२ कोरिन्थि 5 - बान्तावा राईनिनाम्मादुओ आन्युङ्खा 1 खोन्कि आन्कान सिन्तुम्योम, आन्को ओ हेन्खामादाओ आन्पोक लुक्खात्नुछाङ निनाम्मादु निनाम्हाङ्आ म़पुवाओ आन्खिम, माङ्लो अ़धुन्तारि युङ्युङ्ओ आन्पोक युङ्याङ, मो छुक्आ मुवाओ माआङ। 2 ओदा अ़नुछ्या आन्कान ह़त्पा लुन्येन, खोन्कि निनाम्मादुओ खिम तोक्मा स़न। 3 देकिनालो ओसाआ आन्कान म़दिप, खोन्ओसा आन्लावा पोक मात्द़ङ्ओवाको अ़कालाङ्द़क अ़मुनिन। 4 देकिनालो आन्कान्का ओ पोक्दा युङिन्येन्काहिदा मिन्मा चाअ़त्माआ आन्कान्का ह़त्पा लुन्का, आन्कान्का आन्काओ कालाङ्द़क लिसिन्काने निम्पाङ माआङ, मेन च़लोक दिप्तिन्चिन्काने निकिना ओ। खोन्ओसा दि स़दाओ मुयाङ, मो ह़ङ्म़ङ्दा फान्नान्चिन्ने। 5 आन्कान्का ओ स़दाओ पोक्दाङ्का अ़स़निन्दानिन्ओ ह़ङ्म़ङ काचुम्प़ निनाम्हाङ ओ। खोक्कोसाआ चिनोयाङ्वात्नि सेङ्लावा आन्कान्का ऩप़न्युङ्सिन्का। 6 खोन्ओसा आन्कान्का सिन्तुम्योम्का, आन्कान्का देम्खातारि आन्काओ पोक्दा युङिन्का, खो बेन्तारि हाङ्पाएनान अ़तुइमिन्का। खोन्नुछाङ आन्कान्का अ़धुन नुलोक सोम्कुवा मुन्का। 7 देकिनालो आन्कान्का सोम्कुवालाम्पा कोलिन्का, दात्याङ्ओलाम्पा माआङ। 8 आन्कान्काएदा झारा सोम्कुवा याक्याङ, हान पोक्दाङ्का फेक्मान्चिन्कि हाङ्पाएनान युङ्मा आन्कान्का स़न्का। 9 खोन्ओसा आन्कान्का आन्काओ पोक्दाङा युङिन्काने माङ्लो अ़थाया युङिन्काने, खोक्कोसोओ अ़चुऩङानुमा आन्काओ मित्चिऩङ मु। 10 देकिनालो आन्कान झारा ख्रिस्तओ अ़चुछ़ङ्छेन्खाओ अ़बुदा एप्माङादोत, ओवात्नि आन्पोक्दा युङिन्येन्हिदा आन्कान मुम्ओवा झारासाआ अ़नुवाक माङ्लो अ़अ़त्पाओ अ़सिवा तोक्तुम। ख्रिस्तलाम्पा निनाम्हाङ्एनान तोङ्मा 11 खोन्ओसा, निनाम्हाङ्एनान देत्नि क़मादोत्नि आन्कान्का सिन्तुम्काकिना आन्कान्का म़नाचि काङ्मेत्तुम्च़म्का। मेन आन्कान्का देत्नि मुन्येन्का निनाम्हाङ्आ अ़सिन्याङ, खोन्कि अ़ङ्का सोम्कुवा मुङा, मो आम्नुओ छेन्खातायाआछाङ नुलोक्ङा सिन्तुङु। 12 आन्कान्का आप्पि आम्नुओ बुदा अ़लासिन्चोन्तिन्चिमिन्का, मेन खानानिन आन्कान्काएदा आम्नुओ ऩङानुमान्चिन्ओ अ़वाखाम प़निङ्नि। खोवात्निओसा खानानिन्आ साकोङ्वाहुत्दाओ य़ङ्दा माआङ, मेन बुङ्खालिप्पादा दात्ओ काचिदा तोक्पो कालिचिओ अ़चुय़ङ लामा त़ऱम्च़म। 13 आन्कान्का हिम्सावानि ऩमित्तिन्कानालो मो निनाम्हाङ्ओ निम्पाङ ओ, खोन्कि आन्कान्का अ़हिम्सिमिन्येन्कानालो ओ आम्नुओ निम्पाङ ओ। 14 ख्रिस्तओ अ़चुसोम्तुक्माआ आन्कान्का अ़क़म्तिन्का। आन्कान्का ओ सिन्तुम्युङ्सुम्का। झारासोओ निम्पाङ अ़क्छा म़सुवा, खोन्ओसा, झारा म़सुवायुङ्सा। 15 ओवात्नि, ख्रिस्त आन्कान झारासोओ निम्पाङ म़सुवा। खोन्ओसा साङ आप्पिओ निम्पाङ ह़ङ, मो हान्दाङ्का आप्पिओ निम्पाङ माआङ, मेन आन्कान झारासोओ निकिना कास़ खोन्कि म़सुवाओदाङ्का म़लासाखोन्तालोन्ताओसो निम्पाङ आन्कान ह़ङ्मादोत। 16 खोन्ओसा हान्दाङ्का आन्कान्का साङ्आछाङ म़नाओ अ़मिन्मावा अ़खान्मिन्का। आन्कान्का ख्रिस्त अ़क्दु म़नाओ अ़मिन्माआ खाम्का ओ, हान्दाङ्का ओवात्नि अ़खान्मिन्का। 17 देकिनालो साङ ख्रिस्तदा युङ्याङ, खो अ़ऩङ्वा मुन्माय़ङ ओ। बुयाओ खाराचिआयुङ्सा, खानुम, अ़ऩङ्वा तायुङ्सा। 18 ओ झारा निनाम्हाङ्एदाङ्का ओ। खोक्कोसाआ आन्कान ख्रिस्तलाम्पा खोक्कोएनान म़लासातोङ्सा, खोन्कि आन्कान्का नि म़नाचिएनान खोक्कोएदा लामातोङ्माओ काचि ऩप़न्का। 19 ओवात्नि, निनाम्हाङ ख्रिस्तएदा म़लिसाकि हेन्खामादाओ म़नाचि खोक्कोएदा म़लासुतोङ्सुतारुङुचि। मोचिओ अ़चुहेवाओ अ़फान मान्लात्माङ, लामातोङ्मा काचिओ य़ङ्खान खोक्कोसाआ आन्कान्का ऩप़न्युङ्सिन्का। 20 खोन्ओसा आन्कान्का ख्रिस्तओ अ़चुओ हाङ्कोङ्पिचि ओ, खोन्कि निनाम्हाङ आन्कान्कालाम्पा म़य़ङ्याङ। आन्कान्का ख्रिस्तओ अ़चुलिप्पालाम्पा खानानिन लोनिङ्नि, निनाम्हाङ्एनान लासातोङानिन। 21 खोन्ओसा आन्कान खोक्कोएदा निनाम्हाङ्आ अ़नुवाक कान्मा म़ऱने निम्पाङ हेवाङा मान्मुकादा ख्रिस्त निनाम्हाङ्आ आन्को निम्पाङ हेवाओ हेन्खोक्वा अ़मुवा। |
© Wycliffe Bible Translators, Inc. All rights reserved.
Wycliffe Bible Translators, Inc.