छाम्‍माय़ङ 6 - बान्‍तावा राई

सात्‌कापाङ साम्‍भुङ काफाचि म़छेन्‍तुचिओ

¹ मो लेन्‍चिदा ख्रिस्‍त काखेङ्‌चिओ अ़चुखिप्‍मा च़लोक पोन्‌याङ्‌सा खाराङा। खोन्‍कि हिब्रु य़ङ काचेप साकोङ्‌छ़ङ कामु यहुदिचिओ अ़चुदेङ्‌सालाप्‍पादा ग्रिक य़ङ काचेप साकोङ्‌छ़ङ कामु यहुदिचि छुऩङ्‌वा म़मुवा, देकिनालो अ़लेन्‍खिन्‍तुम चामायु अ़हासाङाहिदा ग्रिक य़ङ काचेप यहुदिचिओ अ़चुमेन्‍मित्‍माचिआ तोक्‍मा दोराङाओ ओन चामायु मान्‍तोक्‌अ़दाङा।

² खोन्‍कि बारकापाङ छाम्‍माय़ङ्‌चिआ झारा काखेङ्‌चि अ़क्‍नि म़बुत्‍तुचि खोन्‍कि म़लोचि, “आन्‍कान्‍का निनाम्‍हाङ्‌ओ अ़चुय़ङ खालुमा छित्‍माकि चामायु हामा काचि मुमा अ़नुवाक अ़लिनिन।

³ खोन्‌ओसा अ़ङब़ब़, नाना खोन्‍कि निछाचि ओ, आम्‍नुओ रादाङ्‌का सेङ्‌लावाआ भेप्‍तुचिओचिकि खारु खोन्‍कि झारासाआ साया म़मेत्‍तुचिओचि सात्‌कापाङ म़नाचि छेन्‍तानुम्‍च़म। खोन्‍कि आन्‍कान्‍का मोचि ओ काचिदा पाउम्‍च़म्‍का।

⁴ खोन्‍किना आन्‍कान्‍का छाम्‍माय़ङ्‌चि यामात्‍मा खोन्‍कि निनाम्‍हाङ्‌य़ङ खालुमाकि चिन्‍मा काचिदा आन्‍काओ मिन्‍मा पाउम्‍का।”

⁵ खोन्‍कि मो अ़युङ्‌साओ य़ङ रुहुप्‌दाओ झारासाआ ऩङाअ़नुसा, खोन्‍किना मोचिआ सेङ्‌लावाआ खोन्‍कि साकोङ्‌छ़ङ्‍आ भेप्‍तुचिओचि स्‍तिफनस, फिलिप, प्रखरस, निकनोर, तिमोन, पर्मिनास, खोन्‍किना एन्‍तिओखिया सहरादाओ निरावा निकोलाउस म़छेन्‍तुचि, खो बुयाङे यहुदि साम्‌योक्‌दा वाङाचिआयुङ्‌सा।

⁶ मोचिआ मो म़छेन्‍तुचिओ म़नाचि छाम्‍माय़ङ्‌चिओ अ़चुबुदा म़तारुचि। खोन्‍किना छाम्‍माय़ङ्‌चिआ यामात्‍प़याङ्‌सा अ़चुछुक मोचिओ अ़चुताङ्‌दु म़युक्‍तुप़चि।

⁷ खोन्‍कि निनाम्‍हाङ्‌ओ अ़चुय़ङ थ़ङ्‌याङ्‌सा खाराकि काखेङ्‌चिओ अ़चुखिप्‍मा यरुसलेम्‌दा अ़न्‍नुनु पोन्‌याङ्‌सा खारा। खोन्‍कि ब़द्‍धे काब़क्‍पाचिआछाङ येसुएदा साकोङ्‌छ़ङ म़मुवा।

स्‍तिफनस अ़लावाओ

⁸ खोन्‍कि निनाम्‍हाङ्‌आ स्‍तिफनस च़लोक आसिखा अ़पुवाकि सावाआ भेप्‍तु, खोन्‍कि म़नाचिओ अ़चुरादा अ़धिवा-अ़धिवा म़दोम्‍दाओ काचिचि खोन्‍कि बुन्‌चि मुचि।

⁹ मेन अ़क लेन कुरेनि, अलेक्‍जेन्‍द्रिया, किलिकिया खोन्‍कि एसियादाओ यहुदिचिओ अ़चुयावायोक्‍खिम्‌दाओ खा-खाक्‍को लेत्‍माय़ङ यहुदि रुहुप्‌नि म़लोङुचिओचि म़ताकि स्‍तिफनस्‌एनान दुम्‍तुमा अ़पुङ्‌सा।

¹⁰ मेन स्‍तिफनस सेङ्‌लावाआ अ़न्‍नुनु खारु अ़पुवा, खोन्‍कि खो चेवाओ य़ङ मोचिआ क़प्‍मा मान्‍ऱअ़दा।

¹¹ खोन्‍किना मोचिआ खा-खाक्‍को म़नाचि सुकुलादा म़थेन्‍तुचिकि य़ङ्‌म़मेत्‍तुचि, “निनाम्‍हाङ्‌य़ङ खाकालु मोसा खोन्‍कि निनाम्‍हाङ्‌ओ अ़चुदेङ्‌सालाप्‍पादा साया पेप्‌याङ्‌सा स्‍तिफनस चेवाओ आन्‍कान्‍का एनुम्‍का।”

¹² खोन्‍किना मोचिआ म़ना मुक्‍लाचि, अ़धुवाचि खोन्‍कि य़ङ्‌हुप काचिन्‍पाचि म़थेन्‍तुचिकिना स्‍तिफनस अ़थिलाखात्‍ता, खोन्‍कि अ़लावाकि धियायोक्‍खादा अ़तारा।

¹³ खोन्‍किना मोचिआ खोसोओ अ़तुक्‌वादा सोज्‍जे सालुम्‍स़ङ काप़चि म़तारुचिकिना मोचि म़य़ङा, “ओ म़नाआ सेङ्‌याङ्‌ओ निनाम्‍हाङ ब़क्‍खाखिम्‌ओ खोन्‍कि निनाम्‍हाङ्‌य़ङ खाकालु मोसाओ अ़य़ङ्‌हुप्‌ओ अ़देङ्‌सालाप्‍पादा देम्‍खाछाङ चेप्‍मा मान्‍छित्‌युक्‍तु।

¹⁴ देकिनालो ‘नासरत्‌ओ येसुआ ओ निनाम्‍हाङ ब़क्‍खाखिम अ़भुङ्‌खान, खोन्‍कि निनाम्‍हाङ्‌य़ङ खाकालु मोसाआ आन्‍कान म़पुवाओ च़माथाङ्‌माचि म़फान्‍प़’नि खो य़ङाओ आन्‍कान्‍का एनुम्‌युङ्‌सुम्‍का।”

¹⁵ मोन्‍ग़रि झारा धियायोक्‍खादा कायुङ्‌चिआ स्‍तिफनस्‌एह्‍यात्‍नि नुलोक अ़चोवाङा, खोन्‍कि मोचिआ खोसोओ अ़ङाइवा निनाम्‍हाङ काफाओ अ़ङाइवावाङा लिसाओ अ़खा।