1 Tesalonika 1 - Vengo (Babungo)

Faŋ Pɔɔl nə shɔ̀ꞌtə Nwi tɔ vɨɨ Tesalonika

¹ Lùu mə, Pɔɔl, nə Silvanɔs, baa nə Timoti, faŋ yia nyɔ̀ꞌ ŋwaꞌlə ŋwə̀ tɨ́ nshəŋtə vɨɨ Nwi fɨ ntɨꞌ Tesalonika maa yizii tɨta Nwi, baa nə tɨta Yeso Kristo. Nwi kɔ viŋ nə mənɔŋ-bwaŋnə, baa nə məduꞌ-nyɔŋ!

² Yia bwaŋ Nwi ghee nshə tɔ viŋ vənshə, baa lumə viŋ taa məshɔꞌtə wia.

³ Yia kɨ lumə vəfaꞌ vəjəəvə viŋ faŋ viŋ faꞌ buꞌ məbiŋ wiŋ maa Nwi, baa nə vənu vəjəəvə viŋ faŋ viŋ yɨsə fɨ taa ŋkawnə, baa lumə faŋ viŋ jìa fwi, kɨ̀ꞌ tɨta ŋwaa-nsiŋ Yeso Kristo maa yizii Nwi, faŋ lùu Tii ŋwaa-nsiŋ nə.

⁴ Vaŋ-nshwi via faŋ Nwi kàw, yia kɔꞌ kɨɨ laa Nwi shòꞌ viŋ,

⁵ fɔnə ntɔŋ yijəə Nwi faŋ yia nə fɨ̀ꞌtə tɨ́ viŋ nə, kee jwì taa ŋwaa viŋ sheꞌ fɨ maa yigisə shuu me. Ŋkə nə jwì ŋkee nə wutə Nwi, baa nə Zwitə Ley Nwi. Yia nə də̀ tɨ́ viŋ faŋ ntɔŋ yijəə yɔ́ luu ŋkee nu yinsəŋ. Viŋ kɔꞌ kɨɨ faŋ yia nə tòꞌ taa ŋwaa viŋ maa mədə jɨɨ tɨ́ viŋ.

⁶ Viŋ nə zwètə nshinə yia baa nə nshinə tɨta Yeso, buꞌ faŋ viŋ nə zɔ̀ nu Nwi, bìŋ nə məŋaytə, faŋ vɨ nə kɔlə kɔ ŋɨꞌ tɨ́ viŋ ŋkee yiyaŋ. Nə yɨsə Zwitə Ley Nwi laa viŋ nə bìŋ nə məŋaytə nə.

⁷ Nɨniŋ, viŋ gu vɨɨ tɨ́ kaꞌ vɨɨ məbiŋ Nwi fɨ shɨ Makedonia baa nə fɨ shɨ Akaya vənshə bèꞌsə ghuu yitoꞌ kiŋ,

⁸ fɔnə nu Nwi nə fùu fɨ ghɔ viŋ, saynə taa məshɨ mə Makedonia nə Akaya, baa kii shɔ̀ɔ fɨ fuŋ, vɨ kɨɨ nə məbiŋ wiŋ, faŋ viŋ nùŋ fwi maa Nwi nə, maa vəshəŋ vənshə. Nɨniŋ, yia kee baa kìi nu gì me,

⁹ buꞌ laa nshɨ-tɔ vɨɨ vɔ́ gisə nu kia, faŋ yia nə jwì yɨ viŋ nə, tɨ́ vɨɨ, baa gi faŋ viŋ nə kwìinə fwi siŋ, nùŋ maa Nwi, mèꞌ vənwi vədayday, faꞌ tɨ́ Nwi faŋ lùu Nwi yinsəŋ, faŋ kii sheꞌ ŋwə kìi məbwey,

¹⁰ baa nə laa viŋ kɨꞌ Yeso, wee Nwi, faŋ Nwi nə ywèysə ŋwə fɨ shɨ yiku nə, faŋ ŋwə ndɔ siꞌ fɨ yizɔ, jwì bwèysə nsiŋ fɨ taa nsɔꞌ Nwi faŋ nyə ndɔ ŋii maa vɨɨ nə.