Әйүп 25 - Изге Яҙма

Билдадтың өсөнсө телмәре: Кеше Алла күҙендә нисек хаҡ була алһын?

¹ Шуахтан килгән Билдад былай тип яуап бирҙе:

² «Аллала – хакимлыҡ менән дәһшәт. Ул Үҙ юғарылығында именлекте бар ҡыла.

³ Уның ғәскәрҙәренең хисабы-һаны бармы? Нуры кемгә генә төшмәй?

⁴ Кеше Алла күҙендә нисек хаҡ була алһын? Ҡатындан тыуған зат нисек пак булһын?

⁵ Ҡара, Алла хозурында ай ҙа тоноҡ, Хатта йондоҙҙар ҙа пак түгел.

⁶ Селәүсен һымаҡ ҡына фани бәндәгә ни һан? Әҙәм балаһы бары – ер ҡорто!»