Esɑi 59 - Bibeli Gusunɔn Gari

Ye yɑ Isirelibɑ kɑrɑnɛ kɑ Gusunɔ

¹ I tɑmɑɑ Gusunɔ kun dɑm mɔwɑ u kɑ bɛɛ fɑɑbɑ ko? I tɑmɑɑ u ǹ swɑɑ mɔ u kɑ bɛɛn ɡɑri nɔ?

² Aɑwo, n ǹ mɛ. I n yɛ̃ mɑ bɛɛn tiin durum sɔ̃nɑ i kɑrɑnɛ kɑ wi. Bɛɛn torɑnun sɔ̃nɑ u bɛɛ biru kisi, mɑ yɑ derɑ u ǹ mɑɑ bɛɛn ɡere swɑɑ dɑki.

³ Bɛɛn nɔmɑ yɑ yɛm yibɑ, domi i tɔmbu ɡo. Weesu kɑ ɡɑri kɔ̃siyɑ yi yɑrimɔ bɛɛn nɔsun di.

⁴ Weesɑ i rɑ n kɑ bɛɛn berusebu siribu sokumɔ. Bɛɛn ɡoo ku rɑ kɑ ɡem siribu de. Seedɑ weesuɡiɑ sɔɔrɑ i rɑ n tɑ̃sɑ siri yeru mi. Kɔ̃sɑ i rɑ bwisiku kpɑ i kom kɔ̃sum ko.

^5-6 Bɛɛn himbɑ yɑ sɑ̃ɑwɑ ɡɑ̃ɑ kɔ̃sunu nɡe wɑɑn sɛ̃ɑ. Bɑ̀ n ye kɔrɑ, surɔkɔrɑ tɑ rɑ yɑnde yɑri min di. Wi u ye di u ko n ɡbimɔwɑ. Bɛɛn bwisikunu nu sɑ̃ɑwɑ nɡe nɑrɑn wɛ̃ɛ yi yɑ tɑrimɔ. N ǹ mɔ yi wɑ̃ɑ yi kɑ ɡɑ̃ɑ ɡeenu ko, nɡe bekuru te tɔnu koo wukiri, mɑ n kun mɔ yi kɑ ɡɑ̃ɑnu yinɑ mwɑ. Nɡe mɛyɑ bɛɛn nɔmɑ yɑ sɑ̃ɑ, yɑ wɑ̃ɑwɑ yu kɑ kɔ̃sɑ ko.

⁷ I rɑ n sɛndewɑ i kɑ kɔ̃sɑ ko, kpɑ i n nɑɑsu sɑ̃u i kɑ tɔnun yɛm yɑri kɑm. I rɑ n bwisikumɔwɑ i kɑ tɔmbu kɔ̃sɑ kuɑ, kpɑ i n tɔmbu dɑm dɔremɔ i n ben yɑ̃nu ɡurɑmɔ mi i duɑ kpuro.

⁸ I ǹ ɑlɑfiɑn swɑɑ yɛ̃. Bɛɛn sɑnu sɑnusu ku rɑ mɑɑ ɡem swĩi, sere swɛɛ yi yi ǹ dɛnde. Wi u ɡesi bɛɛn swɛɛ yi mwɑ kpuro, u ku rɑ bɔri yɛndu wɑ.

Isirelibɑ bɑ ben durum tuubɑ mɔ̀

⁹ Isirelibɑ bɑ nɛɛ, bɛsɛn torɑnun sɔ̃nɑ wunɛ Yinni Gusunɔn fɑɑbɑ yɑ tɛɛmɔ yèn nɔɔ mwɛɛru ɑ sun kuɑ. Sɑ yɑm bururɑm mɑrɑ, ɑdɑmɑ yɑm wɔ̃kuru sɔɔrɑ sɑ sĩimɔ kɑ tɛ̃. Sɑ mɑrɑ sɔ̃ɔ u yɑri, ɑdɑmɑ yɑm mu tĩriwɑ sere kɑ ɡisɔ.

¹⁰ Sɑ sĩimɔ sɑ bɑ̃ɑrimɔ nɡe wɔ̃ko wi u ɡɑnɑ bɑbi. Mɑ sɑ sokikirɑmɔ sɔ̃ɔ sɔɔ nɡe wi u wɑ̃ɑ yɑm wɔ̃kuru sɔɔ. Bɑɑ mɛ sɑ bwɑ̃ɑ do, bɛsɛ kɑ ɡonu sɑ kuɑ tiɑ.

¹¹ Sɑ ɡbɑ̃rɑmɔ nɡe yɑɑ ɡɔbɑ, mɑ sɑ sumɔ nɡe kpɑrukonu. Yinni Gusunɔ, sɑ mɑrɑ ɑ sun yɑkiɑ, ɑdɑmɑ wunɛn fɑɑbɑ yɑ kɑ sun tondɑ. N ǹ koore su ye wɑ.

¹² Domi bɛsɛn torɑnu kpɛ̃ɑ wunɛn wuswɑɑɔ, mɑ bɛsɛn durum yɑ bɛsɛn dɑɑ sɔ̃ɔsimɔ. Sɑ bɛsɛn torɑnu yɛ̃ ni nu sun wɑ̃ɑsi.

¹³ Sɑ kuɑ tɑɑrɛɡibu kɑ nɑɑnɛ sɑriruɡibu wunɛ Yinni Gusunɔn mi. Sɑ nun deri wunɛ wi ɑ sɑ̃ɑ bɛsɛn Yinni, mɑ sɑ nun seesi, sɑ tɔmbu dɑm dɔre. Bwisiku weesuɡinɑ nu rɑ n yibɑ bɛsɛn ɡɔ̃rusɔ.

¹⁴ Yerɑ n derɑ ɡem kun kɑ mɑɑ wɑ̃ɑ bɛsɛn suunu sɔɔ, mɑ fɑɑbɑ yɑ kɑ sun tondɑ. Gem mu ku rɑ mɑɑ sɔ̃ɔsire mi tɔmbɑ mɛnnɛ. Sɑ rɑ mu tɛɛsiwɑ.

¹⁵ Gem mu kpɑ. Wi u mɑɑ kɔ̃sɑ suurimɔ bɑ rɑ nùn wɔriwɑ bu win yɑ̃nu ɡurɑ. Ye Yinni Gusunɔ u wɑ mɑ ɡem kun mɑɑ wɑ̃ɑ, yɑ ǹ kɑ nùn nɑɑwɛ.

Yinni Gusunɔ u koo tɔmbu sɛɛyɑsiɑ

¹⁶ Mɑ u biti kuɑ, yèn sɔ̃ ɡoo kun yen ɡɑri mɔ̀. Yen sɔ̃nɑ win tii u ɡɔ̃ru doke u win dɑm sɔ̃ɔsi. Mɑ u tɑ̃sɑ win ɡem sɔɔ,

¹⁷ u mu sebuɑ nɡe tɑrɑkpe, mɑ u fɑɑbɑ doke wirɔ nɡe sii furɔ kɔkɔru. U mɔru kɔsiɑbu sebuɑ nɡe yɑberu, mɑ u tii nisinu wukiri nɡe ɡurumusuru.

¹⁸ U koo bɑɑwure siri nɡe mɛ̀n nɔɔ win kookoosu nɛ, kpɑ u kɑ win yibɛrɛbɑ mɔru ko, bɑɑ be bɑ kɑ nùn tomɑ,

¹⁹ kpɑ bu win yĩsiru nɑsiɑ kpɑ win yiiko yu sɔ̃ɔsirɑ sɑɑ sɔ̃ɔ yɑri yerun di n kɑ dɑ sɔ̃ɔ duu yerɔ. Sɑnɑm mɛ yibɛrɛbɑ bɑ koo nɑ nɡe dɑɑ bɑkɑrun nim, Yinni Gusunɔn Hunde u koo bu ɡirɑ bu doonɑ.

²⁰ Fɑɑbɑ kowo u koo nɑ Yerusɑlɛmun sɔ̃, kɑ sere mɑɑ Isirelibɑ be bɑ ɡɔ̃ru ɡɔsiɑn sɔ̃. Yinni Gusunɔwɑ u yeni ɡeruɑ.

²¹ U mɑɑ nɛɛ, win ɑrukɑwɑni wee, ye u kɑ bu bɔkumɔ. Win Hunde u ko n wɑ̃ɑwɑ be sɔɔ, kpɑ u win ɡɑri doke ben nɔsɔ. Yin ɡɛɛ kun doonɔ ben nɔsun di, sere n kɑ dɑ ben bibun bibun nɔsɔ, sɑɑ tɛ̃n di sere kɑ bɑɑdommɑɔ. Wi, Yinni Gusunɔwɑ u yeni ɡeruɑ.