२ कोरिन्थि 11 - बान्तावा राईपावल खोन्कि सोज्जेओ छाम्माय़ङ्चि 1 खानानिन्आ उन्नि अ़ङ्खामान्सिन त़आङ्ङाप़ङाऩङ्नि मिन्ङाङा! अ़नुछ्या खानानिन्आ अ़ङ्का आङ्निप़नि। 2 निनाम्हाङ्वात्निङा अ़ङ्का खानानिन खाङ्नायुङ्नानिन। अ़क्छा खिम्हाङ्पाओ सेङ्याङ्ओ वारिसावात्नि खानानिन खाङ्मुमाओ निकि अ़ङ्का ख्रिस्तओ निम्पाङ खानानिन दोत्नाप़नायुङ्नानिन। 3 मेन देत्नि प़ओ अ़चाप्चाआ हब्बा म़प्तु, मोवात्निङा ख्रिस्तएदा आम्नुओ अ़छ़ङ खोन्कि सेङ्याङ्ओ ब़क्मालाम्पा आम्नुओ मिन्माचि फेन्मादा म़छुक हे निकिना अ़ङ्क़मा कात्याङ। 4 देकिनालो अ़क्छा म़ना ताकि आन्कान्का खालुसुम्काओ येसुदाङ्का नि येसुओ अ़चुनुय़ङ्खान खालुसु माङ्लो खानानिन्आ त़तोक्तुम्ओ लावादाङ्का नि लावा मोचिआ खानानिन लोक्ऩमेत्तिन माङ्लो खानानिन्आ त़लोउम्ओ नुय़ङ्खान्दाङ्का नि नुय़ङ्खान मोचिआ खानानिन लोक्ऩमेत्निन्नालो खानानिन नुसुम्पेन्ताङा त़आङ्तुम। 5 मेन अ़ङ्का मिन्ङाङा, खाक्कोछाङ य़ङ्दा अ़ङ्का मो अ़छोङ्दुओ छाम्माय़ङ्चिदाङ्का देम्छाङ अ़चुक्ऩङ्ऩङ। 6 अ़ङ्का चेप्मादा ब़द्धे काले माआङ्नुछाङ तायादा ना अ़चुक्ऩङ्ऩङ। आन्कान्का ओ य़ङ खानानिन झाराकापाराआ छेङ्छेङ्वा खाङ्मेत्नियुङ्नि। 7 अ़ङ्का आप्पि सिम्नान्चिन्सा खानानिन सायामेत्मा निम्पाङ निनाम्हाङ्ओ अ़चुनुय़ङ्खान अ़ङ्का खानानिन मोहा खाएत्नानिन्ओसा दि अ़ङ्का हेवा मुवाङ? 8 अ़ङ्का खानानिन ब़त्नाङ्नानिनहिदा नि साम्भुङ्चिदाङ्का छेन्बि लोउङ्कि फानानिन। ओ ना खानानिन फामाओ निम्पाङ नि साम्भुङ्चि छेन्बि ङाप्तिन्वा लिसा। 9 खानानिन्एनान युङाङ्याङ्हिदा अ़ङ्का मान्तोक्ङानुछाङ अ़ङ्का साङ्छाङ दुखा मान्प़ङा, देकिनालो माकेदोनियादाङ्का म़बानाओ ब़ब़, नाना खोन्कि निछाचिआ अ़ङ्मान्तोक्दामादा ऩफासाङ। खोन्ओसा खानानिन दुखा त़तोक्तिमिन्ने निकिना अ़ङ्का क़म्ताङ्च़ङ, खोन्कि माय़ङ्छाङ मोवात्निङा च़ङा। 10 देत्नि ख्रिस्त अ़छ़ङ म़चेवा, खोन्कि खोक्को अ़ङ्काएदा म़युङ्याङ, मोवात्निङा अखैयाओ धिखाहुप्चिदाओ अ़ङ्तोक्पो लिमा साङ्आछाङ छेक्मा अ़ऱन। 11 देकि खानानिन्एदाङ्का छेन्बि अ़लोक्ऩङ? दि अ़ङ्का खानानिन सोमाअ़तुक्नान्निमिन निकिना ओ? निनाम्हाङ्आ अ़सिन्याङ, अ़ङ्का खानानिन सोमातुक्नानिन! 12 अ़ङ्का खाक्को काचि मुङ्योङ, मो मुङ्युङ्सुङ। खोन्ओसा तोक्पो लियाङ्सा अ़मुवाओ अ़चुकाचि आन्काओएनान अ़क्निवा मुयाङ्नि काय़ङ मो म़नाचिओ अ़चुय़ङ क़प्मा ऱङ्ने। 13 देकिनालो ओवाको म़नाचि सोज्जेओ छाम्माय़ङ्चि खोन्कि काम़प्चि ओ, खोन्कि मोचि आप्पि ख्रिस्तओ अ़चुछाम्माय़ङ्चिवात्नि काफान्नान्चिन्चिओ। 14 खोन्कि ओ म़दोम्दाओ काचि माआङ, देकिनालो सैतानाछाङ साम्स़रिओ निनाम्हाङ काफाचिवात्नि फान्नान्चिन। 15 खोन्ओसा ओ म़दोम्दाओ य़ङ माआङ, मोसोओ अ़हारुक्चिआछाङ साम्योक्मि म़नाचिओ अ़चुकात्मावात्नि म़फान्नान्चिन। मोचिओ अ़चुलुक्मा मोचिओ अ़चुकाचिवात्निङा लि। पावल्ओ अ़दुखाचि 16 अ़ङ्का लाङाय़ङ्ङा, साङ्आछाङ अ़ङ्का खामान्सिन्नि अ़मित्ऩङ्ने। मेन खानानिन मोवात्नि त़मित्ङाऩङ्नुछाङ खामान्सिन्वात्नि अ़ङ्का लोआङ्ऩङ, खोन्ओसा अ़ङ्का अ़क्चित तोक्पो लियाङ्सा चेप्मा ऱङाने। 17 अ़नुछ्याङा, ओ अ़ङ्तोक्पो लिमादा, अ़ङ्का हाङ्पाओ अ़चुपाङ्दाङ्का चेप्ङाङाओ माआङ, मेन खामान्सिन्वा चेप्ङाङा। 18 ब़द्धे म़नाचि हेन्खामादाओ य़ङ्चिदा तोक्पो म़मुयाङ्ओसा अ़ङ्काछाङ ओन्ग़रि तोक्पो लिङा। 19 खानानिन देत्निङा खारु कातोक त़लिसिन्युङ्सिन, देकिनालो आम्नुओ ऩङानुयाङ्सा खामान्सिन्चि त़आङ्तुम्च़म! 20 खाक्को अ़क्छा म़नाआ खानानिन हारुक त़मुन माङ्लो खानानिन ऩच़न्तिन माङ्लो खानानिन त़लुत्तिन माङ्लो खो आप्पि ऱक्भाक मु माङ्लो आम्नुओ खोम्ताङ्मादा त़फेङ्सिन्नुछाङ खानानिन्आ झारा त़आङ्तुम। 21 अ़ङ्का लेजो कात्याङ्सा लोक्मादोत, आन्कान्काएदा मो य़ङ्चि मुमा राक मात्द़ङ्याङ! मेन साङ दिसु य़ङ्दा तोक्पो लिमा राक मुनालो अ़ङ्काछाङ मो य़ङ्दा तोक्पो लिमा राक मुङा। उवा, अ़ङ्का खामान्सिन्वा चेप्ङाङा! 22 दि मोचि हिब्रुचि ओ? अ़ङ्काछाङ हिब्रुङा ओ। दि मोचि इस्राएलिचि ओ? अ़ङ्काछाङ ओ। दि मोचि अब्राहाम्ओ अ़छाचि ओ? अ़ङ्काछाङ ओ। 23 दि मोचि ख्रिस्तओ अ़चुकाफाचि ओ? अ़ङ्का च़लोक अ़नुवाक अ़चुकाफापा ओ। अ़ङ्का हिम्सालेवा चेप्ङाङा। अ़ङ्का च़लोक काचि मुङ्युङ्सुङ। छेक्खादा ब़द्धेकादु छुक्ताङ्युङ्साङ। खिप्दि मान्तेत य़हुप चोङ्युङ्सुङ। स़माओ अ़दोदा अ़दु-अ़दु छुक्ताङ्युङ्साङ। 24 पाच्कादु अ़ङ्का यहुदिचिआ अ़क्दु चुक्लो चालिस य़हुप ऩपाक्ताङ। 25 सुम्कादुतारि अ़ङ्का रोलाआ ऩधात्ताङ। अ़क्दु अ़ङ्का सेत्मा निम्पाङ लुङ्ताक्आ ऩवेराङ। सुम्कादु अ़ङ्का वाङाङ्ओ वाप्तेला भुङ्साखारा। अ़क लेन अ़क्खाखुत अ़ङ्का धियाङ्वामादाङा अ़ङ्का क़प्तुङ। 26 अ़ङ्का अ़दु-अ़दु अ़ङ्कोन्खादा याङ्वामाचिओ क़मादा, काङाप्चिओ क़मादा, यहुदि आप्पि अ़ङ्म़नाचिदा खोन्कि निरावाचिओ क़मादा छुक्मादोरा। मोवात्निङा अ़ङ्ह़ङ्म़ङ सहराओ क़मादा, लेक्लेक्लेक्वाओ क़मादा, धियाङ्वामाओ क़मादा, सोज्जेओ ब़ब़, नाना खोन्कि निछाचिएदाङ्काओ क़मादा छुक्ताङ। 27 अ़ङ्का ब़द्धे काचि मुमादा, दुखादा, ब़द्धे मान्इम्माङ युङ्मादा, सास़मादा खोन्कि वामित्मादा, ब़द्धेकादु मान्चादा खोन्कि चुङादा तित मात्द़ङ्ओदा छुक्मादोरा। 28 खोन्कि ओ य़ङ्चिदाङ्का नि अ़लेन्खिन्तुम झारा साम्भुङ्चि खाङ्माओ पाङ खोन्कि मिन्राक, अ़ङ्काएदा याक्याङ। 29 साङ सोम्कुवादा मान्ऱकादा मुयाङ, खोन्कि अ़ङ्का मान्ऱकादा अ़मुऩङ्ऩङ? साङ हेवादा धान्तायुङ्सा, खोन्कि अ़ङ्का अ़ङ्माइसुङ्आ अ़ह़त्ऩङ? 30 अ़ङ्का तोक्पो लिमाङादोत्नालो अ़ङ्मान्ऱदामा य़ङ्चि खाङ्मुमादा तोक्पो लिङा। 31 हाङ्पा येसुओ अ़चुनिनाम्हाङ पापा, खो अ़धुन-अ़धुन म़चोन्ने। खोक्कोसाआ अ़सिन्याङ, अ़ङ्का अ़म़प्ऩङ। 32 दमस्कस्दा अरितस हाङ्ओ अ़हाङ्काचि कामुआ अ़ङ्का लाप्सि सहरा काहुङ्चि हुङ्मेत्तुयुङ्सुचि। 33 मेन कुदारिओ अ़क्तात अ़जस्केलिदाङ्का अ़धिवा खेङ्दा ऩयुङ्साङ्कि कुदारिदुङ्का ह्युना ऩधान्ताङ्ओसा अ़ङ्का मोसोओ अ़छुक्दाङ्का लेराङ। |
© Wycliffe Bible Translators, Inc. All rights reserved.
Wycliffe Bible Translators, Inc.