छाम्माय़ङ 16 - बान्तावा राईपावल खोन्कि सिलास्एनान तिमोथि काचिदा वाङाओ 1 पावल खोन्कि सिलास दर्बिदा खोन्किना लुस्त्रादाछाङ खाराचि। मोदा तिमोथि अ़ऩङ मुवाङाओ अ़क्छा येसु काखेङ युङाङा। खो अ़क्छा साकोङ्छ़ङ कामुमा यहुदि मेत्छामाओ अ़दुवाछा छाओ, मेन खोसोओ अ़पा ग्रिक ओ। 2 लुस्त्रा खोन्कि आइकोनियन्दाओ साकोङ्छ़ङ कामुचिआ तिमोथि अ़नुवाक म़नानि अ़लोवाङा। 3 पावल्आ तिमोथि अ़क्नि खात्मानि मित्तु, खोन्ओसा खोसाआ मोचिदा कायुङ यहुदिचिआ फित्चि ऩमुन्ने निकिना खो सिप्मायाम्बुन पाक्तु। देकिनालो मोचिदा कायुङ झारा यहुदिचिआ तिमोथिओ अ़पा ग्रिक ओ निकिना अ़सिन्ताङा। 4 खोन्किना खोचि सहरा-सहरा खाराचिकि खोचिआ यरुसलेम्दाओ छाम्माय़ङ्चिआ खोन्कि ताङ्पाचिआ अ़छ़ङ अ़मुवाओ य़ङ्हुप्चिवा निरावा साकोङ्छ़ङ कामुचिआ च़मादोत्नि खाअ़एत्ताचुचिन। 5 खोन्ओसा साम्भुङ्चिदाओ म़नाचिओ अ़चुसाकोङ्छ़ङ पोया, खोन्कि अ़लेन्खिन्तुम अ़चुखिप तेप्याङ्सा खारा। पावल्आ त्रोआस सहरादा खाओ सेन्चि 6 सेङ्लावाआ एसियादा नुय़ङ्खान खाएत्मा मान्प़म़दोचिओसा खोचि फ्रिगिया खोन्कि गलातिया धिखाहुप लियाङ्सा म़खारा। 7 माइसियाओ अ़च़क्दा म़तालाकि खोचि बिथिनिया धिखाहुप्ह्यात्नि खात्मानि म़मिना। मेन येसुओ अ़चुलावाआ खोचि खात्मा मान्प़म़दोचि। 8 खोन्ओसा माइसिया लियाङ्सा खोचि त्रोआस सहरायु म़धा। 9 खोन्कि मो अ़खाखुत पावल्आ अ़सेन्चिदा खा, माकेदोनियादाओ अ़क्छा म़ना एवाकि खो “माकेदोनियादा बानानिन्कि आन्कान्का फानि”नि बुत्तुङु। 10 पावल्आ सेन्चि खाचिउकि निनाम्हाङ्आ मोदा नुय़ङ्खान म़नाचि खाएत्सि निकिना ऩबुत्तिन्येन्काओ आन्कान्का अ़छ़ङ मुम्काओसा च़क्नि माकेदोनियाह्यात्नि खात्मा निकिना चुम्सिन्चिन्का। लिदियाओ साकोङ्छ़ङ 11 त्रोआस्दा वाप्तेलादा वाङिन्काकि आन्कान्का सामोथ्राकेह्यात्नि खात्निछाङ मान्वाङ्माङ खारिन्का। खोन्कि अ़माङ्कोलेन नियापोलिस सहरादा तालान्का। 12 खोन्कि मोदाङ्का फिलिप्पिदा तान्लान्का। ओ माकेदोनियाओ अ़मुलो सहराकिना रोमिचिओ अ़चुपाङ्दाछाङ याआङा। आन्कान्का मो सहरादा अ़क्चित्कालेन युङिन्का। 13 यहुदि सावातोम्खा-लेन सहरादा वाङ्खा लाम्ओ बुङ्खाया याङ्वामाओ अ़केम्दा आन्कान्का खारिन्का, मोदा यामात्खा ओ हे नि आन्कान्का मिनिन्का। खोन्कि आन्कान्का युङिन्काकि मोदा म़कोवान्युङ्सान्चिन्ओ मेत्छामाचिएनान येसुओ अ़चुतुक्वादा हान्मा पुक्तुम्का। 14 मोचिएदाओ थिआतिरा सहरादा कायुङ्मा लिदिया अ़ऩङ मुवाङाओ अ़क्छा निरावा मेत्छामा याआङा, मो ब़द्धे अ़लुङ छुक्ताङाओ तित इनाङा। मोसाआ निनाम्हाङ ब़क्तुङु। हाङ्पाआ मोसोओ अ़साकोङ्वा अ़होत्तापुवाओसा पावल चेवाङाओ य़ङ नुलोक तुप्तु। 15 लिदिया खोन्कि अ़खिम्दाओ झारा बप्तिस्मा म़प़चि, खोन्किना मोसाआ, “खानानिन्आ अ़ङ्का हाङ्पा साकोङ्छ़ङ कामुमानि त़मित्ङाऩङ्नालो अ़ङ्खिम्दा बानानिन्कि युङानिन्नाङ”नि य़ङ्याङ्सा आन्कान्का अ़बुत्तिन्का। खोन्कि मोसाआ आन्कान्का राकाङ्थेत्नि अ़मुन्खातिन्का। पावल खोन्कि सिलास छेक्खाखिम्दा 16 खोन्किना अ़क्लेन आन्कान्का यामात्खादा खारिन्येन्काहिदा आन्कान्का चाकावालावाआ लाउओ अ़क्छा हारुक्मा मेत्छाछाएनान तुइन्का। मो खालाह़याङ्सा मोसोओ अ़हाङ्पाचि ब़द्धे फेक्वा दुप्तुप़ङुचि। 17 मोसाआ पावल खोन्कि आन्कान्का आन्काओ देङ-देङ त़ङ्याङ्सा, “ओ म़नाचि झारादाङ्का तोक्पो निनाम्हाङ काब़त्पचि ओ! ओचिआ खानानिन लेत्खालाम खाऩएत्तिन”नि य़ङ्याङ्सा पारा। 18 खोन्कि मो ब़द्धेकालेन्तारि मोवात्निङा चुवायुङ्सा। मेन पावल्ओ अ़नाप्मा लुवाकि मो चाकावालावाआ लाउओएह्यात्नि हुसान्चिन्कि लो, “येसु ख्रिस्तओ अ़चुऩङ्दा अ़ङ्का खाना लोनाङ्ना, ओ मेत्छाछाएदाङ्का लोन्ताखारा!” खोन्कि मोन्ग़रिङा चाकावालावाआ मो मेत्छाछा छिरुदो। 19 मेन मोसोओ अ़हाङ्पाचिआ अ़चुछेन्बि दुप्खा लाम सुवाओ अ़खाकि पावल खोन्कि सिलास म़लाउचिकि सहरादाओ बजारादाओ छाप्छेन्मिचिओ अ़चुबुदा मोचि म़सारुखात्तुचि। 20 खोन्कि मोचिआ रोमि हाङ्काचि कामुचिएदा म़तारुचिकि, “ओ म़नाचि ना यहुदिचि ओ, खोन्कि ओचिआ आन्सहरादाओ म़नाचि अ़चोङ्चुङ्चुचिन। 21 ओचिआ आन्कान रोमिचिओ च़माथाङ्माओ देङ्सालाप्पादा म़नाचि काचिचि मुमा अ़चिन्चुङ्चुचिन” आन्कान मो लोक्मा माङ्लो मो च़माथाङ्माचि मुमा अ़ऱन्मिन। 22 खोन्कि म़ना मुक्लाचि म़तोङाकि पावल खोन्कि सिलास म़झोम्तुचि। सहरादाओ हाङ्काचि कामुचिआ मोचि अ़चुकालाङ्द़क मुम़मेत्तुचिकि य़हुप पाक्म़मेत्तुचि। 23 खोन्कि खोचिआ मोचि चाअ़त्लो म़धात्तुचि, खोन्किना खोचि छेक्खाखिम्दा म़छेक्तुचि। खोन्कि छेक्खाखिम काखाङ “ओचि नुलोक खाचि”नि अ़लोवा। 24 ओवात्नि अ़लोवाकि खोसाआ खोचि छेक्खाखिम्ओ अ़कोङ्हुत्या वाक्तुचिकि मोचिओ अ़चुलाङ्दा थेङ्गुरि धाप्तुचिकि युङ्सुचि। 25 अ़दाक्वा खाखुत्दात्नि पावल खोन्कि सिलास यामात्याङ्सा निनाम्हाङ्ओ अ़चुसाम्ऱङ अ़लुवाङाचु। खोन्कि नि म़छेक्ताङाओ म़नाचिआ अ़एनाङा। 26 खोन्कि म़प्च़क़क्दा अ़धिवा लुत्लि खाराकिना छेक्खाखिम्ओ अ़छ़ङ्चि म़ङाङ्सा। मोन्ग़रिङा झारा लाप्तिखोप्चि म़होरा, खोन्कि झारा म़छेक्ताङाओ म़नाचिओ अ़चुछुम्खाचि म़फोङ्साखारा। 27 खोन्किना छेक्खाखिम काखाङ अ़दुखुप्दाङ्का थिन्तालोन्ता, खोन्कि छेक्खाखिम्दाओ लाप्तिखोप्चि म़होराङाओ खाचिकि म़छेक्ताङाओ म़नाचि झारा म़फुङ्साचिआनि मिनाकिना आप्पि सेत्मान्चिन निम्पाङ खोसाआ अ़बान्छोन लारु। 28 मेन पावल्आ पात्याङ्सा, “खानानिन मान्सेत्दानिन्चिन! देकिनालो आन्कान्का झारा ओदाङा युङिन्येन्का!”नि लो। 29 खोन्कि छेक्खाखिम काखाङ्आ खाउप्खा दोरुकि खो छेक्खाखिम्हुत्या लोरावाङा, खोन्कि अ़क़माआ धुन्याङ्सा पावल खोन्कि सिलास्ओ अ़चुबुदा बोम्सान्चिन। 30 खोन्किना खोसाआ बुङ्खाया लोत्तुचिकि खोचि सेनुचि, “अ़धुवाचि ओ, अ़ङ्का लेत्मा दे च़मादोत?” 31 खोन्कि खोचिआ अ़लासालोवाचु, “हाङ्पा येसुएदा साकोङ्छ़ङ मुवा, खाना खोन्कि आम्खिम्दाओचि त़लेरिन।” 32 खोन्किना खोचिआ खो खोन्कि खोसोओ झारा अ़खिम्दा कायुङ्चि हाङ्पा येसुओ अ़चुय़ङ खाअ़एत्ताचुचिन। 33 खोन्कि मो खाखुत्ङा खोसाआ मोचि खात्तुचिकि अ़चुखोवाचि वास़त्तुप़चि। खोन्किना खोसोओ झारा अ़खिम्दाओचिआ मोन्ग़रिङा बप्तिस्मा म़लोआ। 34 खोन्किना छेक्खाखिम काखाङ्आ पावल खोन्कि सिलास अ़खिम्दा खात्तुचिकि चामायु खोचिओ अ़चुबुदा युक्तुचि। निनाम्हाङ्एदा साकोङ्छ़ङ मुवाओसा खो खोन्कि झारा अ़खिम्दाओचिओ अ़न्नुनु अ़चुऩङानुवा। 35 मेन खादाराकि रोमिचिओ अ़चुहाङ्काचि कामुचिआ “मो म़नाचि लेराखाइसानुम्च़म!”नि लोसि रात्खामि अ़धुवाचि छेक्खाखिम काखाङ्एदा म़छुत्तुचि। 36 खोन्किना छेक्खाखिम काखाङ्आ पावल लो, “खाना खोन्कि सिलास लेत्मा निकिना रोमि हाङ्काचि कामुचि म़य़ङाबाइसायुङ्सा। खोन्ओसा हान नुलोक लोन्ताचिकि खाराचि।” 37 मेन पावल्आ मो रात्खामिचि लोचि, “आन्काच्या रोमि ताङ्युङ्नुछाङ खोचिआ छ़ङ मान्छेन्प़माङ म़नाचिओ अ़चुबुदा आन्काच्या ऩधात्ताच्या, खोन्कि छेक्खाखिम्दा आन्काच्या ऩछेक्ताचिया। खोन्कि ओन्ग़रि दि आन्काचिया वाइवेत लोन्मा ऩलाप्चिङ्च्या? ओवात्नि अ़नुनिन! हाङ्काचि कामुचिङा म़ताने खोन्कि आन्काच्या ऩलोन्चियाने।” 38 पावल्आ लोचिओ य़ङ रात्खामिआ अ़चुहाङ्काचि कामुचि खाम़एत्तुचि। पावल खोन्कि सिलास रोमि ताङ्युङ्चिनि अ़एनाकि मोचि म़क़सा। 39 खोन्किना मोचि म़ताकि पावल खोन्कि सिलास्एदा लेत्प़म़लुवा। खोन्कि खोचि छेक्खाखिम्दाङ्का बुङ्खाया म़लोत्तुचिकि “सहरा छित्निदानिप़नि”नि म़लोचि। 40 पावल खोन्कि सिलास छेक्खाखिम्दाङ्का बुङ्खाया लोन्ताचिकि लिदियाओ अ़खिम्दा खाराचि। खोन्कि मोदा साकोङ्छ़ङ कामुचिएनान म़तुवाकि मोचि राक अ़पुवाचुचिन खोन्किना म़हासान्चिन। |
© Wycliffe Bible Translators, Inc. All rights reserved.
Wycliffe Bible Translators, Inc.