२ कोरिन्थि 10 - बान्तावा राईपावल्आ अ़सेवा काचि रात्तु 1 खा-खाक्को म़नाचि म़य़ङ, अ़ङ्का पावल, आम्नुओ बुदा खोन्कि सिम्ङान्च़ङ, मेन अ़थाया लिङाहिदा खानानिन्एदा छाक्लो लिङा! ख्रिस्तओ अ़चुसिम्मान्चिन खोन्कि अ़चुसोम्तुक्मालाम्पा अ़ङ्का खानानिन लोनाङ्नानिन। 2 खानानिन्एदा अ़ङ्का ताङाहिदा आन्कान्का हेन्खामादाओ च़माथाङ्माआ काचि मुन्कानि काय़ङ्चिएदा अ़ङ्का छाक्लो लिमा मित्चिऩङ मुङा। अ़ङ्का खानानिन लोनानिन, अ़ङ्का ताङाहिदा मोवात्नि खानानिन चात्लो रेन्मा अ़दोत्निन्ने। 3 आन्कान्का हेन्खामादा युङिन्येन्का, मेन हेन्खामादाओवा ङेन अ़मुन्मिन्का। 4 देकिनालो ङेन्ओ आन्काओ बान्छुबिछुचि हेन्खामादाओ माआङ, मेन कुम्खा भुङ्मा आन्कान्का निनाम्हाङ्ओ अ़चुसावा याङुम्का। 5 निनाम्हाङ्ओ अ़चुतायाओ अ़देङ्सालाप्पा म़लोन्ओ दुम्छ़न्माचि खोन्कि ऱक्भाक्एनान लाम्काछेक य़ङ्चि आन्कान्का लुक्तुम्च़म्का, खोन्कि आन्कान्का झारा मिन्मा क़म्तुम्का खोन्कि मो ख्रिस्तओ अ़चुलोमाय़ङ्वा मुमेत्तुम्च़म्का। 6 खाउग़रि आम्नुओ लोमाय़ङ त़तासुम्लाम, मोन्ग़रि झारा लोमावा मान्च़कादाचि दन्दा प़सि आन्कान्का चुम्सिन्चिन्का। 7 खानानिन अ़नुछ्याओ य़ङ्चि खानुम्च़म। साङ अ़ङ्का ख्रिस्तओ निकिना सोम्कुवा मुनालो खोसाआ मित्मादोत, देत्नि खो ख्रिस्तओ ओ, मोवात्नि आन्कान्काछाङ ख्रिस्तओङा ओ। 8 आन्काओ पाङ्ओ अ़तुक्वादा अ़ङ्का अ़क्चित च़लोक ऱक्भाक मुवाङ्नुछाङ अ़ङ्का लेजोदा अ़छुक्ऩङ, देकिनालो खानानिन लुक्माओ निम्पाङ माआङ, मेन आम्नुओ नुलोक्ओ निम्पाङ हाङ्पाआ आन्कान्का ओ पाङ ऩप़न्युङ्सिन्का। 9 अ़ङ्का अ़ङ्छाप्लावाचिआ खानानिन किन्मा लाप्नाङ्नानिन्ओ माआङ। 10 खा-खाक्कोचि म़य़ङ, “खोसोओ अ़छाप्लावाचि च़लोक छाक्लो खोन्कि सावापोरि मुयाङ, मेन खो ताहिदा खो मान्ऱकादा लि, खोन्कि खोसोओ अ़चेप्मा अ़काचि मात्द़ङ्ओ लि।” 11 मोवाको म़नाचिआ तुप्मादोत आन्कान्का अ़युङिमिन्काहिदा आन्काओ छाप्लावाचिलाम्पा दे य़ङिन्का, आन्कान्का तान्काहिदा मो काचिङा आन्कान्का मुम्का। 12 आप्पि काचोन्नान्चिन्चि खा-खाक्को म़नाचिएनान आन्कान्का अ़क छान्दा युङ्मा माङ्लो मोचिएनान तोङ्माखाङ्मान्चिन आन्कान्का राक अ़मुन्मिन्का। मोचि आप्पि अ़क्छा निएदा म़हाक्नान्चिन माङ्लो म़तोङ्नान्खाङ्नान्चिन। मोचि देम खामान्सिन्चि! 13 आन्कान्का इन काक्याङ्सा तोक्पो अ़लिसिमिन्का, मेन खानानिन्एदा तामालामा निनाम्हाङ्आ आन्काओ निम्पाङ अ़युङ्साओ खाहुप्दाङा युङिन्का। 14 खानानिन्एदा आन्कान्का मान्तादान्काओवा आन्कान्का च़लोक तोक्पो अ़लिसिमिन्का, देकिनालो ख्रिस्तओ अ़चुनुय़ङ्खान तारुम्काकि खानानिन्एदा बुयाओदु काता आन्कान्काङा ओ। 15 आन्कान्का नि म़नाचिओ अ़चुकाचिचिदा तोक्पो अ़लिसिमिन्का, मेन आन्काओ सोम्कुवा ओङा ओ, आम्नुओ साकोङ्छ़ङ पोन्याङ्सा आम्नुओ रादा खात्याङ्हिदा मोसाआ आन्काओ काचि मुखा खाहुप पोइसु। 16 खोन्ओसा आन्कान्का खा-खाक्कोचिओ अ़चुकाचि मुखादा बुयाङा लिसाचिआओ काचिदा तोक्पो मान्लिमाङ खानानिन्एदाङ्का नि तेप्दात्नि निचिआ काचि मान्मुदाओदा खारिन्काकि नुय़ङ्खान खालुमा ऱम्काने। 17 देकिनालो साम्कालिन य़ङ्याङ, “साङ तोक्पो लिमालाम्नालो मो हाङ्पा तोक्तुओदा तोक्पो लिने।” 18 देकिनालो आप्पि काचोन्नान्चिन म़ना ऩलोउन, मेन हाङ्पाआ अ़चोन्ओ अ़लोक। |
© Wycliffe Bible Translators, Inc. All rights reserved.
Wycliffe Bible Translators, Inc.