1 Tesalonika 5 - Vengo (Babungo)

Faŋ kaꞌ wə kee kɨ̀ɨ nə shi ŋkɨə faŋ Yeso Kristo ndɔ baa jwi shɔ me

¹ Vaŋ-nshwi via, gə fɨ maa yighee njyə faŋ vənu vɔ́ ndɔ gay nə, kee bàw mə nyɔꞌ tɨ́ viŋ me.

² Nshɨ-tɔ wiŋ kɔꞌ kɨɨ ŋkee jəə laa, shi məjwi tɨta Kristo ndɔ luu yaa ndɔꞌ, faŋ ŋwə yaa kɨ jwi nɨntəŋ vətuꞌ, faŋ wə kee yikɨɨ me.

³ Vɨɨ ndɔ kɨ gisə laa, mbi dùꞌ nə mənɔŋ-bwaŋnə, nu kee baa lùu shɔ tɨ́ kaꞌ ŋkə ghɔ̀ꞌ vɨɨ me. Sheꞌ yighee yɔ́ faŋ vəŋ gisə nɨniŋ nə, nsɔꞌ Nwi gwəkə ŋìi maa vəŋ, sheꞌ yaa nu wəzwi gɔsə faŋ yighee yi gwəkə kùꞌ maa məbi. Sheꞌ nɨniŋ, jɨɨ maa mənyɨŋ kee baa lùu shɔ maa yighee yɔ́ me.

⁴ Gə fɨ maa viŋ, vaŋ-nshwi via, viŋ kee lùu taa mfiŋsə me; shi kɔ́ kee ndɔ gwəkə jɨjwi tɨ́ viŋ yaa ndɔꞌ me.

⁵ Viŋ vənshə lùu vɨɨ taa məley, baa lùu vɨɨ shi kɔ́. Nsiŋ kee lùu vɨɨ fu vətuꞌ me, kee lùu vɨɨ mfiŋsə me.

⁶ Nɨniŋ, kɨ nsiŋ kɨ bwey yaa vɨɨ vɔ́ me; nsiŋ kɨ shi nə yikɨꞌ, bwasə ŋwaa.

⁷ Vɨɨ mbɨə faŋ vəŋ bɨbwey, bwey luu vətuꞌ. Vɨɨ mbɨə faŋ vəŋ nu məluꞌ, mbə shɔɔ sɨ vəŋ, mbə shɔɔ sheꞌ vətuꞌ.

⁸ Gə fɨ maa nsiŋ, faŋ nsiŋ lùu vaŋ shi kɔ́ nə, bàw nsiŋ jia fwi saŋ-nsiŋ, mɔ̀ꞌ məbiŋ nə ŋkawnə yaa njwi yighaw faŋ nyə shiinə nsiŋ fɨ ghɔ nu bwə. Nsiŋ kɨ kɨꞌ məbwey vəlwaŋ. Məkɨꞌ məbwey ghɔ́ lùu yaa yisɔꞌ vəsogeꞌ tɨ́ nsiŋ, shìtə nsiŋ fɨ ghɔ zwitə bwə.

⁹ Viŋ yɨ nɨniŋ buꞌ laa Nwi nə kee nùŋ nsiŋ laa nsɔꞌ yi ndɔ jia nsiŋ me. Ŋwə nə tìi nsiŋ laa nsiŋ ndɔ zɨ məbwey vəlwaŋ fɨ yiba tɨta ŋwaa-nsiŋ Yeso Kristo,

¹⁰ faŋ ŋwə nə kù tɔ nsiŋ nə. Nɨniŋ, nsiŋ duꞌ nə yikɨꞌ, tɨꞌnə me bɨbwey, nsiŋ duꞌ yinyay nsiŋ vɨ vəŋ.

¹¹ Nɨniŋ, viŋ weꞌsə wə nə wə, gaŋtə wə nə wə maa mənuŋ fwi maa Nwi, kɨ yɨsə nɨniŋ, sheꞌ faŋ viŋ yɨsə nə.

Nu ŋkɨə faŋ ŋkə bàw tɨ́ vɨɨ Kristo maa məyɨsə

¹² Vaŋ-nshwi via, yia buꞌ ghɔ tɨ́ viŋ laa viŋ kɨɨ nə nu vɨɨ mbɨə faŋ vəŋ sàŋ yiŋwaa yivəŋ maa vəfaꞌ buꞌ viŋ. Vəŋ duꞌ tɔ viŋ maa yizii tɨta Yeso, tɨsə viŋ.

¹³ Bàw viŋ biŋ vəŋ, kɔ̀ feenə tɨ́ vəŋ dɨdɨꞌ, kàw vəŋ buꞌ nu faꞌ vəŋ kɔ́. Viŋ duꞌ nyɔŋ viŋ viŋ.

¹⁴ Vaŋ-nshwi via, yia tɨsə viŋ laa viŋ kɨ bɔŋsə vɨɨ faŋ vəŋ toꞌ fɨ maa jɨɨ yigɨŋkə, baa bàwsə fwisə vɨɨ mbɨə faŋ fwisə vəŋ lɔ̀ꞌ. Viŋ kɨ gaŋtə vɨɨ mbɨə faŋ vəŋ kee lùu vəweꞌ maa nu Nwi me. Viŋ kee gəŋsə vɨɨ vənshə.

¹⁵ Viŋ kɨ ye laa kɨ wə bəŋsə bwə nə bwə me. Viŋ bee kii kɨ yɨ̀sə jəə maa viŋ, viŋ viŋ, baa luu yɨ̀sə jəə maa vɨɨ vənshə.

¹⁶ Viŋ kɨ ŋaytə ghee nshə,

¹⁷ shɔꞌtə Nwi ghee nshə,

¹⁸ bwaŋ ŋwə maa vənu vənshə, buꞌ laa nu ŋkɨə faŋ Nwi kəə, lùu laa viŋ kɨ yɨsə nɨniŋ maa yizii Yeso Kristo.

¹⁹ Kɨ viŋ fəŋ Zwitə Ley Nwi me,

²⁰ kee mànə nu ŋkɨə faŋ Nwi kwàŋ shuu vɨɨ, vəŋ gisə me.

²¹ Viŋ kɨ kwaꞌtə vənu vənshə, jìa ŋkɨə faŋ ŋkə kùꞌnə.

²² Viŋ kɨ shiinə yiŋwaa yiŋ fɨ ghɔ ntɔ nu bwə tɨ̀ me ntɔ nu bwə.

Faŋ bàw nshɨ-tɔ Nwi gaŋtə viŋ maa məduꞌ ley vɨsɨ Nwi

²³ Nshɨ-tɔ Nwi faŋ ŋwə lùu Nwi mənɔŋ-bwaŋnə nə, yɨsə viŋ baw shɨlə maa vənu viŋ vənshə! Bàw ŋwə jia zwitə kiŋ nə fwi siŋ nə ŋwaa wiŋ, laa viŋ baw mètə, tuu wee-ndoꞌ kee lùu maa viŋ me, maa shi ŋkɨə faŋ tɨta ŋwaa-nsiŋ Yeso Kristo ndɔ bəŋ jwi.

²⁴ Nwi, faŋ ŋwə tìi viŋ nə, lùu wuu yinsəŋ. Ŋwə ndɔ baa yɨ nu kɔ́.

Vəndwə və ŋwaꞌlə

²⁵ Vaŋ-nshwi via, viŋ kɨ shɔꞌtə Nwi tɔ yia.

²⁶ Viŋ shɔꞌtə vaŋ-nshwi vaŋ-nsiŋ vənshə, nyɔ̀ŋ fəə vəŋ maa yizii Nwi.

²⁷ Mə lɨ̀ꞌtə Mɔꞌmbi tɔ viŋ laa viŋ tii ŋwaꞌlə ŋwə̀ tɨ́ vaŋ-nshwi vaŋ-nsiŋ vənshə.

²⁸ Tɨta ŋwaa-nsiŋ Yeso Kristo tu mənɔŋ-bwaŋnə tɔ viŋ, kèe gəŋ siŋ!