यहुदा 1 - बान्तावा राईयहुदाओ अ़सेवा 1 अ़ङ्का येसु ख्रिस्तओ अ़चुहारुक खोन्कि याकुब्ओ अ़निछा यहुदा ओ। याकुब्ओ अ़निछा ओ। निनाम्हाङ्आ खा-खाक्कोचि म़बुत्तुचि, निनाम्हाङ पापाओ अ़चुसोमातुक्मादा कायुङ्चि खोन्कि येसु ख्रिस्तआ म़रात्तुचिओचिओ निम्पाङ अ़ङ्का ओ छाप्लावा छाप्तुङ्योङ। 2 सोमातुक्मा खोन्कि सेवाङ्नि खानानिन्एदा च़लोक पोन्याङ्सा खात्ने। सोज्जेओ काचिन्चि 3 सोमातुक्नाङ्नानिन्ओ यावाचि ओ, आन्कान झारासोओ लेन्माओ अ़तुक्वादा छाप्मा अ़न्नुनु लामाङ्युङ्सा। मेन हान मोसोओ अ़फान्दा, निनाम्हाङ्आ अ़चुओ म़नाचि अ़धुन्ओ निकिना म़प़चिओ साकोङ्छ़ङ रात्माओ निम्पाङ चात्लो काचि मुमाओ राक प़मा छाप्लावा छाप्मादोत्नि मिनाङ। 4 मोचिआ तोक्मा दन्दाओ अ़तुक्वादा ना ब़द्धे बुयादाङ्काङा छाप्तायुङ्सा। खा-खाक्को म़नाचि मान्सिन्मान्तोक आम्नुओ रादा म़ताचिआयुङ्सा। मोचि निनाम्हाङ मान्ब़क्कादा म़नाचि ओ, मोचिआ आन्निनाम्हाङ्ओ अ़चुसोमातुक्मा ताङ्लान्दा अ़फान्तायुङ्सा। आन्को अ़क्छा ओन्ङा ओ आन्हाङ्काचि कामु खोन्कि हाङ्पा येसु ख्रिस्त ऩङाअ़छित। मोचिआ तोक्मा दन्दाओ अ़तुक्वादा ना ब़द्धे बुयादाङ्काङा छाप्तायुङ्सा। 5 खानानिन्आ ओ झारा य़ङ्चि अ़क्दु त़सिन्तुम्च़म्ओङा ओ, खोन्नुछाङ ओन्ग़रि खानानिन अ़ङ्का मित्मेत्मा स़ङाङा। मिस्र हेन्कोप्याङ्का अ़क्दु झारा म़लेइसुचिकि म़बात्तुचिओ म़नाचिएदाओ साकोङ्छ़ङ मान्मुकादाचि निनाम्हाङ्आ आदेङ म़लुक्तुचि। 6 खोन्कि निनाम्हाङ काफाचि अ़चुपाङ्ओ छान्वा मान्च़चि, मेन खान्तुचिओ अ़चुयुङ्खा काछित्चि खोक्कोसाआ मो तोक्पो छ़ङ्छेन्माओ लेन्तारिओ निम्पाङ अ़धुन्तारि चोक्माय़आ कुन्चियाधेक्धेक्ओहुत्दा म़छ़सुयुङ्सुचि। 7 मोवात्निङा सदोम खोन्कि गमोरा खोन्कि मोसोओ अ़च़क्चिदात्निओ सहराचि आन्को निम्पाङ अ़मात्ऩङ म़लिसायुङ्सा। मोचि अ़चुताकावा ताङ्लान म़मुवाकि पोक मित्मादा म़धा। मोवात्नि लिसाओसा मो सहराचि अ़धुन अ़लुक्निन्ओ मिआ म़लुक्तुचि। 8 मोवात्निङा सेन्मुयु काखाङ सोज्जेओ काचिन्चिआ अ़चुपोक अ़पोप, निनाम्हाङ्ओ अ़चुपाङ ऩङाअ़छित खोन्कि निनाम्मादुओ अ़ह़ङ्चि म़सुङ्तुचि। 9 मेन अ़धिवा निनाम्हाङ काफा मिखाएल्आछाङ निनाम्हाङ्य़ङ खाकालु मोसाओ अ़स़पोक्ओ अ़तुक्वादा सैतानाएनान दुम्तुसाङाचिहिदा मोसोओ अ़देङ्सालाप्पादा सुङ्याङ्सा लाहिपाक्मा राक मान्मु, मेन खोसाआ “निनाम्हाङ्आ खाना ऩरेन्ने”नि लो। 10 मेन मोचिआ दि ऩतुप्तुन, मो य़ङ्चि म़सुङ्तुचि। मोचि अ़चुखारु मात्द़ङ्ओ सायाम्पोक्चिवात्नि म़मुयाङ, खोन्कि मोचि दि म़मिन, मोवात्निङा मोचि म़च़, खोन्ओसा मोचि म़लुक। 11 मोचि दन्दादा म़छुक! देकिनालो मोचिआ कयिन कोलाओ लाम अ़त़ङ्तायुङ्सा, खोन्कि मोचिआ तोक्माओ निम्पाङ खोचि बालाम फेलाओदा म़धा, खोन्कि मोवात्नि कोरहआ निनाम्हाङ्ओ अ़चुदेङ्सालाप्पादा मुओ ङेन्दा म़लुक्खात। 12 ओचि सोमातुक्माओ आम्नुओ यावायोक खाबाचादा थुपि कापाक अ़अ़त्पा म़नाचि ओ। देकिनालो खोचि ओन्ङा म़खाङ्नान्चिन्कि दिसुवा मान्लु ब़द्धे म़चा खोन्कि म़दुङ। मोचि ह़क्आ मुत्तुखात्तुचिओ चाक्वा मात्द़ङ्ओ य़वारिवाको म़मुयाङ, अ़सिवा सिमा ग़रिदा अ़सिवा मात्द़ङ्ओ स़ङ्ताङ्वात्नि मोचि अ़धुन म़सुवादाचिआओ, खोन्कि अ़चुभेन्एनान म़धेलाखाइसाओचि ओ। 13 मोचि क़म्मा अ़ऱन्मिन्ओ धियाङ्वामाओ अ़लोङ्वात्वाकोचि ओ, मोचिआ लेजोकात्ओ अ़चुकाचिओ च़माथाङ्मा छोम्पुत्नुङ्वावा अ़लोन। ओचि म़हुलुक्ओ साङ्केन्माचिवा म़मुयाङ, मोचिओ निम्पाङ निनाम्हाङ्आ स़लावाचि दन्दा प़खा अ़लुक्निन्ओ कुन्चियाधेक्धेक्ओ कुन्यामा अ़च़क्तायुङ्सा। 14 आदम्दाङ्का सात्कादुङ आदेङ्ओ हनोक्आछाङ ओ म़नाचिओ अ़चुतुक्वादा ओवात्नि निनाम्हाङ्य़ङ खालुसु, “एनानुम! खिप्मा अ़ऱन्मिन्ओ म़सेङ्याङ्ओ अ़चुम़नाचिएनान 15 झारा म़नाचिओ अ़चुछ़ङ्छेइसि हाङ्पा म़तायाङ। झारा मान्साम्योक्मिचिआ अ़मुवायुङ्साओ झारा मान्साम्योक्मि अ़अ़त्पा काचिचि खोन्कि हाङ्पाओ अ़चुदेङ्सालाप्पादा म़चेवायुङ्साओ चाअ़त्लो य़ङ्चि ह़त्सि हाङ्पा म़तायाङ।” 16 छुऩङ्वा कामु म़नाचि, काऱक्चि, अ़चुअ़त्लो मित्मादा काकोन्चि, ऱफोक्वा य़ङ काचेप्चि खोन्कि अ़चुओ तोक्माओ निम्पाङ नि म़नाचि वाकालेङ ओचिङा ओ। चाप्चेत्मा खोन्कि यायोक 17 मेन सोमातुक्नाङ्नानिन्ओ यावाचि ओ, खानानिन्आ आन्हाङ्पा येसु ख्रिस्तओ अ़चुछाम्माय़ङ म़नाचिआ बुया खाअ़लुसाओ य़ङ्चि मित्तानुम्च़म। 18 मोचिआ खानानिन ऩलोन्युङ्सिन ओ, “आदेङ्ओ ग़रिदा निनाम्हाङ कासुङ्चि म़ताकि अ़चुओ मान्साम्योक्मि अ़त्लो मिन्मादा म़वाङ।” 19 म़ना काफेक्चि, हेन्खामादाओ मिन्माआ क़म्तुचिओ खोन्कि सेङ्लावा मात्द़ङ्ओ म़नाचि ओचिङा ओ। 20 मेन सोमातुक्नाङ्नानिन्ओ यावाचि ओ, आम्नुओ अ़न्नुनु सेङ्याङ्ओ साकोङ्छ़ङ्दा आप्पि खानानिन पोयानिन, खोन्कि सेङ्लावाओ अ़चुक़म्मादा यामारानिन। 21 खानानिन निनाम्हाङ्ओ अ़चुसोमातुक्मादा नुलोक युङ्सानिन्चिन, खोन्कि अ़लुक्निन्ओ ह़ङ्म़ङ्ओ निम्पाङ आन्हाङ्पा येसु ख्रिस्तओ सोम्योक्मा हुङानुम। 22 मान्केङ कामुचि सोमातुक्तानुम्च़म। 23 खा-खाक्कोचि मिओ दन्दादाङ्का लावालोत्तानुम्च़म्कि लेइसानुम्च़म। खा-खाक्कोचि सोमात़योक्तुम्योम्च़म्हिदा चाप्चेत्तानिन्चिन, हेवा काचिलाम्पा म़पोप्ताओचिओ अ़चुतित्छाङ चिप्माकात्तानुम। चोन्माओ यामात्मा 24 निनाम्हाङ्आ खानानिन धाम्मादाङ्का लेन्मा ऩऱन, खोन्कि खोक्कोसोओ अ़चुसाम्स़रि थुपिमात्द़ङ्ओ तोक्पो ऩङानुमाएनान अ़चुबुदा एप्ऩमेत्तिन। 25 खोक्को अ़क्छा ओन्ङा निनाम्हाङ आन्कालेन्पा म़युङ्याङ, मो येसु ख्रिस्त आन्हाङ्पालाम्पा म़लेन। निनाम्हाङ्ओ अ़चुऩङ्लोङ्मा, तोक्पो ऩङ, सावा खोन्कि पाङ आराङ्राङ्दाङ्का ओन्ग़रि खोन्कि अ़धुन्तारि युङ्युङ्ने! मोवात्निङा लिने! |
© Wycliffe Bible Translators, Inc. All rights reserved.
Wycliffe Bible Translators, Inc.