१ कोरिन्थि 3 - बान्तावा राईसाम्भुङ्दा फेक्मान्चिन 1 ब़ब़, नाना खोन्कि निछाचि ओ, अ़ङ्का खानानिन्एदा लावामि म़नाचिएनान्वात्नि चेप्मा मान्ऱङा, मेन खानानिन्एनान हेन्खामादाओ म़नाचि, ख्रिस्तदा अ़चुप्पो छाचिवात्नि अ़ङ्का चेप्मा रुवाङ। 2 अ़ङ्का खानानिन ओम्पिवा दुङ्नानिन, कुन्दाङ्दाङ्वाओ चामायु माआङ। देकिनालो मोसोओ निम्पाङ खानानिन मान्चुम्त़युक्तिन्चिन। खोन्कि हान्छाङ खानानिन मान्चुम्त़युक्तिन्चिन। 3 हान्छाङ खानानिन हेन्खामादाओवात्निङा त़मुन्येन, देकिनालो आम्नुओ रादा ऩङ्च़ खोन्कि खिमा युङ्याङ्ओसा दि खानानिन पोक्दाओ माआङ कि? दि खानानिन ओ हेन्खामादाओ म़नाओ अ़च़माथाङ्मावा काच़ मान्लित़दान कि? 4 देकिनालो अ़क्छाआ “अ़ङ्का पावल ओ”नि य़ङ्मा खोन्कि नितात्साआ “अ़ङ्का अपोल्लोस्ओ”नि य़ङ्मा दि खानानिन ओ हेन्खामादाओ म़नाचिवा मान्लित़दान? 5 खोन्नालो अपोल्लोस साङ ओ? खोन्कि पावल साङ ओ? आन्कान्का झारा ना निनाम्हाङ्आ ऩप़न्काओ अ़चुकाचि कामुचि ओन्ङा ओ। आन्कान्कालाम्पा खानानिन साकोङ्छ़ङ त़मुम। 6 अ़ङ्का विउ लित्तुङ, अपोल्लोस्आ चाक्वा पाक्तु, मेन निनाम्हाङ्आ ओ अ़पोइसा। 7 खोन्ओसा विउ कालित दित्छाङ माआङ, चाक्वा कापाक्छाङ दित्छाङ माआङ, मेन कापोन निनाम्हाङ ओन्ङा अ़च़वाङ ओ। 8 विउ कालित खोन्कि चाक्वा कापाक्ओ अ़चुमित्चिऩङ अ़क्तात्ङा मु, खोन्कि निनाम्हाङ्आ अ़चुकाचिवा सिरिफा झारा म़प़चि। 9 देकिनालो आन्काच्या ना निनाम्हाङ्ओ निम्पाङ अ़क्नि अ़चुकाचि कामुचिओ। खानानिन निनाम्हाङ्ओ अ़चुव़क ओ, निनाम्हाङ्ओ अ़चुखिम्ओ। 10 निनाम्हाङ्आ अ़ङ्का ऩपुवाङ्ओ अ़चुसोम्तुक्माआ अ़न्नुनु काले खिम्कामुआवात्नि छ़ङ अ़ङ्का युङ्सुङ, खोन्कि निचिआ मो दुङ्दा खिम मुयाङ्सा अ़खात। मेन झारा खिम कामुआ देत्नि मुमादोत खोसाआ मिन्मा पाक्मादोत। 11 देकिनालो निनाम्हाङ्आ खाक्को छ़ङ अ़युङ्सायुङ्सा, मो येसु ख्रिस्तङा ओ। मोदाङ्का साङ्आछाङ नितात अ़छ़ङ युङ्मा अ़ऱन। 12 साङ्आ ओ छ़ङ दुङ्दा हाराक्वा, रुपा, अ़लुङ्छ़ओ लुङ्ताक, स़ङ, घासा माङ्लो पराला याङ्याङ्सा खिम अ़मुनालो, 13 छ़ङ्छेन्मा लेन्दा झारासाआ अ़मुवाओ अ़चुकाचि मिलाम्पा नुलोक दात। खाक्को म़नाआ दियाको काचि मुओ, मो मिआ खाङ्मुसु। 14 खाक्को म़नाआ मो छ़ङ्दा मुओ काचि युङ्युङ्नालो मोसाआ सिरिफा तोक्तु। 15 खाक्को म़नाओ अ़काचि ह़त्खात्नालो मोसाआ तुत्ता आङ्मादोत, मेन खो ओन मिदाङ्का फ़न्तिन्चिन्वात्नि ह़ङ। 16 दि खानानिन निनाम्हाङ्ओ अ़चुब़क्खाखिम खोन्कि निनाम्हाङ्ओ अ़चुलावा खानानिन्एदा म़याक निकिना त़सिन्तिमिन्येन? 17 खाक्कोसाआ निनाम्हाङ्ओ अ़चुब़क्खाखिम अ़लुक्नालो निनाम्हाङ्आ मो अ़लुक। देकिनालो निनाम्हाङ्ओ अ़चुब़क्खाखिम सेङ्याङ खोन्कि मो ब़क्खाखिम खानानिन्ङा ओ। 18 साङ्छाङ आप्पि अ़धान्नान्चिमिन्ने। आम्नुओ रादा साङ्आ आप्पि ओ जुगादाओ ताया कातोक्नि मित्नान्चिन्नालो मो खामान्सिन लिने, खोवात्निओसा खो ताया कातोक लिमा ऱ। 19 देकिनालो हेन्खामाओ खारु निनाम्हाङ्ओ अ़चुबुदा खामान्सिन ओ। साम्कालिन्दा ओवात्नि छाप्याङ, “खोक्कोसाआ ताया कातोक्चि मोचिओ अ़चुचाप्चादा म़लाउचि।” 20 मोवात्निङा “ताया कातोक्चिओ अ़चुमिन्मा सोज्जेओ मुयाङ निकिना हाङ्पा निनाम्हाङ्आ अ़सिन्याङ।” 21 खोन्ओसा साङ्छाङ म़नाओ अ़तुक्वादा ऱक्भाक अ़मुनिन्ने। झारा य़ङ्चि आम्नुओङा ओ। 22 पावल्ङाने माङ्लो अपोल्लोस्ङाने माङ्लो केफास्ङाने माङ्लो हेन्खामाङाने माङ्लो ह़ङ्म़ङ्ङाने माङ्लो स़माङाने माङ्लो आइमित्ओ ग़रिङाने खोन्कि माय़ङ्ओ ग़रि, झारा य़ङ आम्नुओङा ओ, 23 खोन्कि खानानिन ख्रिस्तओ, खोन्किना ख्रिस्त निनाम्हाङओ म़युङ्याङ। |
© Wycliffe Bible Translators, Inc. All rights reserved.
Wycliffe Bible Translators, Inc.