1 Tesalonika 4 - Vengo (Babungo)

Faŋ bàw viŋ kɨ toꞌ ghuu yitoꞌ kiŋ faŋ ŋkə kùꞌnə tɨ́ Nwi

¹ Vaŋ-nshwi vaŋ, yia fàynə vənu vɔ́ laa viŋ kɨ toꞌ ghuu yitoꞌ kiŋ, ŋkə kuꞌnə tɨ́ Nwi. Maa viŋ nə duꞌtə viŋ zɔ fɨ ghɔ yia, faŋ ŋkə kùꞌnə maa mətoꞌ vɨsɨ Nwi; viŋ baa luu tòꞌ nɨniŋ. Nɨniŋ, yia buꞌ ghɔ tɨ́ viŋ, tɨsə viŋ maa yizii tɨta Yeso, laa viŋ kɨ toꞌ nɨniŋ, gə̀ vɨsɨ vɨsɨ.

² Viŋ kɔꞌ kɨɨ nə ntɨsə sɔ́, faŋ yia nə kɔ̀ tɨ́ viŋ maa yizii tɨta Yeso nə.

³ Nu ŋkɨə faŋ Nwi kəə lùu laa viŋ baw, ndɔ̀ fɨ̀nə ŋwə, nyɨ̀ŋ fɨ maa nu vəki sakə.

⁴ Bàw wə tɨ̀ me wə kɨ shiinə ŋwaa wi, shi sheꞌ ghɔ zu wi, tɨ́ kaꞌ viŋ lùu vɨɨ ley vɨsɨ Nwi, gə̀ nə vɨsɨ, vɨ kɨ bəŋsə viŋ shɔ vɨsɨ Nwi.

⁵ Kɨ viŋ kɨ tii vəki sheꞌ faŋ mbasə ŋwaa wiŋ kàw me, yaa vɨɨ məmanə Nwi yaa kɨ yɨsə nə.

⁶ Baa nə laa kɨ wə yɨ nu bwə maa weenshu wi me, kee kɨ fuŋsə ŋwə maa nu me, buꞌ laa tɨta Nwi bəŋsə vənu vəbwəvə vɔ́ vənshə tɨ́ vɨɨ, kwaŋ nsɔꞌ tɔ vəŋ, sheꞌ faŋ yia nə duꞌtə yia naysə tɨ́ viŋ, baa tɨsə viŋ shɔ nə.

⁷ Nwi nə kee tìi nsiŋ laa nsiŋ kɨ yɨsə vənu vəbwəvə me. Ŋwə nə tìi nsiŋ laa nsiŋ baw shɨlə, gə̀ nə vɨsɨ.

⁸ Nɨniŋ, wə ntɨə faŋ ŋwə shìa nu kɔ́, kee shìa luu wə me, ŋwə shìa luu Nwi, ŋkee ŋwə faŋ ŋwə kwaŋ Zwitə ki, faŋ ŋkə bàw shɨlə nə, taa fwisə viŋ.

⁹ Gə fɨ maa nu məkaw yiŋwaa yiŋ, ŋkə kee lùu nu faŋ mə taa baa nyɔꞌ tɨ́ viŋ me, buꞌ laa nshɨ-tɔ Nwi deesə viŋ maa məkaw yiŋwaa yiŋ, viŋ viŋ.

¹⁰ Viŋ baa luu yɨ̀ nɨniŋ maa vaŋ-nshwi vaŋ-nsiŋ vənshə fɨ shɨ Makedonia. Vaŋ-nshwi via, yia tɨsə viŋ sheꞌ laa viŋ kɔꞌ kɨ gɨgə nə vɨsɨ taa ŋkawnə yiŋ yɔ́.

¹¹ Viŋ kɨ tə sɨ maa məduꞌ bwaŋnə, baa nə laa wə tɨ̀ me wə kɨ ndeynə nu ki, faꞌ faꞌ nə ghɔ ghi maa məkii fazɨ, sheꞌ faŋ yia nə duꞌtə yia tɨsə viŋ shɔ nə.

¹² Viŋ yɨ nɨniŋ laa ghuu yitoꞌ kiŋ baw tɨ́ vɨɨ mbɨə faŋ vəŋ kee lùu vɨɨ Nwi me, baa nə laa viŋ kee kɨ bəə fa laa vəŋ kɨ gaŋtə viŋ shɔ me.

Faŋ Pɔɔl nə zwisə fwisə vɨɨ Kristo buꞌ vaŋ-nshwi vəŋ faŋ vəŋ nə kukə̀

¹³ Vaŋ-nshwi via, yia kee kaw laa viŋ duꞌ nshi buꞌ nu vaŋ-nshwi vaŋ-nsiŋ mbɨə faŋ vəŋ kukə̀ me. Yia kəə twelə tɨ́ viŋ laa kɨ viŋ luŋ yaa vɨɨ mɔ́ꞌ faŋ vəŋ kee kɨ̀ꞌ məbwey vəlwaŋ me.

¹⁴ Kɨ luu nsiŋ biŋ laa Yeso nə ku, baa ywèy fɨ shɨ yiku, buu nsiŋ kɔꞌ kɨɨ laa Nwi ndɔ yɨsə laa vɨɨ mbɨə faŋ vəŋ nə kukə̀ nə, ndɔ gə ziꞌ shəŋ ŋkɨə faŋ Yeso lùu shɔ nɨzi.

¹⁵ Nu ŋkɨə faŋ yia naysə tɨ́ viŋ ndwə, nə twèlə nshɨ-tɔ tɨta Yeso tɨ́ yia. Viŋ zɔ! Nu kaŋ-nsiŋ, faŋ nsiŋ dùꞌ yinyay ndwə, baa duꞌ yinyay gə kɔ tɨ́ shi ŋkɨə faŋ tɨta Yeso ndɔ bəŋ jwi, kee shɔ̀ɔ nu vɨɨ mbɨə faŋ vəŋ nə kukə̀ nə me.

¹⁶ Nshɨ-tɔ tɨta Yeso ndɔ gi nəŋay, nshiiŋii taa mbuꞌ Nwi luꞌ, yisaw Nwi gi maa yighee njyə faŋ tɨta Yeso ndɔ siꞌ fɨ taa yizɔ. Vɨɨ mbɨə faŋ vəŋ nə kukə maa yizii Kristo nə, kɨ nii ywèy fɨ shɨ yiku ŋkəə,

¹⁷ buu Nwi ndi nsiŋ, faŋ nsiŋ lùu vɨɨ faŋ nsiŋ ndɔ duꞌ yinyay maa shi kɔ́, ndì nsiŋ nə mbɔꞌ, nsiŋ vɨ vəŋ koꞌ yizɔ mɔ́ꞌ, fàynə nsiŋ vɨ tɨta Yeso, dùꞌ nɨniŋ nsiŋ vɨ tɨta Yeso ghee nshə.

¹⁸ Nɨniŋ, viŋ zwisə fwi siŋ nə təgi tɔ́, viŋ viŋ.