Amɔsu 6 - Bibeli Gusunɔn Gari

Bɑ koo Isirelibɑ kpeerɑsiɑ

¹ Bɔ̃rurobɑ bɛɛ be i wɑ̃ɑ Siɔniɔ bɔri yɛndu sɔɔ, kɑ bɛɛ be i sɔ̃ Sɑmɑrin ɡuurɔ kɑ toro sindu. Mɑ i tɑmɑɑ i sɑ̃ɑ bwese te tɑ kpɑ̃ɑru bon wiruɡibu. Mɑ Isirelibɑ bɑ somiru mɑrɑ bɛɛn min di.

² I doo Kɑlinɛɔ i wɑ. Min di, kpɑ i dɑ Hɑmɑtiɔ wuu bɔkɔ ɡen mi. Kpɑ i sɑrɑ i dɑ Gɑtiɔ Filisitibɑn temɔ. Ben wuu si, su bɛɛ Isirelibɑ kɑ Yudɑbɑn wusu ɡeɑ turɑ? Ben tem mɛ, mu bɛɛn tem kpɑ̃ɑru turɑ?

³ Wee i ǹ kĩ wɑhɑlɑn tɔ̃ru tu bɛɛ nɑɑwɑ. Mɑ i sere tii dɑɑ kɔ̃sɑ ɡɑwemɔ. Mɑ yɑ bɑndu dii bɛɛn suunu sɔɔ.

⁴ Mɑ i kpĩ sɑu kpin yee burɑnu sɔɔ, nì bɑ burɑru kuɑ kɑ suunu donnu. I tii yɑ̃ɑ kpɛmminu kɑ nɑɑ kpɛmi yi yi ɡum mɔ ɡɔsiɑmmɛ ɡɔ̃sun di i temmɔ.

⁵ I mɔrɔkunu soomɔ i womusu mɔ̀ bwisikunu sɑriru sɔɔ. Mɑ i tɑmɑɑ i nin soberu yɛ̃wɑ nɡe Dɑfidi.

⁶ I tɑm nɔrumɔ kɑ nɔri bɛkɛ. I tii ɡum turɑreɡim sɑwɑmɔ. Mɑ i ǹ nuki sɑnkire yèn sɔ̃ bɛɛn bweseru tɑ koo kɑm ko.

⁷ Yen sɔ̃nɑ bɑ koo ɡbi bu bɛɛ yoru mwɛɛri bu kɑ doonɑ kpɑ bɛɛn nuku dobun kuuki kɑ bɛɛn tɔ̃ɔ bɑkɑ dim mu kpe.

Sɑmɑri yɑ koo kɑm ko

⁸ Gusunɔ wɔllu kɑ tem Yinni u bɔ̃ruɑ kɑ win tiin wɑ̃ɑru u nɛɛ, u ǹ bɛɛ Isirelibɑn tii suɑbu kĩ. U mɑɑ bɛɛn sinɑ kpɑɑnu tusɑ. U koo de bu Sɑmɑri mwɑ kɑ ye yɑ wɑ̃ɑ ye sɔɔ kpuro.

⁹ Tɔmbu wɔkuru bɑ̀ n tie yɛnu ɡɑɡu sɔɔ, bɑ koo ɡbiwɑ.

¹⁰ Goo ù n win tɔnun ɡoru suɑ yɛnun di u kɑ yɑrɑ u dɔɔ u dɔ̃ɔ mɛni, u koo wi u wɑ̃ɑ yɛnu sɔɔwɔ bikiɑ u nɛɛ, ɡoo mɑɑ tie u wɑ̃ɑ kɑ wunɛ? Kpɑ yɛ̃ro u nùn wisi u nɛɛ, ɡoo sɑri. Kpɑ wini u nɛɛ, ɑ mɑrio. N ǹ weenɛ su Gusunɔn yĩsiru siɑ sɑɑ yeni sɔɔ kpɑ u sun sĩiremɑ.

¹¹ Domi Yinni Gusunɔ u woodɑ yeni wɛ̃ u nɛɛ, u koo yɛnusu kpuro kɔsukuwɑ, bɑkɑsu kɑ piiminu.

Nɑsɑrɑ kɑm

¹² Bɑ rɑ dumi yɑkie kpee sɑɑrɑ wɔllɔ? Bɑ rɑ kɑ nɛɛ wuku mi? Adɑmɑ wee bɛɛ i ɡem ɡɔsiɑ dɛ̃ɛ. Mɑ i ɡeɑ ɡɔsiɑ ɡɑ̃ɑ sosurɑnu.

¹³ Bɛɛ i nuku dobu mɔ̀ kɑm sɔɔ, mɑ i ɡerumɔ i mɔ̀, bɛɛn tiin dɑmɑ i kɑ nɑsɑrɑ wɑ.

¹⁴ Yen sɔ̃nɑ Gusunɔ wɔllu kɑ tem Yinni u nɛɛ, u koo de bwese tukuru ɡɑru tu bɛɛ seesi. Kpɑ tu bɛɛ dɑm dɔre sɑɑ Hɑmɑtin duu yerun di sere n kɑ dɑ nim torɑɔ ye yɑ wɑ̃ɑ ɡbɑburun berɑ ɡiɑ mi ɡɑ̃ɑnu ku rɑ kpi.