२ कोरिन्थि 2 - बान्तावा राई1 खानानिन दुखा मान्प़दामा निम्पाङ मान्लामाबान्मा अ़ङ्का अ़छ़ङ मुङ। 2 देकिनालो अ़ङ्का आम्नुओ राक स़लो मुनानिन्नालो अ़ङ्का अ़राक स़लो मुङ्ओ मो म़नाएदाङ्का नि साङ्आ अ़ङ्का अ़ङ्ऩङानुलो अ़मुङा कि? 3 मेन अ़ङ्का दिसु य़ङ छाप्तुङ, मो ओ मिन्माआ छाप्तुङ, अ़ङ्का बान्ङाहिदा साङ्चिलाम्पा अ़ङ्का सेवाङ्नि लिमा दोराङा, मोचिलाम्पा अ़ङ्राक अ़स़निन्ने। देकिनालो अ़ङ्सेवाङ्नि खानानिन झारासोओ सेवाङ्नि लि निकिना खानानिन झाराएदा अ़ङ्सोम्कुवा याआङा। 4 आम्नुओ राक सेत्मा माआङ, मेन खानानिन्एदा याक्याङ्ओ अ़ङ्को च़लोक अ़ङ्सोमातुक्मा खानानिन सिन्तानुम निकिना अ़ङ्साकोङ्वादाओ ब़द्धे दुखा खोन्कि अ़ङ्योक्मा खोन्कि ब़द्धे अ़ङ्म़क्वाएनान अ़ङ्का खानानिन छाप्नानिन्ओ। हेवा लेत्मा 5 खोन्कि साङ्आ खाक्कोसोओ अ़राक सेत्तुयुङ्सु, खोसाआ अ़ङ्का अ़ङ्राक अ़सेत्ताङ्ओ माआङ, मेन खोसाआ खानानिन झारा अ़चित आम्नुओ राक त़सेत्तिन्युङ्सिन। अ़न्नुनु चाअ़त्लो अ़य़ङ्ऩङ्ने निम्पाङ अ़ङ्का उन्नि य़ङ्ङाङा। 6 ब़द्धेसाआ खो फित्चि अ़मुवा, खोन्कि मोङा दन्दाओ निम्पाङ थात्तुलो लिसायुङ्सा। 7 खोन्ओसा हान, खानानिन्आ मो लेत्माकि अ़सोम्सेत्मादोत, माङ्नालोना मोसोओ चात्लो अ़राक स़। 8 खोन्ओसा अ़ङ्का खानानिन यायोक प़नाङ्नानिन, खानानिन मो सोमालासातुक्तानुम। 9 खानानिन चिन्माखाङ्मा खोन्कि झारा य़ङ्दा लोमाय़ङ्वा त़च़न्येन हे माआङ्नि सिन्मा निम्पाङ अ़ङ्का खानानिन छाप्नानिन्ओ। 10 साङ खानानिन्आ त़लेत्तुम, अ़ङ्काछाङ लेत्तुङ। अ़ङ्का खाक्को य़ङ्दा लेत्तुङ्युङ्सुङ्नालो आम्नुओ निम्पाङ अ़ङ्का ख्रिस्तओ अ़चुबुदा लेत्तुङ्युङ्सुङ। 11 खोन्ओसा सैतानाआ आन्कान म़धान्निन्ने। देकिनालो मोसोओ अ़मित्चिऩङ्चि आन्कान मान्सिन्कादा अ़मुन्मिन्येन। ख्रिस्तलाम्पा छोमा 12 ख्रिस्तओ अ़चुनुय़ङ्खान खालुसि त्रोआस्दा खाराङ्हिदा हाङ्पाएदा अ़ङ्को निम्पाङ अ़क्तात लाम ऩहोत्ताङ्पुवाङ्युङ्साङ। 13 मेन अ़ङ्निछा तितस मोदा मान्धित्ङा, खोन्ओसा अ़ङ्मिन्मा चाअ़त्सा। खोन्किना मोचिदाङ्का हासाङ्च़ङ्कि अ़ङ्का माकेदोनियाह्यात्नि खाराङ। 14 मेन निनाम्हाङ आलाङ्ने, खोक्कोसाआ आन्कान्का ख्रिस्तदा अ़धुन छोमादा म़तित, खोन्कि खोक्कोसोओ अ़चुताया आन्कान्कालाम्पा झारादात्नि अ़फे। 15 म़लेन्याङ्ओचि खोन्कि म़लुक्खात्याङ्ओचिओ अ़चुरादा निनाम्हाङ प़माय़ङ आन्कान्का ख्रिस्तओ नाम्नुओ अ़चुसुङ ओ। 16 देकिनालो साङ्चि म़लुक्खात्याङ, आन्कान ओ अ़क्तात क़माकात्तुओ नाम्छ़ओ सुङ ओ, मोसाआ सेरुचि, मेन साङ्चि म़लेत्याङ, मोचिओ निम्पाङ आन्कान ओ अ़क्तात नाम्नुओ सुङ ओ, मोसाआ ह़ङ्सुचि। ओवाको काचिचि मुमा काऱ साङ युङ्याङ? 17 देकिनालो ब़द्धे निचिवा आन्कान्का निनाम्हाङ्ओ अ़चुय़ङ काखित काइन्चि माआङ, मेन निनाम्हाङ्आ ऩछुत्तिन्काओ अ़चुमिन्मा सेङ्याङ्ओ म़नाचिवा आन्कान्का निनाम्हाङ्ओ अ़चुबुदा ख्रिस्तओ अ़चुतुक्वादा चेविन्का। |
© Wycliffe Bible Translators, Inc. All rights reserved.
Wycliffe Bible Translators, Inc.