Womusu 116 - Bibeli Gusunɔn Gari

¹ Nɑ Yinni Gusunɔ kĩ, domi u rɑ nɛn nɔɔ nɔ nɑ̀ n nùn sokɑ.

² U rɑ nɛn ɡɑri swɑɑ dɑki. Wiyɑ ko nɑ n dɑ soku nɛn wɑ̃ɑrun tɔ̃ru kpuro sɔɔ.

³ Gɔɔn yɔni yi rɑɑ mɑn bɔkuɑ, mɑ ɡɔribun wɑ̃ɑ yerun nuku sɑnkirɑnu mɑn nɛni. Nɑ wɑ̃ɑ nɔni swɑ̃ɑru kɑ wuriribu sɔɔ.

⁴ Yerɑ nɑ Yinni Gusunɔ nɔɔɡiru sue nɑ nɛɛ, Yinni Gusunɔ, ɑ nɛn wɑ̃ɑru wɔro.

⁵ Gusunɔ bɛsɛn Yinni u sɑ̃ɑwɑ tɔn ɡeo kɑ ɡemɡii. Mɛyɑ win wɔnwɔndɑ kpɑ̃.

⁶ Yinni Gusunɔ u rɑ bwɛ̃ɛbwɛ̃ɛbu kɔ̃su. Nɑ rɑɑ wɔnwɔndu soore, ɑdɑmɑ u mɑn fɑɑbɑ kuɑ.

⁷ Nɛn bwɛ̃rɑ, ɑ wɛ̃ro, domi Yinni Gusunɔ u mɑn ɡeɑ kuɑ.

⁸ Geemɑ, u mɑn wɔrɑ ɡɔɔn di, mɑ u nɛn nɔni yĩresu wokɑ, u ǹ dere n sokurɑ.

⁹ Kon sĩ win wuswɑɑɔ hɑnduniɑ ye sɔɔ.

¹⁰ Nɑ nùn nɑɑnɛ doke, bɑɑ mɛ nɑ nɛɛ, nɑ wɔnwɔndu soore.

¹¹ Nɛn nuku sɑnkirɑru sɔɔ, nɑ nɛɛ, ɡoo sɑri wi u nɑɑnɛ mɔ.

¹² Mbɑ kon Yinni Gusunɔ dibu kɔsiɑ ɡeɑ ye u mɑn kuɑn sɔ̃.

¹³ Kon tɑm tɑ̃rɑ win wuswɑɑɔ, kpɑ n win yĩsiru soku n kɑ nùn siɑrɑ fɑɑbɑ ye u mɑn kuɑn sɔ̃.

¹⁴ Nɔɔ mwɛɛ ni nɑ nùn kuɑ, kon nu yibiɑ win tɔmbu kpuron nɔni biru.

¹⁵ Be bɑ Yinni Gusunɔ nɑɑnɛ sɑ̃ɑn ɡɔɔ u sɑ̃ɑwɑ ɡɑ̃ɑ bɑkɑnu win mi.

¹⁶ Yinni Gusunɔ, ɑ nɛ, wunɛn sɔm kowo swɑɑ dɑkio. Nɑ sɑ̃ɑwɑ wunɛn sɔm kowo tɔn kurɔn bii. Wunɑ ɑ nɛn yorun wɛ̃ɛ burɑ.

¹⁷ Yen sɔ̃nɑ kon nun siɑrɑbun yɑ̃kuru kuɑ, kpɑ n wunɛn yĩsiru soku.

¹⁸ Nɔɔ mwɛɛ ni nɑ nun kuɑ, kon nu yibiɑ wunɛn tɔmbu kpuron nɔni biru,

¹⁹ wunɛn sɑ̃ɑ yerɔ Yerusɑlɛmun suunu sɔɔ. Yen sɔ̃, i Yinni Gusunɔ siɑro.