Womusu 44 - Bibeli Gusunɔn Gari

¹ Womu ɡe Koren bibu bɑ wom kowobun wiruɡii kuɑ. Ge wee.

² Gusunɔ, sɑ nuɑ kɑ bɛsɛn tiin swɑɑ wunɛn sɔmɑ ye ɑ kuɑ bɛsɛn bɑɑbɑbɑn wɑɑti. Berɑ bɑ sun ye sɔ̃ɔwɑ.

³ Kɑ wunɛn tiin nɔmɑ ɑ bwese tukunu ɡirɑ. A bwese ni so nu yɑrinɑ, mɑ ɑ bɛsɛn bɑɑbɑbɑ swĩi nin wɑ̃ɑ yenɔ.

⁴ Bɛsɛn bɑɑbɑ be, bɑ bwese nin tem mwɑ. N ǹ mɔ yèn sɔ̃ bɑ tɑkobi mɔ, n ǹ mɑɑ mɔ yèn sɔ̃ bɑ dɑm mɔ, ɑdɑmɑ yèn sɔ̃ ɑ bu kĩwɑ mɑ ɑ wɑ̃ɑ kɑ be, mɑ ɑ bu yɑrɑ kɑ wunɛn nɔmu.

⁵ Gusunɔ, wunɑ ɑ sɑ̃ɑ nɛn sinɑ boko. A wunɛn tɔmbu nɑsɑrɑ wɛ̃ɛyɔ.

⁶ Kɑ wunɛn dɑmɑ sɑ ko bɛsɛn yibɛrɛbɑ suriri. Kɑ wunɛn yĩsirɑ sɑ ko bu suni.

⁷ Domi nɑ yɛ̃ mɑ n ǹ nɛn tɛndu, ǹ kun mɛ nɛn tɑkobi yɑ koo mɑn fɑɑbɑ ko.

⁸ Wunɑ kɑɑ sun wɔrɑ bɛsɛn yibɛrɛbɑn nɔmɑn di. Kpɑ ɑ be bɑ sun tusɑ burisinɑ.

⁹ Sɑ ko n woo kɑnɑmɔ tɔ̃ru bɑɑtere wunɛn sɔ̃, sɑ n nun siɑrɑmɔ sere kɑ bɑɑdommɑɔ.

¹⁰ Kɑ mɛ, wee ɑ sun yinɑ, ɑ sun sekuru doke, ɑ ku rɑ n mɑɑ kɑ bɛsɛn tɑbu kowobu wɑ̃ɑ bɑ̀ n tɑbu yɑriɔ.

¹¹ A derɑ sɑ biruku yirɑ wurɔ bɛsɛn yibɛrɛbɑn wuswɑɑɔ, be, be bɑ sun tusɑ bɑ bɛsɛn yɑ̃nu ɡurɑmɔ.

¹² A sun bɛri ben nɔmɑɔ nɡe mɛ bɑ rɑ ɑrɑri yɑ̃ɑru nɔmu bɛrie. Mɑ ɑ derɑ sɑ yɑrinɑ, sɑ yɑbi bwese tukunu sɔɔ.

¹³ A bɛsɛ, wunɛn tɔmbu dɔrɑmɔ ɡobi sɑri, ɑ ǹ mɑɑ sun ɡɑrisi ɡɑ̃ɑ ɡeenu.

¹⁴ Wee ɑ sun sekuru doke bɛsɛn berusebun wuswɑɑɔ,

¹⁵ be, be bɑ sun sikerenɛ, bɑ sun yɛ̃ɛmɔ, bɑ sun yɑɑkoru mɔ̀. A derɑ bwese tukunu nu sun womu dokemɔ, mɑ nu sun wii ɡimɑnu koosimɔ kɑ yɑɑkoru.

¹⁶ Wee sere kɑ tɛ̃, seku te, tɑ rɑ n mɑn mɔ̀wɑ, kpɑ nɑ n nɛn wuswɑɑ wukiri

¹⁷ yèn sɔ̃ nɛn yibɛrɛ u mɑn wɔri, u wɔmmɔ u mɑn nɔɔ kuurimɔ.

¹⁸ Yenibɑ kpurowɑ yɑ rɑ sun deemɛ. Kɑ mɛ, sɑ ǹ nun duɑri, sɑ ǹ mɑɑ wunɛn ɑrukɑwɑni kusie.

¹⁹ Bɛsɛn ɡɔ̃ru ɡɑ ǹ sĩire wunɛn min di, sɑ ǹ mɑɑ ɡɛre wunɛn swɑɑn di.

²⁰ Adɑmɑ kɑ mɛ, ɑ sun kɔsukɑ ɡbɑburɔ dɛmɑkunun wɑ̃ɑ yerɔ. Mɑ ɑ sun yɑm wɔ̃kuru wukiri.

²¹ Gusunɔ, sɑ̀ n dɑɑ wunɛn yĩsiru duɑri, mɑ sɑ dɑ sɑ bũnu ɡɑnu sɑ̃ɑmɔ,

²² ɑ ǹ kɑɑ tubu, wunɛ wi ɑ tɔnun ɡɔ̃run ɡɑri yɛ̃?

²³ Adɑmɑ wunɛn sɔ̃nɑ bɑ sun ɡoomɔ bururu kɑ yokɑ, bɑ sun mɛɛrɑ nɡe yɑ̃ɑ ni bɑ kɑ dɔɔ bu ɡo.

²⁴ A dom yɑndo Yinni! Mbɑn sɔ̃nɑ ɑ do. A dom yɑndo. A ku sun yinɑ sere kɑ bɑɑdommɑɔ.

²⁵ Mbɑn sɔ̃nɑ ɑ wunɛn wuswɑɑ berumɔ. Mbɑn sɔ̃nɑ ɑ ǹ bɛsɛn wɔnwɔndu mɔ̀. A ǹ wɑ nɡe mɛ bɑ sun tɑɑre?

²⁶ Domi sɑ nuki sɑnkire. Sɑ kpĩ tuɑ sɔɔ.

²⁷ A seewo ɑ sun somi. A sun wɔro wunɛn durom bɑkɑm sɔ̃.