गलाति 4 - बान्तावा राई1 अ़ङ्का य़ङ्ङाङाओसो अ़तुप्माय़ङ ओङा ओ, पाङ्कातोक देम्खातारिछाङा मु, खो झारा सामाओ अ़चुहाङ्पानुछाङ हारुक्दाङ्का निवात्नि अ़मुनिन। 2 खोन्कि अ़पाआ अ़छ़ङ मुओ ग़रितारि खो कातित खोन्कि कारात्ओ अ़पाङ्दा युङ। 3 ओवात्निङा आन्कान्छाङ ख्रिस्त तामा बुया छाचिवा मुन्येन, आन्कान हेन्खामादाओ माङ्चिओ अ़चुहारुक्दा याइन्येन। 4 मेन ग़रि तालाकि निनाम्हाङ्आ अ़चुछा अ़य़सा। खोक्को अ़क्छा मेत्छामाएदाङ्का म़पुक्तान्चिन, खोन्कि यहुदि य़ङ्हुप्ओ अ़पाङ्दा म़पुक्तान्चिन। 5 य़ङ्हुप्ओ अ़पाङ्दा कायुङ्चिओ अ़चुलुङ छोन्माकि लेन्माचि निकिना खोक्को अ़य़सा, खोन्ओसा आन्कान अ़चुछाचि लिमा ऱन्ने। 6 खानानिन निनाम्हाङ्ओ अ़चुछाचि त़लिसिन्ओसा, निनाम्हाङ्आ अ़चुछाओ अ़चुलावा आन्साकोङ्वादा म़पाक्तापुवा, मो लावाआ “अब्बा, आपो!”नि य़ङ्सा अ़बुत। 7 खोन्ओसा खानानिन हान्दाङ्का हारुक्चि माआङ, मेन खोक्कोसोओ अ़चुछाचि ओ, खोन्कि अ़चुछाचिओनालो खानानिन पाङ्कातोक्चिछाङ ओ। 8 बुया, खानानिन्आ निनाम्हाङ मान्सिन्त़युक्तुम, मोन्ग़रि खानानिन माङ्चिओ अ़चुहारुक त़मुन्येन, मोचि अ़ह़ङ माङ्चि माआङ। 9 मेन हान ना खानानिन्आ निनाम्हाङ त़सिन्तुम्युङ्सुम, माङ्लो ब़द्धे अ़च़वाङ निनाम्हाङ्आ खानानिन ऩसिन्तिन्युङ्सिन। हान देत्नि खानानिन मान्ऱकादा खोन्कि बुयाओ अ़चुप्पो लाम्चिदा त़लासिन? दि खानानिन हान्छाङ मोचिओ अ़चुहारुक लिमा त़स़न्येन? 10 खानानिन लेन्चि, दोङ्वात्चि, हिप्चि खोन्कि दोङ्चि त़मुम्योम्च़म। 11 आम्नुओ निम्पाङ अ़ङ्का मुङ्ओ अ़ङ्काचि सोज्जे लिसा निकिना अ़ङ्का अ़ङ्क़मा कात्याङ। 12 ब़ब़, नाना खोन्कि निछाचि ओ, अ़ङ्कावाङा य़ङ्हुप्दाङ्का फोङ्सानिन्नि लोनाङ्नानिन, देकिनालो अ़ङ्काछाङ खानानिन्वाङा लिसाङ्युङ्साङ। खानानिन्आ अ़ङ्का दित्छाङ अ़त्लो मान्मुत़युक्नि। 13 खानानिन त़सिन्तुम्योम, बुयाओदु अ़ङ्का नुय़ङ्खान खाएत्नानिन्हिदा अ़ङ्पोक मान्ऱयाङ। 14 अ़ङ्मान्ऱदामा आम्नुओ निम्पाङ अ़क्तात चिन्माखाङ्मा ओ, खोन्नुछाङ खानानिन्आ अ़ङ्का ऩङामान्छित्त़दाङ्ऩङ ना आम्नुओ चिप्माङा त़कात्ताङ्ऩङ, मेन निनाम्हाङ्ओ अ़क्छा अ़चुकाफा माङ्लो ख्रिस्त येसुवात्नि अ़ङ्का त़लोआङ्ऩङ। 15 मोन्ग़रिओ आम्नुओ ऩङानुमा दे लिसा? देकिनालो अ़ङ्का सालुम्स़ङ प़मा ऱङ, लिमा रुवाओनालो खानानिन्आ आम्नुओ म़क्छाङ त़लारुम्कि मो अ़ङ्का त़पुवाङ्ऩङ्ओ। 16 खोन्नालो खानानिन अ़छ़ङ लोनानिन्ओसा दि अ़ङ्का आम्नुओ ङेङ लिसाङ कि? 17 खानानिन्एदा मो म़नाचिआ अ़न्नुनु राक खाङ्अ़मु, अ़नुवाक मिन्माआ माआङ। खानानिन च़लोक आम्नुओ राक्एनान मोचि त़लोउम्च़म्ने निकिना मोचिआ आन्कान्काएदाङ्का फेक्मा ऩलाप्तिन। 18 अ़नुवाक मित्चिऩङ्ओ निम्पाङ अ़धुन राक मुमा खान्नु, मेन अ़ङ्का आम्नुओ रादा युङाङ्याङ्हिदा ओन्ङा राक मुमा अ़नुवाक अ़लिनिन। 19 सोमातुक्निङ्निओ अ़ङ्छाचि ओ, ख्रिस्तओ अ़चुच़माथाङ्मा खानानिन्एदा मान्पोन्युक्तारि हान्छाङ छातोक्मा सारिमाआ लाउओ अ़क्छा मेत्छामावात्नि अ़ङ्का दुखा तोक्ङा। 20 ओन्ग़रि खानानिन्एनान अ़क्नि युङ्ङाकि खानानिन्एनान अ़ङ्चेप्मा फान्मा ऱङ्दे देम अ़नुवाक लिसाओ, देकिनालो आम्नुओ तुक्वादा अ़ङ्का हाक्हाक्किरा लिसाङ्युङ्साङ। हागार खोन्कि सारा 21 खानानिन य़ङ्हुप्ओ अ़क़म्मादा युङ्मा कालाम्आ, अ़ङ्का लोवाङ्ऩङ, य़ङ्हुप दे य़ङ दि खानानिन त़सिन्तिमिन्येन? 22 देकिनालो छाप्तायुङ्सा, अब्राहाम्ओ ह़वाङ दुवाछा अ़छाचि युङाङाचि, अ़क्छा अ़हारुक्मालाम्पा, खोन्कि नि अ़खिम्हाङ्मालाम्पा ओ। 23 अ़हारुक्मालाम्पाओ अ़छा म़नाओ मिन्मावात्नि लिसा, मेन अ़खिम्हाङ्मालाम्पा लिसाओ अ़छा निनाम्हाङ्ओ अ़चुहिप्माय़ङ्लाम्पा। 24 ओ य़ङ अ़मात्ऩङ्वात्नि तुप्तुम। मो मेत्छामाचिआ ह्वा हिप्माय़ङ्चि खाङ्अ़मुचु। अ़क्छा सिनै भ़ऱदुङ्का हारुक्ओ निम्पाङ छा कातोक हागार ओ। 25 हागार अरब हेन्कोप्ओ सिनै भ़ऱ ओ, खोन्कि आइमित्ओ यरुसलेम्एनान तोङ्माखाङ्मा ऱम। देकिनालो मो अ़छाचिएनान हारुक्दा याक्याङ। 26 मेन फोङ्याङ्ओ मेत्छामा साराआ निनाम्मादुओ यरुसलेम खाङ्मुसु, मो आन्मा ओ। 27 देकिनालो छाप्तायुङ्सा, “छा मात्द़ङ्ओ मेत्छामा, सेवाङ्नि लुवा, छातोक्मा सारिमा मान्सिन्कादा, आम्ऩङानुयाङ्सा पारा, देकिनालो अ़खिम्हाङ्पा युङ्याङ्ओ मेत्छामादाङ्का छित्माय़ङ मेत्छामाओ अ़छाचि ब़द्धे म़युङ्याङ।” 28 हान, ब़ब़, नाना खोन्कि निछाचि ओ, आन्कान्छाङ इसहाक्वात्निङा हिप्माय़ङ्ओ अ़छाचि ओ। 29 मेन मोन्ग़रि देत्नि पोक्दाङ्का कापुक्नान्चिन्आ लावालाम्पा कापुक्नान्चिन्चि दुखा म़प़ङुचि, आइमित्छाङ मोवात्निङा मुयाङ। 30 मेन साम्कालिन दे य़ङ? ओवात्नि य़ङ, “हारुक्मा खोन्कि मोसोओ अ़छा लोइसाखाइसानुम्च़म, देकिनालो हारुक्माओ अ़छा लेत्वा मेत्छामाओ अ़छाएनान पाङ्कातोक अ़लिनिन।” 31 खोवात्निओसा, ब़ब़, नाना खोन्कि निछाचि ओ, आन्कान हारुक्माओ अ़चुछाचि माआङ, मेन लेत्वा मेत्छामाओ अ़चुछाचि ओ। |
© Wycliffe Bible Translators, Inc. All rights reserved.
Wycliffe Bible Translators, Inc.