɔ wia nə yè feenə wi nə yisɨ.

¹⁷ Yia nə luu shɔ maa yighee njyə faŋ Nwi nə də̀ məkwalə Yeso Kristo nə feenə wi. Yia nə zɔ̀ faŋ Nwi, faŋ ŋwə kìi wutə kənshə nə, nə gì laa, «Lùu ŋwiŋ ŋwaa nə faŋ mə kàw ŋwə. Ŋwə baw too mə dɨdɨꞌ.»

¹⁸ Nshɨ-tɔ wia nə luu shɔ fuu baŋ Nwi, yia vɨ tɨta Yeso, zɔ̀ gɨ Nwi nə tuulə ghia faŋ nyə nə siꞌ jwì fɨ yizɔ.

¹⁹ Yigisə nshiisə-ŋii sɔghɔ kɔ̀ŋ Yeso luu ŋkee yiley tɨ́ yia ndwə buꞌ nu kɔ́. Bàw viŋ kwaŋ fwi siŋ maa yigisə yɔ́ nɨzi, buꞌ laa nyə lùu yaa kiꞌ faŋ ŋwə bee taa mfiŋsə gə zìꞌ maa yighee njyə faŋ fu lee. Yighee njyə faŋ fəjwiŋ fɨ taa nshia-ndoo-mbisɨ, faŋ lùu Kristo nə, ndɔ jwi yɨ viŋ, viŋ ye vənu vənshə vəley.

²⁰ Viŋ kɔꞌ kɨɨ laa tuu yigi faŋ nshiisə-ŋii sɔghɔ nə gì, faŋ vɨ nə baa nyɔ̀ꞌ taa ŋwaꞌlə Nwi, kaꞌ vɨ kee twèlə ŋiꞌ ki sheꞌ fɨ maa yitɔfə wə mənsaw me,

²¹ buꞌ laa tuu yigi, faŋ nshiisə-ŋii sɔghɔ nə gì nə, kee lùu mbɨꞌtə wə mənsaw me. Nə luu Zwitə Ley Nwi, faŋ ŋkə nə ŋìi taa fwisə vɨɨ, yɨ̀sə vəŋ gisə yigi faŋ nyə ndɔ̀ fɨ ghɔ Nwi.