Esɑi 56 - Bibeli Gusunɔn Gari

BƆNU ITASE Yinni Gusunɔ u koo bwesenu kpuro soku

¹ Amɛniwɑ nɛ, Yinni Gusunɔ nɑ ɡeruɑ. Nɑ nɛɛ, i de i ɡem swĩi dee dee kpɑ i n sɑ̃ɑ nɑɑnɛɡibu. Domi nɑ kɑ fɑɑbɑ wee, nɑ ǹ tɛɛmɔ. Kon sɔ̃ɔsi mɑ nɑ sɑ̃ɑ ɡemɡii.

² Doo nɔɔruɡiiwɑ wi u mɔ̀ ye nɑ ɡeruɑ, mɑ u yɔ̃ dim dim u nɛn tɔ̃ɔ wɛ̃rɑruɡiru mɛm nɔɔwɑmmɛ, mɑ u ku rɑ tu disi doke, mɑ u tii nɛni u ku kɑ kɔ̃sɑ ko.

³ Tɔn tuko wi u nɛ, Yinni Gusunɔ sɑ̃ɑmɔ, u ku ɡere u nɛɛ, nɑ ǹ wurɑmɔ u du nɛn tɔmbun suunu sɔɔ. Wi bɑ mɑɑ mɑtɑm kuɑ sinɑ kpɑɑrun sɔmburun sɔ̃, u ku ɡere u nɛɛ, wee, u kuɑ dɑ̃ɑ ɡbeburu.

⁴ Domi ɑmɛniwɑ nɛ, Yinni Gusunɔ nɑ ɡeruɑ. Nɑ nɛɛ, sinɑ kpɑɑrun sɔm kowo be, bɑ̀ n nɛn tɔ̃ɔ wɛ̃rɑruɡiru mɛm nɔɔwɑmmɛ, mɑ bɑ mɔ̀ ye yɑ koo mɑn wɛ̃re, mɑ bɑ nɛn ɑrukɑwɑni nɛni dim dim,

⁵ kon bu ɑyeru wɛ̃ nɛn yɛnuɔ, kpɑ bu yĩsiru yɑri n kere bɑ̀ n dɑɑ bibu mɑrɑ. Kon bu yĩsiru kɛ̃ te tɑ ko n wɑ̃ɑ sere kɑ bɑɑdommɑɔ, tɑ ǹ ɡbimɔ.

⁶ Tɔn tuko be bɑ mɑn sɑ̃ɑmɔ, mɑ bɑ nɛn yĩsiru kĩ, mɑ bɑ sɑ̃ɑ nɛn sɔm kowobu, be kpuro be bɑ tɔ̃ɔ wɛ̃rɑruɡiru mɛm nɔɔwɑmmɛ, mɑ bɑ ǹ tu disi dokemɔ, mɑ bɑ nɛn ɑrukɑwɑni nɛni,

⁷ kon kɑ bu dɑ nɛn ɡuu dɛɛrɑrɔ, kpɑ n de bu nuku dobu ko nɛn sɑ̃ɑ yerɔ. Kon ben yɑ̃ku dɔ̃ɔ mwɑɑrɑruɡinu kɑ ben yɑ̃ku ni nu tie mwɑ nɛn yɑ̃ku yerɔ. Domi bɑ koo nɛn dii te sokuwɑ bwesenu kpuron kɑnɑ yeru.

⁸ Nɛ, Yinni Gusunɔ, nɛ wi nɑ Isireli be bɑ rɑɑ yɑrinɛ mɛnnɑ, kon mɑɑ bwese tukunu mɛnnɑ kɑ be, nɛn tɔmbu sɑnnu.

Gusunɔ u Isirelibɑn wiruɡibu ɡerusimɔ

⁹ Bɛɛ ɡbeeku yɛɛ kpuro, i nɑ i di.

¹⁰ Domi be bɑ sɑ̃ɑ Isirelibɑn kɔ̃sobu, bɑ sɑ̃ɑwɑ wɔ̃kobu, bɑ ǹ bwisi mɔ. Be kpuro bɑ sɑ̃ɑwɑ nɡe bɔ̃ɔ ni nu kun kpɛ̃ nu wori. Bɑ rɑ kɑ̃wɑ bɑ n kpĩ bɑ n do kpɑ bɑ n dosimɔ.

¹¹ Bɑ sɑ̃ɑwɑ nɡe bɔ̃ɔ ni nù n di, nu ku rɑ debu. Bɑ sɑ̃ɑwɑ nɡe kpɑro lɑɑkɑri sɑribɑ. Swɑɑ ye ben bɑɑwure u kĩ, yerɑ u rɑ swĩi win tiin ɑrufɑɑnin sɔ̃.

¹² Bɑ sokunɑmɔ bɑ mɔ̀, bu mɛnnɑmɑ bu tɑm bɔɔbɔm nɔ, siɑ kpɑ bu mɑɑ ko mɛ domi tɑm mu yibɑ.