1 Tesalonika 2 - Vengo (Babungo)

Faŋ Pɔɔl nə lùmə tɨ́ vɨɨ Tesalonika faŋ ŋwə nə bɨ tey kɨ fɨꞌtə nu Nwi tɨ́ vəŋ

¹ Vaŋ-nshwi via, viŋ kɔꞌ kɨɨ laa nu ŋkɨə faŋ yia nə jwì yɨ viŋ nə, kee ndì day me.

² Viŋ baa luu kɨɨ faŋ yia nə bɨ yè ŋɨꞌ ntɨꞌ Filipi, vɨɨ kɔ ŋɨꞌ tɨ́ yia dɨdɨꞌ. Luu nə, yia jia fwi buꞌ Nwi wia, jwi fɨ̀ꞌtə ntɔŋ yijəə Nwi tɨ́ viŋ, faŋ vɨ nə kɔlə nywènə yia nə.

³ Yia nə kee tɨsə viŋ nə nu faŋ ŋkə kee yikuꞌnə me, kee gì tɨ́ viŋ nə fwi yibwə me, kee mɔ̀ŋ maa məbweꞌsə viŋ me.

⁴ Yia bee kii gisə nu ŋkɨə faŋ Nwi kəə, buꞌ laa ŋwə nə mɔ̀ŋ yia laa yia kùꞌnə mu, buu kɔ̀ nu kɔ́ taa ghɔ yia, faŋ lùu ntɔŋ yijəə Nwi. Yia fɨꞌtə ntɔŋ yɔ́ nɨniŋ, kee kəə kɨ bawsə too vɨɨ me, luu sheꞌ maa məbawsə too Nwi faŋ ŋwə kɔꞌ kɨɨ nə fwi sia.

⁵ Viŋ kɔꞌ kɨɨ laa yia nə kee ta gì yigisə bəŋ tɨ́ viŋ tuu yighee muꞌ me, tɨꞌnə me gì yigi yimɔ́ꞌ maa məshitə viŋ shɔ, maa məkəə ka fɨ yiba me. Nwi kɔꞌ kɨɨ nɨniŋ nɨzi.

⁶ Yia nə kee kəə laa viŋ, tɨꞌnə me vɨɨ mɔ́ꞌ, kɨ bəŋsə yia me,

⁷ faŋ yia nə kɔlə kìi wutə buꞌ laa yia lùu vɨɨ ntɔŋ Kristo. Yia nəə bwasə yiŋwaa yia nsi, kɨꞌ viŋ faŋ nsiŋ nə luu mɔ́ꞌ nə, sheꞌ yaa nshu weembwa yaa kɨ kɨꞌ ŋwiŋ wi nə.

⁸ Buꞌ ŋkawnə yia maa viŋ, yia nə kee kaw sheꞌ laa yia fɨꞌtə ntɔŋ yijəə Nwi tɨ́ viŋ me. Yia nə bee kii kɔ̀ yiŋwaa yia tɨ́ viŋ, buꞌ faŋ yia kaw viŋ dɨdɨꞌ.

⁹ Vaŋ-nshwi via, maa viŋ lùmə faŋ yia nə fàꞌ nə wutə, fàꞌ vətuꞌ nə shɨshwi, laa kɨ tuu wə fɨ wiŋ kee kɨ ye ŋɨꞌ maa məzəsə yia me, faŋ yia nə fɨ̀ꞌtə ntɔŋ yijəə Nwi tɨ́ viŋ nə.

¹⁰ Nshɨ-tɔ wiŋ, nə Nwi, nə ye nə yisɨ faŋ nshinə yia nə luu yiley, baa lùu yiloomə taa ŋwaa viŋ, yia kee gu tuu nu maa viŋ, faŋ viŋ nùŋ fwi siŋ maa Nwi nə me.

¹¹ Viŋ kɔꞌ kɨɨ laa yia nəə yɨ nu maa wə nə muꞌ nə muꞌ fɨ wiŋ sheꞌ faŋ tɨɨ wee yaa kɨ yɨsə maa ŋwiŋ wi.

¹² Yia nəə bwasə fwi siŋ, kwàŋ wutə maa viŋ, kɨ tɨsə viŋ maa məshi nshinə njyə faŋ nyə kùꞌnə tɨ́ Nwi, faŋ ŋwə tìi viŋ taa nu yifwàŋ ki, faŋ ŋkə bàw yaa ŋwə.

Faŋ Pɔɔl nə bwàŋ Nwi tɔ vɨɨ Tesalonika

¹³ Nɨniŋ, yia bwaŋ Nwi buꞌ viŋ ghee nshə. Yighee njyə faŋ yia nə jwì nə yigisə Nwi tɨ́ viŋ nə, viŋ zɔ, nùŋ fwi siŋ shɔ, kee ndì yigisə yɔ́ yaa yigisə wə mənsaw me, ndì lùu yaa yigisə Nwi, faŋ nyə lùu nɨniŋ yinsəŋ. Nə luu nɨniŋ buꞌ laa Nwi nə faꞌ taa ŋwaa viŋ, faŋ viŋ nə nùŋ fwi siŋ maa ŋwə nə.

¹⁴ Vaŋ-nshwi via, viŋ ndi ghuu yitoꞌ vɨɨ Nwi fɨ shɨ Judia, faŋ vəŋ lùu vɨɨ Nwi fiiba Yeso Kristo, buꞌ faŋ viŋ ye ŋɨꞌ fɨ ghɔ vɨɨ shɨ viŋ, sheꞌ faŋ vɨɨ Jus vɔ́ ye ŋɨꞌ fɨ ghɔ vɨɨ shɨ vəŋ nə.

¹⁵ Vɨɨ Jus nə kee kɔ ŋɨꞌ sheꞌ tɨ́ vɨɨ Nwi fiiba Yeso me, vəŋ nə bee kii zwì nshɨ-tɔ tɨta Yeso, baa zwilə nshiisə-ŋii sɔghɔ nɨzi, baa luu shoꞌ ghuu ghia. Vəŋ kee bàw tɨ́ Nwi me; vəŋ lùu vɨɨ mbeenə vɨɨ vənshə.

¹⁶ Vəŋ baa fəŋ yia laa kɨ yia kɨ gisə tɨ́ vɨɨ tətɔŋ fu, tɨ́ kaꞌ Nwi bweysə vəŋ me. Nɨniŋ, vəŋ lwèsə mfɨꞌ nu bwə vəŋ yighee muꞌ. Luu nə, nsɔꞌ Nwi duꞌtə nyə jia vəŋ maa məndisə vəŋ.

Faŋ jɨŋ vɨɨ Tesalonika za və Pɔɔl

¹⁷ Vaŋ-nshwi via, faŋ nsiŋ nə gàasə maa wee-fɨ-kuŋtə yighee nee nə, jɨŋ yiŋ za yia dɨdɨꞌ, faŋ vɨ kɔlə gàasə sheꞌ məyenə yiŋwaa nyaa-nsiŋ, kee gàasə fwi saŋ-nsiŋ me. Nɨniŋ, yia kəə ŋkee dɨdɨꞌ maa məye yikəꞌ yiŋ ghee nshə,

¹⁸ kəə jwi ye viŋ ghee ghee. Nshɨ-tɔ ŋwaa, Pɔɔl, yaa kəə jwi yɨ viŋ yighee muꞌ, tɨꞌnə me ghee bɔɔ, luu nə, tɨɨ vəzwitə vəbwəvə fəŋ yia.

¹⁹ Nu ŋkɨə tɨ́ kaꞌ yia ŋaytə shɔ vɨsɨ tɨta ŋwaa-nsiŋ Yeso maa yighee njyə faŋ ŋwə ndɔ bəŋ jwi nə, taa luu kə? Nu ŋkɨə tɨ́ kaꞌ vɨ ndɔ bəŋsə yia shɔ, yia nùŋ fwi sia shɔ, lùu kə? Maa luu sheꞌ viŋ.

²⁰ Yia ndɔ ŋaytə maa yighee yɔ́ luu buꞌ viŋ. Nwi yɨsə yia kwalə buꞌ viŋ.