Esɑi 23 - Bibeli Gusunɔn Gari

Yinni Gusunɔ u koo Tiri kɑ Sidoni kpeerɑsiɑ

¹ Gɑri wee yi yi kɑ Tiri yɑ̃. Bɛɛ be i wɑ̃ɑ ɡoo nimkuu bɑkɑsu sɔɔ, i wuri koowo, domi bɛɛn wuu ɡɑ kɑm kuɑ. Yɛnusu kun mɑɑ wɑ̃ɑ, duu yeru mɑɑ sɑri. Sɑɑ Kitimun tem diyɑ sɑ yen lɑbɑɑri nuɑ.

² I mɑrio bɛrum sɔ̃, bɛɛ be i wɑ̃ɑ nim wɔ̃kun ɡooru ɡiɑ mi Sidonin tenkubɑ bɑ rɑ sɑre.

³ Eɡibitiɡibu bɑ dobi yeemɔ dɑɑ te mɔ̀ Niluɔ mɑ tenkubɑ bɑ ye dwemɔ bɑ dɔrɑmɔ mɑ bɑ ɑre bɛkɛ dimɔ. Mɑ yɑm mi, n kuɑ bwesenu kpuron yɑburu.

⁴ Sidoni, kɑɑ sekuru wɑ, domi Tiri, nim wɔ̃kun wuu dɑmɡuu, ɡɑ ɡeruɑ ɡɑ nɛɛ, ɡɑ ǹ mɑrubun wɑhɑlɑ ɡɑɑ wɑɑre, ɡɑ ǹ mɑɑ mɑrure. Gɑ ǹ bii ɑluwɑɑsi bɔm kɛ̃ɛre, ɡɑ ǹ mɑɑ bii wɔndiɑ seeyɑre.

⁵ Eɡibitiɡibu bɑ̀ n nuɑ mɑ Tiri yɑ wɔrumɑ, bɑ koo diiri.

⁶ Bɛɛ be i wɑ̃ɑ nim wɔ̃kun ɡooru ɡiɑ, i wuri koowo i kɑ dɑ Tɑɑsisiɔ.

⁷ Bɛɛn wuu ɡe ɡɑ wɑ̃ɑ sɑɑ yellun di ɡè sɔɔ i rɑ nuku dobu ko, ɡerɑ mi? Tiri yerɑ mi? Yèn tɔmbu bɑ dɑ bɑ tem tukumɡibu kɑmiɑ?

⁸ Wɑrɑ u ye kpuron himbɑ yi Tirin sɔ̃, ye, ye yɑ rɑ yen wiruɡibu swĩi tem tukumɔ. Yen tenkubɑ bɑ kuɑ sinɑ bibu. Mɑ bɑ bɛɛrɛ mɔ hɑnduniɑ kpuro sɔɔ.

⁹ Gusunɔ, wɔllu kɑ tem Yinniwɑ u ye yi, u kɑ be bɑ tii sue kɑwɑ tem mɛ sɔɔ, kpɑ bu be bɑ rɑɑ bɛɛrɛ wɛ̃ɛmɔ ɡɛm.

¹⁰ Bɛɛ Tɑɑsisiɡibu i tɛrio bɛɛn tem sɔɔ nɡe mɛ dɑɑ te bɑ mɔ̀ Nilu tɑ̀ n nim yibɑ mu rɑ tɛrie. Domi yoo sɔmɑ kpɑ.

¹¹ Yinni Gusunɔ u win nɔmɑ dɛmiɑ nim wɔ̃kun berɑ ɡiɑ. Mɑ u derɑ sinɑmbɑ diirɑ. U derɑ Kɑnɑnin ɡbɑ̃rɑ dɑmɡinu nu wɔrukɑ.

¹² U mɑɑ nɛɛ, bɛɛ Sidoniɡibu i ǹ mɑɑ nuku dobu wɑsi. Domi bɑ bɛɛ dɑm dɔre nɡe wɔndiɑ wi u kun durɔ yɛ̃. Bɑɑ ì n seewɑ i dɑ Kitimun temɔ, min tii i ǹ wɛ̃rɑbu wɑsi.

¹³ I Bɑbiloniɡibu mɛɛrio. Bɑ ǹ mɑɑ wɑ̃ɑ. Asiriɡibu bɑ bu kpeerɑsiɑ. Nɡe mɛyɑ bɑ Tiri wɔri bɑ tɑrusi, bɑ yen sinɑ kpɑɑnu kɔsukɑ, mɑ ye kpuro yɑ kuɑ bɑnsu.

¹⁴ I wuri koowo bɛɛ be i wɑ̃ɑ ɡoo nimkuu bɑkɑsu sɔɔ. Domi Tirin wuu dɑmɡuu ɡe, ɡɑ wɔrumɑ.

¹⁵ Bɑ koo Tirin ɡɑri duɑri n kɑ ko wɔ̃ɔ wɑtɑ kɑ wɔkuru nɡe sinɑ boko turon bɑndun tɛɛbun sɑkɑ. Adɑmɑ yen biru yɑ ko n sɑ̃ɑwɑ nɡe kurɔ sɑkɑrɑ wi bɑ womu doke bɑ mɔ̀,

¹⁶ ɑ mɔrɔku suo ɑ n soomɔ ɑ kɑ wuu sikerenɑ, wunɛ wi ɑ sɑ̃ɑre kurɔ sɑkɑrɑ wi bɑ duɑri. A ɡu soowo nɡe mɛ wunɛn yɛ̃rɑ nɛ, ɑ n kɑ womu dɑbi dɑbinu mɔ̀, kpɑ bu wunɛn ɡɑri yɑɑyɑ.

¹⁷ Wɔ̃ɔ wɑtɑ kɑ wɔku ten biru, Yinni Gusunɔ u koo de Tiri yu mɑɑ wurɑ yen yellun tenkuru sɔɔ te bɑ mɔ̀ kɑ tɑki. Kpɑ yu kɑ hɑnduniɑn tɔmbu kpuro ɑrukɑwɑni bɔke.

¹⁸ Adɑmɑ bɑ ǹ yen ɑrumɑni kɑ yen ɑre yi bɑ wɑ kɑ tɑki ɡurɑmɔ bu mɛnnɑ ben tiin sɔ̃. Bɑ koo ye kpuro Yinni Gusunɔ yiiyɑwɑ kpɑ yɑ n sɑ̃ɑ be bɑ nùn sɑ̃ɑmɔɡiɑ, kpɑ bu dĩɑnu wɑ bu di bu debu, kpɑ bu yɑ̃ɑ burɑnu wɑ bu doke.