रोमि 5 - बान्तावा राईसाकोङ्छ़ङ्आ ऩङानुमा तारु 1 मोवात्नि साकोङ्छ़ङ्लाम्पा निनाम्हाङ्आ आन्कान साम्योक्मि म़काइसायुङ्सा। खोन्ओसा हान आन्हाङ्पा येसु ख्रिस्तलाम्पा निनाम्हाङ्एदा आन्कान सेवाङ्नि ह़ङिन। 2 खोक्कोएदाङ्का आन्कान ओ सोम्तुक्मादा साकोङ्छ़ङ्लाम्पा वाङ्मा तोक्तुम्युङ्सुम। मो सोम्तुक्मादा आन्कान युङिन्येन, खोन्कि निनाम्हाङ्ओ अ़चुसाम आन्कान्छाङ तोक्मा सोम्कुवादा आन्ऩङानुसिन्चिन्ने। 3 मोन ओन्ङा माआङ, मेन आन्कान आन्दुखाचिदाछाङ ऩङानुसिन्चिन, देकिनालो आन्कान सिन्तुम्योम दुखाआ आङ्मा सावा तारु। 4 आङ्मा सावाआ निनाम्हाङ्एदा देत्नि ह़ङ्मानिओ सावा पोइसु, खोन्कि मोसाआ अ़छ़ङ सोम्कुवा आन्कान म़प़। 5 खोन्कि सोम्कुवाआ आन्कान लेजोदा म़पाक्निन, देकिनालो आन्कान म़पुवाओ सेङ्लावालाम्पा निनाम्हाङ्ओ अ़चुसोमातुक्मा आन्साकोङ्वाचिदा म़पाक्तापुवायुङ्सा। 6 देकिनालो आन्कान मान्ऱदान्येन््हिदाङा ख्रिस्त मान्साम्योक्मिचिओ निम्पाङ तोङाङाओ ग़रि म़सुवा। 7 अ़क्छा साम्योक्मि म़नाओ निम्पाङ अ़क्छा म़ना स़मा राक्काभालाओ य़ङ ओ, खोन्नुछाङ अ़नुवाक म़नाओ निम्पाङ साङ्नुछाङ स़मा राक मुमा ऱ। 8 मेन निनाम्हाङ्आ आन्कान्एदा खोक्कोसोओ तोक्पो अ़चुसोम्तुक्मा ओवात्नि खाङ्अ़मुसा, आन्कान हेवामि युङिन्येन्हिदाङा ख्रिस्त आन्को निम्पाङ म़सुवा। 9 खोक्कोसोओ अ़चुह़लाम्पा आन्कान साम्योक्मि काइसिन्ओसाआ अ़नुछ्याङा निनाम्हाङ्ओ अ़चुच़ऱपादाङ्का खोक्कोसाआ आन्कान म़लेन! 10 आन्कान निनाम्हाङ्ओ अ़चुङेङ्चि मुन्येन्नुछाङ मेन खोक्कोसाआ अ़चुछाओ अ़चुस़मालाम्पा आन्कान खोक्कोसोओ अ़चुयावाचि म़मुवा। हान आन्कान निनाम्हाङ्ओ अ़चुयावाचि लिसिन्युङ्सिन्नालो अ़नुछ्याङा खोक्कोसोओ अ़चुछाओ अ़चुह़ङ्म़ङ्लाम्पा आन्कान म़ह़ङ। 11 ओन ओन्ङा माआङ, मेन आन्हाङ्पा येसु ख्रिस्तलाम्पा निनाम्हाङ्एदा आन्ऩङानुसिन्चिन, खोक्कोसाआ ओन्ग़रि आन्कान निनाम्हाङ्ओ अ़चुयावा म़मुवायुङ्सा। आदम्लाम्पा स़मा खोन्कि ख्रिस्तलाम्पा ह़ङ्मा 12 अ़क्छा म़नालाम्पा हेन्खामादा हेवा ता, खोन्कि हेवादाङ्का स़मा। खोन्कि झारा म़नाचि हेवा म़मुवाओसा झारा म़नाचिएदा स़मा ता। 13 अ़नुछ्याङा, य़ङ्हुप प़मा बुया हेन्खामादा हेवा युङाङा। मेन हेवाओ अ़तुक्वादा य़ङ्हुप्ङा मात्द़ङ्याङ्ओ ग़रि हेवाओ दन्दाछाङ मात्द़ङ्याङ। 14 खोन्नुछाङ, आदम्दाङ्का निनाम्हाङ्य़ङ खाकालु मोसातारिओ झारा म़नाचिएदा स़मा हाङ मुवा, मेन आदम चुवावात्नि मोचिआ निनाम्हाङ्ओ अ़चुलोमाय़ङ अ़काक्ताकि हेवा मान्मुचि। आदम आदेङ काता ख्रिस्तओ अ़मात्ऩङ्ओ अ़फान म़लिसा। 15 मेन निनाम्हाङ्आ मोहा प़माय़ङ आसिखा आदम्ओ अ़हेवावाको माआङ। देकिनालो अ़क्छा म़नाओ अ़हेवाआ ब़द्धेकापाङ म़सुवा। च़लोक निनाम्हाङ्ओ अ़चुसोम्तुक्मा खोन्कि अ़क्छा म़ना येसु ख्रिस्तलाम्पा ताओ छुक्तुप्मा आसिखा ब़द्धेसोओ निम्पाङ च़लोक लिसा। 16 खोन्कि मोहा प़माय़ङ आसिखा अ़क्छा म़नाओ अ़हेवाओ अ़सिवावात्नि माआङ। देकिनालो अ़क्तात हेवाओ छ़ङ्छेन्माआ दन्दा तारु, मेन ब़द्धेकादु आन्कान हेवा मुन्नुछाङ निनाम्हाङ्ओ मोहा प़माय़ङ अ़चुआसिखाआ खोक्कोएदा लोक्मा म़खान्ताओ आन्कान म़मुवा। 17 देकिनालो अ़क्छा म़ना आदम्ओ अ़हेवाआ स़मा हाङ मुवानालो निनाम्हाङ्ओ तोक्पो अ़चुसोमातुक्मा खोन्कि खोक्कोसो साम्योक्मिओ छुक्तुप्मा कातोक्चिआ अ़क्छा म़ना येसु ख्रिस्तलाम्पाङा अ़धुन्ओ ह़ङ्म़ङ अ़तोक। 18 खोन्ओसा अ़क्छा म़नाओ अ़हेवाआ झारा म़नाचि दन्दा कातोक म़लिसा, मोवात्निङा अ़क्छा म़नाओ अ़साम्योक्मि काचिआ झारा म़नाचि साम्योक्मि काइसुचि खोन्कि झारा म़नाचि ह़ङ्म़ङ्दा तारुचि। 19 देत्नि अ़क्छा म़नाओ लोमावा मान्च़दामाआ ब़द्धेकापाङ हेवामि मुचि, मोवात्निङा अ़क्छा म़नाओ लोमाय़ङ्वा च़मालाम्पा ब़द्धेकापाङ साम्योक्मि म़मुचि। 20 झारा म़नाचिआ देम हेवा म़मुवायुङ्सा, मो अ़सिन्ने निकिना निनाम्हाङ्आ अ़चुय़ङ्हुप म़पुवा, मेन खादा हेवा पोया, मोदा सोमाम्तुक्माछाङ च़लोक पोया। 21 खोन्ओसा देत्नि हेवाआ स़मादा हाङ मुवा, मोवात्निङा येसु ख्रिस्त आन्हाङ्पालाम्पा सोमातुक्माआछाङ हाङ मुकिना साम्योक्मिलाम्पा अ़लुक्निन्ओ ह़ङ्म़ङ्दा म़तित। |
© Wycliffe Bible Translators, Inc. All rights reserved.
Wycliffe Bible Translators, Inc.