Womusu 60 - Bibeli Gusunɔn Gari

¹ Womu ɡe Dɑfidi u wom kowobun wiruɡii kuɑ kɑ mɔrɔku. U ɡu kuɑwɑ u kɑ keu sɔ̃ɔsi.

² Womu ɡe, Dɑfidin tɑbɑ ɡɑ kɑ yɑ̃ bi u kɑ Siriɡii be bɑ wɑ̃ɑ Mɛsopotɑmiɔ kɑ Sobɑɔ kuɑ. Ye Dɑfidi u tɑɑ bi wee, win tɑbu sunɔ Yoɑbu u Edɔmun tɑbu kowobu ɡowɑ nɔrɔbun subɑ wɔkurɑ yiru (12.000) wɔwɑ ɡɑɑ sɔɔ ye bɑ mɔ̀ Bɔru. Womu ɡe wee.

³ Gusunɔ, wee ɑ sun yinɑ mɑ ɑ sun yɑrinɑsiɑ. Bɑɑ mɛ ɑ mɔru sɑ̃ɑ, ɑ sun seeyo.

⁴ A derɑ tem mu yĩirɑ mɑ mu bɛsikirɑ. A mu kpɑɑsinɔ domi mu kɑnkirɑmɔ.

⁵ A derɑ wunɛn tɔmbɑ nɔni sɔ̃ɔrɑ, mɑ bɑ tɑm nɔrɑ mu ben wiru ɡɔsiɑ.

⁶ Be bɑ nun nɑsie, berɑ ɑ wunɛn ɡidi bɔrɑ wɛ̃, kpɑ yu sɔ̃ɔsirɑ ɡem sɔ̃.

⁷ A sun wɔro kɑ wunɛn dɑm. A bɛsɛn kɑnɑru nɔɔwɔ, kpɑ su fɑɑbɑ wɑ bɛsɛ wunɛn kĩnɑsibu.

⁸ Gusunɔ u ɡeruɑ win sɑ̃ɑ yee dɛɛrɑrɔ u nɛɛ, u koo nɑsɑrɑ wɑ. U koo Sikɛmu bɔnu ko kpɑ u tɔmbu Sukɔtun wɔwɑ yɑbuɑ.

⁹ Wiyɑ u Gɑlɑdi mɔ. Wiyɑ u mɑɑ Mɑnɑse mɔ. Efɑrɑimu yɑ sɑ̃ɑwɑ nɡe win sii furɔ kɔkɔru. Mɑ Yudɑ yɑ sɑ̃ɑ nɡe win sinɑ dɛkɑ.

¹⁰ Adɑmɑ Mɔɑbu yɑ sɑ̃ɑwɑ win woburutiɑ. U koo Edɔmu bɑrɑ nɔɔ teu kɔ̃ɔwɑ u kɑ sɔ̃ɔsi mɑ yɑ kuɑ wiɡiɑ. Filisitibɑ bɑ koo nùn nɑsɑrɑn kuuki koosi kɑ nuku dobu.

¹¹ Wɑrɑ u koo kɑ mɑn dɑ wuu ɡbɑ̃rɑruɡuu ɡen mi. Wɑrɑ u koo mɑn kpɑrɑ u kɑ dɑ Edɔmuɔ.

¹² Yinni Gusunɔ, wunɑ kɑɑ kɑ mɑn dɑ, wunɛ wi ɑ rɑɑ sun yinɑ, mɑ ɑ ku rɑ mɑɑ kɑ bɛsɛn tɑbu kowobu yɑri.

¹³ A sun somiɔ su kɑ yɑri nɔni swɑ̃ɑrun di. Tɔnun somiru tɑ sɑ̃ɑwɑ wom dirum.

¹⁴ À n wɑ̃ɑ kɑ bɛsɛ, sɑ ko kpĩ su tɑbu ko kɑ wɔruɡɔru. Kpɑ ɑ bɛsɛn yibɛrɛbɑ kɔsuku.