रोमि 8 - बान्तावा राईसेङ्लावादाङ्काओ ह़ङ्म़ङ 1 खोन्ओसा हान ख्रिस्त येसुएनान अ़क्नि कालिचिएदा दन्दा मात्द़ङ। 2 देकिनालो ख्रिस्त येसुदाङ्का ताओ ह़ङ्म़ङ काप़ सेङ्लावाओ अ़य़ङ्हुप्आ हेवा खोन्कि स़माओ अ़सावादाङ्का खानानिन ऩफोङ्सिन। 3 आन्को हेवामि आन्मित्माचि मान्ऱकादा म़लिसाओसा य़ङ्हुप्आ दि मुमा मान्ऱदो, मो निनाम्हाङ्आ अ़मुवा। निनाम्हाङ्आ आप्पिओ अ़चुछा अ़याङाकि आन्कान्वाको हेवामिचिओ आन्हेवाचिओ निम्पाङ हेन्खोक्वा अ़पुवाकि हेवाओ अ़क़म्मा आन्कान्एदाङ्का अ़लुक्ता। 4 हेवामि मित्माचिदा काकोन माआङ, मेन सेङ्लावादा काकोन्ओ निम्पाङ साम्योक्मिआ दोरुओ य़ङ्हुप नुलोक आन्कान्एदा तालाने निकिना निनाम्हाङ्आ ओ अ़मुवा। 5 हेवामि मित्मावात्नि काकोन्चिआ पोक्ओ य़ङ्चिदा अ़चुमिन्मा अ़पाक, मेन सेङ्लावावात्नि काकोन्चिआ सेङ्लावाओ य़ङ्चिदा अ़चुमिन्मा अ़पाक। 6 हेवामि पोक मित्माचिदा मिन्मा पाक्मानिओ स़मा ओ, मेन सेङ्लावादा मिन्मा पाक्मानिओ ह़ङ्म़ङ खोन्कि सेवाङ्नि ओ। 7 साङ्आ हेवामि मित्माचिदा अ़मिन्मा पाउ, मो निनाम्हाङ्ओ अ़चुङेङ लि। मो देम्खाछाङ निनाम्हाङ्ओ अ़चुय़ङ्हुप्दा अ़प़नान्लाप्नान्चिमिन, खोन्कि अ़नुछ्याङा लिमा अ़ऱनिन। 8 हेवामि पोक मित्माचिओ अ़चुक़म्मादा कायुङ्चिआ निनाम्हाङ्ओ अ़चुऩङानुमा ऩऱन। 9 मेन खानानिन आम्नुओ हेवामि मित्माचिआ ऩक़म्तिमिन्येन। खानानिन्एदा निनाम्हाङ्ओ अ़चुलावा म़युङ्याङ्नालो खानानिन सेङ्लावाआ ऩक़म्तिन्युङ्सिन। मेन साङ्एदा ख्रिस्तओ अ़चुलावा ऩयाक्निन, मो म़ना ख्रिस्तओ माआङ। 10 ख्रिस्त खानानिन्एदा म़युङ्याङ्नालो हेवाओ अ़तुक्वाआ खानानिन आम्नुओ पोक्दा त़स़न्नुछाङ आम्नुओ लावा साम्योक्मिओ अ़तुक्वाआ ह़ङ। 11 येसु म़सुवादाओदाङ्का अ़ह़ङ कामुओ अ़चुलावा खानानिन्एदा म़याक्नालो ख्रिस्त येसु म़सुवादाओदाङ्का काह़ङ्लोन्आ खानानिन्एदा कायाक खोक्कोसोओ अ़चुलावालाम्पा स़दाओ आम्नुओ पोक्छाङ ह़ङ्म़ङ अ़प़। 12 खोन्ओसा ब़ब़, नाना खोन्कि निछाचि ओ, आन्कान मुमादोत्ओ काचि ना ब़द्धे युङ्याङ, मेन आन्कान हेवाओ काचि मुमादा राकाङ्थेत्नि मात्द़ङ। 13 देकिनालो हेवामि मित्मावात्नि त़ह़ङिन्नालो खानानिन त़स़न, मेन सेङ्लावालाम्पा पोक्ओ हेवामि काचिचि त़लुक्तुम्च़म्नालो खानानिन त़ह़ङिन। 14 झारा साङ निनाम्हाङ्ओ अ़चुलावाआ म़तित्तुचि, मोचि निनाम्हाङ्ओ अ़चुछाचि ओ। 15 देकिनालो किन्माकि हारुक मुमा लावा खानानिन्आ मान्तोक्त़युक्तुम, मेन तात्मा छा लिमाओ निम्पाङ निनाम्हाङ्ओ अ़चुलावा त़तोक्तुम्युङ्सुम। खोन्ओसा निनाम्हाङ लावालाम्पा आन्कान निनाम्हाङ “अब्बा! आपो!”नि बुत्तुम। 16 आन्कान निनाम्हाङ्ओ अ़चुछाचि ओ निकिना सेङ्लावाआ आन्लावाएनान अ़छ़ङ अ़मु। 17 हान आन्कान अ़चुछाचि ओनालो आन्कान अ़चुपाङ्यिचिछाङ ओ। अ़नुछ्याङा निनाम्हाङ्ओ अ़चुपाङ्यि खोन्कि ख्रिस्तएनान अ़क्नि पाङ्यिचि ओ। खोक्कोएनान अ़क्नि आन्कान दुखा आङ्तुम्नालो आन्कान खोक्कोओसो अ़चुसाम्छाङ तोक्तुम। तायाङ्ओ साम 18 अ़ङ्का मिन्ङाङा, आन्कान म़प़ओ साया आइमित्ओ आन्दुखाचिएनान तोङ्माखाङ्मा अ़खान्तुन्चिन। 19 अ़नुछ्याओ निनाम्हाङ्ओ अ़चुछाचि साङ्चिओ निकिना खाङ्मुमा झारा मुन्माय़ङ्आ राक्एनान तायाङ्ओ लेन हुङुङु। 20 देकिनालो झारा मुन्माय़ङ सोज्जेओ लिसा, मोसोओ आप्पि अ़मिन्माआ माआङ, मेन निनाम्हाङ्आङा ओ मोवात्नि लिनेनि म़मिना। 21 हान झारा मुन्माय़ङ्आ राक्स़रि खोन्कि निनाम्हाङ्ओ अ़चुछाचिएनान अ़क्नि साया तोक्माओ लेन अ़हुङ्याङ। मोन्ग़रि मोचि अ़चुलुक्मा खोन्कि अ़चुस़मादाङ्का म़फोङ्लोन। 22 आन्कान सिन्तुम्योम, झारा मुन्माय़ङ्आ आइमित्तारि छातोक्मा सारिमाआ लाउओवात्नि ह़त्पा लुयाङ। 23 खोन्कि मुन्माय़ङ्आ ओन्ङा माआङ, मेन आन्कान आप्पि साङ्एदा सेङ्लावाओ बुयाओ अ़सिवा याक्याङ, तात्माछावात्नि लोक्लुमा खोन्कि आन्पोक लेन्माओ निम्पाङ राक्एनान हुङ्याङ्सा आन्कान आप्पिछाङ आन्कोङ्हुत्या ह़त्पा लुन्येन। 24 निनाम्हाङ्आ आन्कान म़लेइसादाङ्का ओ सोम्कुवा म़पुवा। मेन ओ आइमित्तारि आन्कान मान्तोक्युक्तुम्ओसा आन्कान आन्मिन्मादा मो हुङुम्योम। आन्कान तोक्तुम्ओखाङ्दे देकि हुङ्मादोराओ? 25 मेन आन्कान दि अ़तोक्तिमिन, मो आन्कान सोम्कुवा मुम्नालो आन्कान मो आङ्याङ्सा हुङुम। 26 सेङ्लावाआछाङ आन्कान आन्मान्ऱदामादा म़फा। आन्कान देत्नि यामात्मादोत्ओ आन्कान अ़लेसिमिन, मेन य़ङ्सिवाचिदा य़ङ्मा अ़ऱन्मिन्ओ ह़त्पादा सेङ्लावाआङा आन्को निम्पाङ याम़मात प़। 27 खोन्कि म़नाचिओ अ़चुसाकोङ्वा काखाङ निनाम्हाङ्आ सेङ्लावाओ अ़चुमिन्मा दि ओ, मो अ़सिन, देकिनालो निनाम्हाङ्ओ अ़चुमित्चिऩङ्वात्नि सेङ्लावाआ निनाम्हाङ्ओ अ़चुम़नाचिओ निम्पाङ याम़मात। 28 आन्कान सिन्तुम्योम, खोक्को सोमाकातुक्चि खोन्कि खोक्कोसोओ अ़चुमित्चिऩङ्वात्नि म़बुत्तुचिओचिओ निम्पाङ झारा य़ङ्चिदा निनाम्हाङ्आ नुलोक म़मुचि। 29 साङ-साङ खोक्कोसाआ बुयाङा म़सिन्तुयुङ्सुचि, निनाम्हाङ्आ मोचि आप्पिओ अ़चुछा ख्रिस्तवात्नि मुमा निम्पाङ म़छेन्तुचि। खोक्कोसाआ ओ अ़मुवा, खोन्ओसा ब़द्धे ब़ब़, नाना खोन्कि निछाचिएदा ख्रिस्त झारादाङ्का ब़ब़ म़लिने। 30 साङ-साङ खोक्कोसाआ बुयाङा म़छेन्तुचि, मोचि खोक्कोसाआ म़बुत्तुचिछाङ। खोन्कि साङ्चि खोक्कोसाआ म़बुत्तुचि, मोचि खोक्कोसाआ साम्योक्मिछाङ म़काइसुचि, खोन्कि साङ-साङ साम्योक्मि म़काइसुचि, मोचि खोक्कोसाआ साम्स़रिओछाङ म़मुचि। निनाम्हाङ्ओ अ़चुसोम्तुक्मादाङ्का आन्कान दिसाआछाङ म़फेक्निन 31 खोन्नालो आन्कान दे य़ङिन? निनाम्हाङ आन्लिप्पादा म़युङ्याङ्नालो आन्देङ्सालाप्पादा साङ युङ्याङ कि? 32 निनाम्हाङ्आ आप्पिओ अ़चुछा मान्लेत्अ़दा, मेन आन्कान झारासोओ निम्पाङ अ़चुछा म़पुवालावा। दि खोक्कोसाआ आन्कान म़हिप्ताओ झारा सामाचिछाङ अ़चुछाएनान अ़क्नि म़प़निन कि? 33 निनाम्हाङ्आ म़छेन्तुचिओ म़नाचिओ अ़चुदेङ्सालाप्पादा साङ्आ लाहि पाक्तुचि? साङ्आछाङ माआङ, देकिनालो निनाम्हाङ्आङा साम्योक्मि म़मुयुङ्सुचि। 34 निनाम्हाङ्ओ अ़चुम़नाचि हेवामिचिओ निकिना लाहिपाक्मा काऱ साङ ओ? साङ्छाङ मात्द़ङ, देकिनालो ख्रिस्त आन्को निम्पाङ म़सुवा, मोदाङ्का च़लोक, खो म़सुवादाओदाङ्का अ़ह़ङ म़लिसा खोन्कि निनाम्हाङ्ओ अ़चुचुप्ताङ्छुक्लिप्पा म़युङ्याङ खोन्कि आन्को निम्पाङ याम़मात्याङ। 35 साङ्आ आन्कान ख्रिस्तओ अ़चुसोम्तुक्मादाङ्का म़फेक? दि अ़चाअ़त्माआ माङ्लो दुखाआ, ल़क्माआ, माङ्लो स़ङ्साक्वाआ, माङ्लो काल़ङ्द़क्आ, माङ्लो क़माकात्माआ हे बान्छोन्आ? 36 साम्कालिन्दा ओवात्नि छाप्तायुङ्सा, “आम्नुओ निम्पाङ आन्कान्का नाम्प़क्लो स़मा तेम्मादोत, धेत्मायु भेराचिवात्नि आन्कान्का ऩखान्युङ्सिन्का।” 37 मेन ओ झारा य़ङ्चिदा आन्कान निनाम्हाङ्ओ अ़चुसोमातुक्मालाम्पा काछोचिदाङ्काछाङ आन्कान च़लोक मुन्येन। 38 देकिनालो अ़ङ्का ओ अ़नुछ्या सिन्तुङ्योङ, ना स़माआ ना ह़ङ्म़ङ्आ ना निनाम्हाङ काफाचिआ ना अ़खान्मिन्ओ सावाचिआ, ना आइमित्ओ य़ङ्चिआ ना माय़ङ म़ताओ य़ङ्चिआ, ना हेन्खामादाओ खाक्कोछाङ सावाचिआ, 39 खोन्किना नाम्चोक्दुओ सावाचिआ ना हेन्खामा भेन्युओ सावाचिआ, अ़नुछ्याङा, झारा मुन्माय़ङ्दाओ खाक्कोछाङ य़ङ्आ, ख्रिस्त येसु आन्हाङ्पा आन्कान्एदा म़युङ्याङ्ओसा आन्निनाम्हाङ्ओ अ़चुसोम्तुक्मादाङ्का आन्कान फेक्मा म़ऱनिन। |
© Wycliffe Bible Translators, Inc. All rights reserved.
Wycliffe Bible Translators, Inc.