हिब्रु 7 - बान्तावा राईमुलो काब़क्पा मल्किसेदेक 1-3 ओ मल्किसेदेक सालेम सहरादाओ हाङ खोन्कि झारादाङ्का तोक्पो निनाम्हाङ काब़क्पा ओ। मल्किसेदेक अ़ऩङ्ओ अ़तुप्माय़ङ “साम्योक्मिओ हाङ” खोन्किना सालेम्ओ हाङ्निओ, “सेवाङ्निओ हाङ”छाङ ओ। खोसोओ अ़पा, अ़मा, मात्द़ङ ना अ़सुन्तुम ना अ़पुङ्चिपुक ना ह़ङ्म़ङ्ओ अ़लुक्मा याक्याङ। मेन निनाम्हाङ्ओ अ़चुछाओ अ़चुकात्मावा खो अ़धुन्तारि काब़क्पा लियुङ। अब्राहाम हाङ्चिओ अ़चुदेङ्सालाप्पादा ङेन मुवा खोन्कि हाराचात्तुचिकि लासाङाहिदा मल्किसेदेक्आ अब्राहाम तुउ, खोन्कि आसिखा प़। खोन्कि अब्राहाम्आ ङेन्दा छोसाकि तारुचिओ झारा सामाओ दस्कालोक्दा अ़क लोक खो प़। 4 हान मिनानिन, मल्किसेदेक देम तोक्पो मुवाङा! अब्राहाम आन्सुन्तुम्आछाङ ङेन्दा छोसाकि तोक्तुओ सामाचिओ दस्कालोक्ओ अ़क लोक खो प़। 5 लेबि भुङ्दाओ काब़क म़नाचिआ अ़चुद़क्छाबुवा इस्राएचिदाङ्का दस्कालोक्ओ अ़क लोक लात्मा य़ङ्हुप्आ लोमाय़ङ अ़तोक्ता, खोन्नुछाङ मोचि अब्राहाम्ओ अ़छाचि ओ। 6 मेन मल्किसेदेक लेबि भुङ्दा मान्याक्याङ्नुछाङ अब्राहाम्एदाङ्का दस्कालोक्ओ अ़क लोक लारु, खोन्कि खोसाआ निनाम्हाङ्ओ अ़चुहिप्माय़ङ कातोक अब्राहाम आसिखा प़। 7 खोन्कि दुम्तुमाओ य़ङ दित्छाङ मात्द़ङ, अ़धिवाएदाङ्का अ़चुप्पाङ्आ आसिखा तोक्तु। 8 काब़क्चिआ कास़खात म़नाचिदाङ्का दस्कालोक्ओ अ़क लोक अ़कोप। मेन मल्किसेदेक मोचिदाङ्का तोक्पो मुवाङा, देकिनालो साम्कालिन य़ङ्याङ, अ़धुन काह़ङ मल्किसेदेक्आ दस्कालोक्ओ अ़क लोक कोउ। 9 आन्कान ओवात्निछाङ य़ङ्मा ऱन, दस्कालोक्ओ अ़क लोक अब्राहाम्आ मल्किसेदेक प़हिदा लेबिआछाङ दस्कालोक्ओ अ़क लोक मल्किसेदेक अ़पुवा। 10 देकिनालो मल्किसेदेक्आ अब्राहाम धिरुहिदा लेबि अ़सुन्तुम्ओ अ़पोक्दाङा याआङा। येसु मल्किसेदेक्वाको 11 मोवात्नि मोसाओ अ़य़ङ्हुप्आ लेबिओ अ़छाचि काब़क लिमादोत्नि य़ङ्नुछाङ मो काब़क्चिआ साङ्छाङ सेङ्मा ऩऱन। खोन्ओसा हारुन्ओ अ़खिम्लुम्पादाङ्का काब़क ताओ माआङ, आन्कान मल्किसेदेक्ओ छान्वा नि काब़क दोत। 12 मोवात्नि काब़क्पा फान्नालो य़ङ्हुप्छाङ फान्मादोत। 13 साङ्कोओ अ़तुक्वादाओ य़ङ्चि य़ङ्माय़ङ्ओ, खोक्को ना नि भुङ्दा ओ। नि भुङ्दाङ्का देम्खाछाङ ब़क्खादा ब़त्मा काचि मान्मुयुक। 14 देकिनालो मो छेङ्छेङ्छेङ्वा मुयाङ, आन्हाङ्पा यहुदाओ अ़भुङ्दाङ्का म़ताओ। खोन्कि ओ भुङ्दाङ्का काब़क्पा ताओ अ़तुक्वादा निनाम्हाङ्य़ङ खाकालु मोसा देत्छाङ मान्य़ङ्युक। 15 मल्किसेदेक्वाको नि काब़क्पा खाङ्मुनान्चिन्नालो ओ य़ङ च़लोक छेङ्छेङ्छेङ्वा लि। 16 खोक्को सुन्तुम्चिओ य़ङ्हुप खोन्कि च़माथाङ्मालाम्पा काब़क्पा म़लिसाओ माआङ, मेन देम्खाछाङ अ़लुक्निन्ओ ह़ङ्म़ङ्ओ सावालाम्पा काब़क्पा म़लिसायुङ्सा। 17 देकिनालो खोक्कोसोओ अ़चुतुक्वादा साम्कालिन य़ङ्याङ, “मल्किसेदेक्ओ अ़छान्वा खाना अ़धुन्तारिओ निम्पाङ काब़क्पा ओ।” 18 मो बुयाओ लोमाय़ङ मान्खोप्याङ खोन्कि अ़काचि मात्द़ङ्याङ्ओसा लाराखाइसायुङ्सा, 19 देकिनालो मोसाओ अ़य़ङ्हुप्आ दित्छाङ मान्तालादो। मेन मोदाङ्का च़लोक तामित्मा आन्कान्एदा याक्याङ खोन्कि ओलाम्पा आन्कान निनाम्हाङ्ओ अ़चुच़क्दा तामालामा ऱन। 20 ओ किरेलाम्पा मुमाय़ङ ओ। निनाम्हाङ्आ किरे म़चाकि बुयाओचि काब़क म़मुचिओ माआङ, 21 मेन किरे म़चाकि येसु काब़क अ़मुवाओ। निनाम्हाङ्आ खोक्को अ़लोवा, “हाङ्पा निनाम्हाङ किरे म़चायुङ्सा, खोन्कि खोक्कोसाआ अ़चुमिन्मा ऩफान्तुन, ‘खाना अ़धुन्तारिओ काब़क्पा ओ।’” 22 ओ किरेआ येसुआ निनाम्हाङ्एनान अ़नुवाक य़ङ्छ़ङ आन्कान अ़छ़ङ म़मेत्प़। 23 मोदा बुयाओ ब़द्धे काब़क्पाचि म़याआङा, खोन्कि मोचि झारा म़सुवादाओसा अ़चुकाचि मुमायुङ्मा मान्ऱअ़दा। 24 मेन येसु अ़धुन्तारि म़ह़ङ्ओसा खोक्को अ़धुन काब़क्पा म़लियुङ। 25 खोन्ओसा खोक्कोलाम्पा निनाम्हाङ्ओ अ़चुच़क्दा काताचि खोक्कोसाआ ओन्ग़रि खोन्कि अ़धुन्तारि लेन्मा म़ऱचि। देकिनालो मोचिओ अ़चुलिप्पादा निनाम्हाङ्एदा यामात्सि खोक्को अ़धुन म़ह़ङ्युङ। 26 आन्कान दोत्ओ मुलो काब़क्पा येसुङा ओ। खोक्को म़सेङ्याङ्ओ, थुपि मात्द़ङ्ओ, अ़च़क़ल़क, हेवामिचिदाङ्का अ़फेआकि निनाम्माचिदाङ्का धाना अ़झोइसा। 27 नि मुलो काब़क्पाचिआ बुया अ़चुहेवाचिओ निम्पाङ खोन्कि म़नाचिओ अ़चुहेवाओ निम्पाङ अ़लेन्खिन्तुम हेन्खोक्वा प़मायुङ्मा दोराङा। मेन येसुआ मान्दोत। खोक्को आप्पि हेन्खोक्वा म़लिसाकि म़नाचिओ अ़चुहेवाचिओ निम्पाङ खोक्कोसाआ मो काचि अ़धुन्ओ निम्पाङ अ़क्धुवा अ़मुवा। 28 य़ङ्हुप्आ मान्ऱकादा म़नाचि मुलो काब़क्पादा म़पाउचि। मेन य़ङ्हुप्दाङ्का आदेङ निनाम्हाङ किरे म़चा खोन्कि मो किरेलाम्पा खोक्कोसाआ अ़चुछा अ़धुन्तारिओ निम्पाङ तोक्पो अ़च़क़ल़क काब़क्पा अ़मुवा। |
© Wycliffe Bible Translators, Inc. All rights reserved.
Wycliffe Bible Translators, Inc.