1 Tesalonika 3 - Vengo (Babungo)

Faŋ vɨɨ Nwi fɨ ntɨꞌ Tesalonika goꞌ ghɔ vɨ Kristo, kɨ kaw yiŋwaa yivəŋ, vəŋ vəŋ

¹ Nɨniŋ, faŋ nə kɨ kaꞌ yia kee baa dùꞌ maa məbaa zɔ̀ ŋkɔŋ yiŋ nə me, yia nə bìŋ nə fwi yijəə maa mətɔŋ Timoti tɨ́ viŋ, baa luu dùꞌ shɨ Atens nɨnɔŋ.

² Nɨniŋ, yia nə tɔ̀ŋ Timoti, faŋ lùu weenshu ŋwaa-nsiŋ, baa lùu wuu faꞌ Nwi faŋ yia vɨ vəŋ fɨꞌtə ntɔŋ yijəə Nwi kɔ̀ŋ Yeso Kristo nə. Yia nə tɔ̀ŋ ŋwə nɨniŋ laa ŋwə jwi wèꞌsə fwi siŋ, gàŋtə viŋ maa mənuŋ fwi siŋ maa Yeso Kristo, twèꞌ shɔ,

³ laa kɨ tuu wə fɨ wiŋ bəŋ yiba buꞌ ŋɨꞌ njyə faŋ nyə ŋìi maa viŋ ndwə nə me, faŋ vɨ jiatə viŋ, yɨ nə viŋ nə. Viŋ baa luu kɨɨ laa lùu nu kaŋ-nsiŋ maa məye ŋɨꞌ nɨniŋ.

⁴ Maa viŋ lumə laa yia nə nàysə tɨ́ viŋ fɨ ntaŋ, faŋ nsiŋ nə luu mɔ́ꞌ nə, laa lùu nu kaŋ-nsiŋ maa məye ŋɨꞌ fɨ ghɔ vɨɨ. Maa ŋkə gay sheꞌ nɨniŋ, viŋ baa luu kɨ̀ɨ nɨniŋ.

⁵ Lùu nu ŋkɨə faŋ ŋkə nə yɨ̀sə laa kɨ kaꞌ mə kee baa jìa fwi nyaa me, tɔ̀ŋ Timoti maa məkɨɨ nə məbiŋ wiŋ, faŋ viŋ nùŋ fwi maa Kristo nə, buꞌ tɨɨ vəzwitə vəbwəvə mɔŋ viŋ, bwèꞌsə viŋ, viŋ ndi jɨɨ, buu vəfaꞌ via taa ŋwaa viŋ kɨ nii yindi.

⁶ Lùu ndwə, Timoti bə̀ŋ jwì fɨ yɨ viŋ, jwì yɨ yia, nàysə ntɔŋ yijəə tɨ́ yia, laa viŋ gòꞌsə viŋ vɨ Kristo, kawnə viŋ viŋ, ndɔ lumə yia jəə ghee nshə, baa nə laa jɨŋ məye yia zasə viŋ nɨzi, sheꞌ faŋ jɨŋ yiŋ zasə yia nɨzi.

⁷ Nɨniŋ, fwi sia zutə buꞌ viŋ, vaŋ-nshwi via, faŋ yia kɔlə ye ŋɨꞌ yiyaŋ, vɨɨ yɨnə yia nə. Fwi sia zutə buꞌ faŋ viŋ gòꞌsə maa nu Kristo nə.

⁸ Yia baa luu bwey ndwə, buꞌ laa viŋ tɨŋ weꞌ maa nu tɨta Kristo.

⁹ Sii kaꞌ yia kɔ̀ kə tɨ́ Nwi, bwàŋ ŋwə buꞌ laa viŋ nùŋ fwi siŋ maa Kristo nə, fɔnə yia kìi məŋaytə yaŋ vɨsɨ Nwi buꞌ viŋ.

¹⁰ Yia shɔꞌtə Nwi ŋkee dɨdɨꞌ vətuꞌ nə shɨshwi, laa ŋwə biŋ yia jwi yè viŋ nə sɨ, gaŋtə viŋ maa nu ŋkɨə faŋ viŋ bəə fɨ taa məbiŋ wiŋ, tɨ́ kaꞌ viŋ tɨ̀ŋnə weꞌ maa nu Nwi.

¹¹ Bàw nshɨ-tɔ Nwi, tii ŋwaa-nsiŋ, ghɔ tɨta ŋwaa-nsiŋ Yeso Kristo ŋaꞌsə jɨɨ tɨ́ yia maa məjwi yɨ viŋ.

¹² Bàw tɨta Kristo yɨsə ŋkawnə yiŋ yaŋ, viŋ kɨ kawnə yiŋwaa yiŋ, baa luu kaw vɨɨ vənshə, gə vɨsɨ vɨsɨ, ŋkə lwaŋ taa fwisə viŋ bə̀, sheꞌ faŋ yia kàw viŋ nə.

¹³ Tɨta ŋwaa-nsiŋ Yeso kɨ yɨsə nɨniŋ, kwàŋ wutə taa fwisə viŋ, laa yighee njyə faŋ ŋwə ndɔ bəŋ jwi ghɔ vɨ vɨɨ vi vənshə, faŋ vəŋ lùu vɨɨ ley vɨsɨ Nwi nə, viŋ baw shɨlə yikəꞌ Nwi, tɨta ŋwaa-nsiŋ.