छाम्माय़ङ 15 - बान्तावा राईयरुसलेम्ओ यायोक रुहुप 1 खा-खाक्को म़नाचि यहुदियादाङ्का एन्तिओखियादा म़ताकि काखेङ्चि “निनाम्हाङ्य़ङ खाकालु मोसाओ अ़य़ङ्हुप्वा सिप्मायाम्बुन त़मुन्मिन्नालो ना खानानिन त़लेरिमिन”नि साकोङ्छ़ङ कामुचि म़चिन्तुचि। 2 पावल खोन्कि बारनाबास मो य़ङ्दा मोचिएनान मान्तोङ्चिकि चाअ़त्लो दुम तुसाचि। खोन्ओसा मोदाओ साकोङ्छ़ङ कामुचिआ आदेङ पावल खोन्कि बारनाबास्किना निचिछाङ ओ सेन्माय़ङ्ओसो अ़तुक्वादा छाम्माय़ङ्चि खोन्कि ताङ्पाचिएनान यायोक्सि यरुसलेम खान्माचि निकिना म़छेन्तुचि। 3 खोन्किना साम्भुङ्दाओचिआ खोचि मोदाङ्का म़छुत्तुचि। खोचि फोनिके खोन्कि सामरिया लियाङ्सा म़खाराङाहिदा निरावाचिआछाङ निनाम्हाङ अ़लोआओ य़ङ मोचि खाम़एत्तुचि। मो य़ङ्आ मोदाओ झारा साकोङ्छ़ङ कामुचिओ अ़न्नुनु अ़चुऩङानुवा। 4 खोचि यरुसलेम सहरादा म़तालाहिदा झारा साम्भुङ्दाओचिआ खोन्कि छाम्माय़ङ्चिकिना ताङ्पाचिआ साऩङ्वा म़मेत्तुचि। निनाम्हाङ्आ पावल खोन्कि बारनाबास्लाम्पा अ़मुवाओ झारा काचिचिओ अ़तुक्वा खोचिआ मोचि खाअ़एत्ताचुचिन। 5 मेन फरिसि रुहुप्दाओ देम्कापाङ येसु साकोङ्छ़ङ कामुचि म़एवाकि, “साकोङ्छ़ङ कामु निरावाचिआछाङ सिप्मायाम्बुन पाक्माङादोत। खोन्कि खोचिआ निनाम्हाङ्य़ङ खाकालु मोसाओ अ़य़ङ्हुप्वा च़मादोत”नि म़य़ङा। 6 छाम्माय़ङ्चि खोन्कि ताङ्पाचि ओ य़ङ्ओ अ़तुक्वादा तुप्मा निकिना म़कोवान्चिन। 7 ब़द्धे दुम अ़तुसाचिआकि पत्रुस पुवालोन्ताकि मोचि लोचि, “ब़ब़, नाना खोन्कि निछाचि ओ, खानानिन त़सिन्तुम्योम्ङा, बुयाङा अ़ङ्दोदाङ्का निरावाचिआ नुय़ङ्खान अ़एन्कि साकोङ्छ़ङ म़मुने निकिना आम्नुओ रादाङ्का अ़ङ्का निनाम्हाङ्आ ऩछेन्ताङ। 8 आन्साकोङ्वादाओ य़ङ कासिन निनाम्हाङ्आ निरावाचिछाङ आन्कान म़पुवावाङा सेङ्लावा म़प़चिकि खोक्कोसा मोचि म़लोउचिओ काचि खाङ्अ़मुसा। 9 निनाम्हाङ्आ आन्कान यहुदिचि खोन्कि निरावाचि मान्हाम़दोचि, देकिनालो येसुएदा साकोङ्छ़ङ म़मुवाकि मोचिओ अ़चुसाकोङ्वा म़सेङ्सुप़चि। 10 खोन्ओसा येसु साकोङ्छ़ङ कामु निरावाचिआ खुन्मा ऩऱन्ओ पाङ खानानिन खुन्त़मेत्तुम्च़म्कि देकि निनाम्हाङ्ओ अ़चुमाइसुङ त़काइसुम? ना मो आन्सुन्तुम्चिआ खुन्मा अ़रुवा ना आन्कान्ङा खुन्मा ऱम। 11 आन्कान साकोङ्छ़ङ मुन्कि आन्हाङ्पा येसुओ अ़चुसोमातुक्मालाम्पा आन्कान लेरिन्युङ्सिन, मोवात्निङा निरावाचिछाङ म़लेरायुङ्सा।” 12 खोन्किना म़कोवान्चिन्ओ झारा म़नाचि वाइवेत म़युङा, खोन्कि निरावाचिओ अ़चुरादा खोचिलाम्पा बुन्चि खोन्कि म़दोम्दाओ काचिचि निनाम्हाङ्आ अ़मुवाओ अ़तुक्वादा बारनाबास खोन्कि पावल्आ खाअ़लुसाचुओ खोचिआ अ़एना। 13 खोचि चेवाचिआचिकिना याकुब पुवालोन्ताकि लासुलोचि, “ब़ब़, नाना खोन्कि निछाचि ओ, अ़ङ्य़ङ एनानुम! 14 निनाम्हाङ्आ बुयाओदु निरावाचि सोमाम़तुक्तुचिकि देत्नि मोचिएदाओचि खोसोओ निम्पाङ म़नाचि म़छेन्तुचि, मोसोओ अ़तुक्वादा सिमोन्आ आन्कान खाम़एत्तायुङ्सा। 15 खोन्कि निनाम्हाङ्य़ङ खाकालुचिओ अ़चुय़ङ्ओ य़ङ्एनान तोङ। साम्योक्मि छाप्लाखादा ओवात्नि छाप्याङ: 16 ‘माय़ङ अ़ङ्का लाङाय़ङा, खोन्कि दाउद्ओ धुवाखाराओ अ़हाङ्होन लासुङ्प़ङ, खोन्कि भुङ्साखाराओदाङ्का लासुङ्मेत्तुङ्प़ङ। 17 खोन्किना म़हेनाओ म़नाचिआ निनाम्हाङ पापा अ़लाम, खोन्कि झारा निरावाचि अ़ङ्को लिसि बुत्तुङ्युङ्सुङ्च़ङ, मो म़नाचिआ अ़ङ्का ऩलाम्ङा। 18 निनाम्हाङ्आ ब़द्धे बुयाङा ओ य़ङ्चि खाअ़लुसायुङ्सा।’ 19 खोन्ओसा अ़ङ्का ओवात्नि मिन्ङाङा, निनाम्हाङ्एदा काता निरावाचि आन्कान दुखा अ़प़न्चिमिन्ने। 20 मेन मोचि ‘सेम्पोक हेन्खोक्वा दात्माय़ङ चामायु चामा, ताङ्लान मुमादाङ्का खोन्कि अ़पोत्दा पिन्मासेत्माय़ङ सायाम्पोक्ओ अ़सा चामा खोन्कि अ़ह़ चामादाङ्का अ़थाया युङानिन’निकिना आन्कान छाप्तुम हान्तुम्च़म्ने। 21 देकिनालो निनाम्हाङ्य़ङ खाकालु मोसाओ अ़य़ङ्हुप ना आराङ्दाङ्काङा झारा सहरादाओ यहुदि यावायोक्खिम्चिदा झारा सावातोम्खा-लेन्दा अ़खिप्ताङा।” साकोङ्छ़ङ कामु निरावाचिओ निकिना छाप्लावा 22 खोन्किना छाम्माय़ङ्चिकि ताङ्पाचि खोन्कि यरुसलेम साम्भुङ्दाओ झारा म़नाचि म़तोङाकि अ़चुरादाङ्का पावल खोन्कि बारनाबास्एनान एन्तिओखियादा देम्कापाङ म़नाचि खान्मा अ़छ़ङ अ़मुवा। खोचिआ बारसाबास्नि लोवाङाओ यहुदा खोन्कि सिलास म़छेन्तुचि। खोचि मो साकोङ्छ़ङ कामुचिएदाओ बुसुवाचि ओ। 23 खोन्कि खोचिआ मोचिलाम्पा ओवाको छाप्लावा अ़खाइसा: “एन्तिओखिया, सिरिया खोन्कि किलिकियादा कायुङ साकोङ्छ़ङ कामु निरावा ब़ब़, नाना खोन्कि निछाचिएदा, आन्कान्का आम्नुओ ब़ब़, निछा छाम्माय़ङ्चि खोन्कि ताङ्पाचिदाङ्काओ नुकोङ्ला सेवा! 24 आन्कान्का एनुम्युङ्सुम्का, आन्कान्काएदाओ खा-खाक्कोचि खानानिन्एदा म़बानाकि दुखा अ़चुचिन्माय़ङ्आ आम्नुओ मिन्मा चाअ़त्सालो ऩमेत्तिन्प़न्नि। मेन मोचि आन्कान्का मोवात्नि लोमेत्तुम्च़म्काओ माआङ। 25 खोन्ओसा आन्कान्का झारा अ़क्नि तोङिन्का, खोन्कि म़नाचि छेन्तुम्च़म्काकि मोचि आन्कान्का सोमातुक्तुम्योम्च़म्काओ यावाचि बारनाबास खोन्कि पावल्एनान अ़क्नि खानानिन्एदा बान्मा अ़छ़ङ मुम्का। 26 बारनाबास खोन्कि पावल आन्हाङ्पा येसु ख्रिस्तओ निम्पाङ स़माछाङ मान्क़चिङ्चि। 27 खोन्ओसा आन्कान्का यहुदा खोन्कि सिलास खानानिन्एदा बाइसुम्योम्च़म्का। आन्कान्का छाप्तुम्च़म्काओ य़ङ्चि खोचिआ अ़चुदोआछाङ खाऩएत्तिन। 28 ह्युना म़छाप्याङ्ओदाङ्का नि ब़द्धे पाङ खानानिन खुन्मेत्मा अ़नुनिन निकिना सेङ्लावा खोन्कि आन्कान्का अ़नुवाक लुन्का। 29 खानानिन सेम्पोक हेन्खोक्वा दात्माय़ङ चामायु चामा खोन्कि अ़ह़ चामा खोन्कि अ़पोत्दा पिन्मासेत्माय़ङ सायाम्पोक्ओ अ़सा चामा खोन्कि ताङ्लान मुमादाङ्का अ़थाया युङानिन। ओ य़ङ्हुप्चि त़मुम्च़म्नालो नुलोक खानानिन त़लिसिन। हासिन्चिन्ने।” 30 खोन्किना खोचि म़हासान्चिन्कि मो चारकापाङ यरुसलेम्दाङ्का एन्तिओखियायु म़धा, खोन्कि साम्भुङ्दाओ म़नाचि म़कोउचिकि मो छाप्लावा म़प़चि। 31 मो छाप्लावादाओ राक प़माय़ङ य़ङ्खान अ़खिप्ताकि मोचिओ अ़चुऩङानुवा। 32 यहुदा खोन्कि सिलास ह़वाङ्माङ निनाम्हाङ्य़ङ खाकालुचिओसा खोचिआ साकोङ्छ़ङ कामुचि ब़द्धे निनाम्हाङ्य़ङ्लाम्पा राक अ़पुवाचुचिन, खोन्कि अ़चुसाकोङ्छ़ङ अ़पोइसापुवाचुचिन। 33 खोचि एन्तिओखियादा अ़क्चित लेन युङाचि। खोन्कि मो साकोङ्छ़ङ कामु म़नाचिआ “निनाम्हाङ्आ लाम्दा नुलोक ऩरात्चिखात्चिने”नि म़लोचिकि खोचि काबान्चिएह्यात्नि म़लासुखाइसुचि। [ 34 मेन सिलास मोदाङा युङ्मानि मिना।] 35 पावल खोन्कि बारनाबास्आ हाङ्पाओ अ़चुय़ङ मोदाओ नि ब़द्धेकापाङ्चिएनान म़तोङाकि चिन्याङ्सा खोन्कि खालुयाङ्सा एन्तिओखियादाङा युङाचि। पावल खोन्कि बारनाबास हासाचिचिन्ओ 36 अ़क्चित्कालेन्कि पावल्आ बारनाबास लो, “आन्काचि बुया हाङ्पाओ अ़नुय़ङ्खान खालुसाचुओ मो झारा सहराचिदात्नि लाचिखात्चिने, खोन्किना अ़ऩङ्वा साकोङ्छ़ङ कामु ब़ब़, निछाचि देत्नि म़मुयाङ, मोचि तुप्चुचिने।” 37 बारनाबास काङ्सा खोन्कि खोसाआ मर्कुस्नि लोवाङाओ युहन्नाछाङ अ़क्नि खात्मानि मित्तु। 38 मेन पावल मर्कुस अ़क्नि खात्मा छुन्ता, देकिनालो खोसाआ पाम्फिलियादा काचि मान्चिन्माङ्ङा खोचि छिरुदोचिओ। 39 पावल खोन्कि बारनाबास चाअ़त्लो दुम तुसाचि, खोन्ओसा खोचि अ़क्छा निएदाङ्का फेआचिचिन। बारनाबास्आ मर्कुस अ़क्नि खात्तुकि साइप्रस खारा। 40 मेन पावल्आ सिलास छेन्तु, खोन्किना साकोङ्छ़ङ कामुचिआ निनाम्हाङ्ओ अ़चुछुक्दा म़लेत्तुछोक्तुचि, खोन्कि खोचि म़छुत्तुखाइसुचि। 41 खोन्किना खोचि सिरियाकिना किलिकिया लियाङ्सा खाराङाचिहिदा खोचिआ मोदाओ साम्भुङ्चि राक अ़पुवाचुचिन। |
© Wycliffe Bible Translators, Inc. All rights reserved.
Wycliffe Bible Translators, Inc.