2 Jɔn 1 - Vengo (Babungo)

Faŋ Jɔn nə shɔꞌtə nshəŋtə vɨɨ Nwi

¹ Luu mə, wuu taa fɨ taa nshəŋtə vɨɨ Kristo, faŋ mə tɔ̀ŋ ŋwaꞌlə ŋwə̀ tɨ́ ghɔ, yaa, viŋ vaŋ və faŋ Nwi nə shoꞌ viŋ (nshəŋtə vɨɨ Kristo). Mə kàw viŋ yinsəŋ. Kee kaw sheꞌ mə kaw viŋ nɨnɔŋ me; vɨɨ vənshə faŋ vəŋ kɨɨ nə nu Nwi yinsəŋ, kaw viŋ nɨzi.

² Lùu nɨniŋ buꞌ nu yinsəŋ faŋ ŋkə lùu taa fwisə nsiŋ, baa gòꞌsə taa fwisə nsiŋ yighee muꞌ.

³ Tɨta Nwi ghɔ ŋwiŋ wi Yeso Kristo, kee gəŋ saŋ-nsiŋ, kɔ nsiŋ nə mənɔŋ-bwaŋnə nə məduꞌ-nyɔŋ. Mbə luu mbaŋ-nsiŋ fɨ taa yinsəŋ baa nə ŋkawnə.

Faŋ bàw nsiŋ kɨ kaw nə yiŋwaa nyaa-nsiŋ, shìinə fɨ ghɔ vɨɨ məbweꞌsə vɨɨ

⁴ Mə ŋaytə dɨdɨꞌ buꞌ faŋ mə ye laa vɨɨ vəmɔ́ꞌ fɨ taa nshəŋtə yiŋ bìŋ nu Nwi yinsəŋ, toꞌ yitoꞌ vəŋ maa jɨɨ njyə faŋ nyə lùu yiloomə, sheꞌ faŋ tɨta Nwi nə tɨ̀ nsiŋ shɔ nə.

⁵ Mə buꞌ ghɔ tɨ́ viŋ, vɨɨ fɨ taa nshəŋtə vɨɨ Nwi, laa nsiŋ kɨ kaw nə yiŋwaa nyaa-nsiŋ. Mə kee nyɔ̀ꞌ luu ntɨ yifi tɨ́ viŋ me; vɨ nə tɨ nsiŋ shɔ shù fɨ maa yighee vɨsɨ.

⁶ Nyaanə-nsiŋ ŋkawnə yɔ́ lùu laa nsiŋ nùŋsə ntɨsə Nwi sheꞌ faŋ ŋwə nə tɨ̀ nsiŋ shɔ nə. Luu ŋkee ntɨ njyə faŋ viŋ nə zɔ̀ shù fɨ yighee vɨsɨ, laa viŋ kɨ toꞌ fɨ taa ŋkawnə.

⁷ Viŋ kɔꞌ kɨɨ laa vɨɨ məbweꞌsə vɨɨ fùu taa mbi vəyaŋ, faŋ vəŋ kee bìŋ laa Yeso Kristo lùu wuu məbweysə ŋwaa-nsiŋ me, faŋ ŋwə ndɔ̀ fɨ ghɔ Nwi me, baa nə laa ŋwə kee jwi mbi gù fa fənshi yaa wə me. Kəŋ wə ghɔ́ lùu wuu məbweꞌsə vɨɨ, baa lùu wuu mbeenə Kristo.

⁸ Viŋ kɨ shiinə yiŋwaa yiŋ, laa faꞌ ŋgwə faŋ viŋ duꞌtə viŋ faꞌ nə, kee ndɔ ndi day me, baa nə laa, viŋ ndɔ fi vəndɔꞌnə viŋ sheꞌ maa shwaŋ faꞌ wiŋ.

⁹ Wə tɨ̀ me wə faŋ ŋwə dèe ki, kee tɨŋ sheꞌ maa nu ŋkɨə faŋ Kristo nə dèesə me, buu ghɔ Nwi kee baa lùu fɔ nu me. Gə fɨ maa wə ntɨə faŋ ŋwə tɨŋ sheꞌ maa nu ŋkɨə faŋ Kristo nə dèesə tɨ́ ŋwə nə, tɨta Nwi ghɔ ŋwiŋ wi lùu yɨ kəŋ wə ghɔ́.

¹⁰ Kɨ luu wə jwi yɨ viŋ, kee jwì nə nu kɔ́ me, kɨ viŋ biŋ ŋwə ŋii taa ŋii viŋ me, kee shɔ̀ꞌtə ŋwə me,

¹¹ buꞌ laa wə ntɨə faŋ ŋwə shɔꞌtə kəŋ wə ghɔ́, ŋìi fɔꞌ nu bwə wə ghɔ́ maa məyɨ nu bwə.

Faŋ Jɔn nə kɔ̀ꞌnə maa məgə ye vəŋ

¹² Vənu ghɔ mə vəyaŋ maa mənaysə tɨ́ viŋ. Luu nə, mə kee kaw nyɔ̀ꞌ sheꞌ taa ŋwaꞌlə me. Mbɨꞌtə nyaa lùu laa mə taa jwi yɨ viŋ, tɨ́ kɨ kaꞌ nsiŋ yenə, baa gì vənu nə shuu, yuu məŋaytə ŋwaa-nsiŋ luu yaŋ.

¹³ Vaŋ weenshu wə (nshəŋtə vɨɨ Kristo fɨ feenə), faŋ Nwi shòꞌ vəŋ nɨzi, shɔꞌtə viŋ.