Womusu 19 - Bibeli Gusunɔn Gari

¹ Dɑfidin womu ɡe u wom kowobun wiruɡii kuɑ. Ge wee.

² Wɔllu kɑ kperi yi Gusunɔn yiiko sɔ̃ɔsimɔ. Sɔ̃ɔ kɑ suru bɑ Gusunɔn bɛɛrɛ sɔ̃ɔsimɔ. Kɑ win nɔmɑ u sɑɑbɑ yi yi.

³ Tɔ̃ru bɑɑtere tɑ ten seedɑ dimɔ. Wɔ̃kuru bɑɑtere tɑ ten ɑreru dimɔ.

⁴ Adɑmɑ n ǹ kɑ nɔɔ ɡɑɡu, n ǹ kɑ ɡɑri ɡɛɛ, n ǹ kɑ bɑrum ɡɑm.

⁵ Kɑ mɛ, bɑ yiiko yen seedɑ nɔɔmɔ hɑnduniɑ kpuro sɔɔ. Bɑ ye mɛɛrɑ hɑnduniɑn ɡoonu nnɛ sɔɔ. A sɔ̃ɔ mɛɛrio. Wɔllu miyɑ Gusunɔ u nùn wɑ̃ɑ yeru kuɑ.

⁶ Ù n yɑrɑ u rɑ n sɑ̃ɑwɑ nɡe kurɔ kpɑon durɔ. Ù n sĩimɔ u rɑ n sɑ̃ɑwɑ nɡe tɑbu durɔ.

⁷ U rɑ yɑriwɑ wɔllun bee tiɑ, kpɑ u du berɑ ɡiɔ. Ù n sĩimɔ, ɡɑ̃ɑnu sɑri ni nu koo win yɑm susuru suuri.

⁸ Yinni Gusunɔn ɡɑri yi yibɑ. Yi rɑ tɔnu wɑ̃ɑru kɑ dɑm wɛ̃. Yinni Gusunɔn nɔɔn ɡɑri yi nɑɑnɛ mɔ. Yi rɑ yɛ̃ru sɑriruɡii bwisi kɛ̃.

⁹ Yinni Gusunɔn ɡere yɑ dɛnde. Yɑ rɑ tɔnu nuku dobu wɛ̃. Yinni Gusunɔn sɔ̃ɔsiru tɑ dɛɛre. Tɑ rɑ tɔnu yɑm wɑɑsie.

¹⁰ Yinni Gusunɔn sɑ̃ɑru tɑ sɑ̃ɑ ɡem. Tɑ ko n wɑ̃ɑwɑ sere kɑ bɑɑdommɑɔ. Ye Yinni Gusunɔ u yi, yɑ sɑ̃ɑwɑ dee dee, yɑ rɑ tɔmbu kpuro siriwɑ.

¹¹ Domi win ɡɑri yi wurɑ ɡeɑ kere. Win ɡere yɑ tim ɡɔm dobu kere.

¹² Nɑ̀ n win ɡɑri yi swĩi, yi rɑ mɑn kirɔ ko. Nɑ̀ n win woodɑbɑ mɛm nɔɔwɑ, nɑ rɑ yen ɑrufɑɑni wɑ.

¹³ Kɑ yen de kpuro tɔnu koo kpĩ u win torɑnu kpuro tubu? Yinni Gusunɔ, ɑ mɑn dɛɛrɑsio nɛn torɑ ni nɑ ǹ tubɑn di.

¹⁴ A ku mɑɑ de n durum ko kɑ deɡɑnɡɑm. A ku de yu mɑn dɔɔrɛ ko, kpɑ nɑ n durum bɑkɑn tɑɑrɛ mɔ. Adɑmɑ ɑ de nɑ n dɛɛre.

¹⁵ Yinni Gusunɔ, ɑ de ɑ n sɑ̃ɑ nɛn kuku yeru. Yinni Gusunɔ, ɑ mɑn fɑɑbɑ koowo durum kpuron di. A de nɛn ɡɑri yi nun wɛ̃re. A de nɛn bwisikunu nu nun wɛ̃re.