१ कोरिन्थि 14 - बान्तावा राईनिनाम्हाङ्य़ङ खालुमाय़ङ खोन्कि नि य़ङ्दा चेप्मा सावा 1 सोम्तुक्मा आम्नुओ मित्चिऩङ मुवानुम। मेन लावामि सावाचिदाछाङ आम्नुओ मिन्मा पाक्तानुम। मोचिदाङ्का च़लोक अ़काचि याक्ओ लावामि सावा निनाम्हाङ्य़ङ खालुमाओ। 2 देकिनालो साङ नि य़ङ्दा चेप खो म़नाचिएनान माआङ, मेन निनाम्हाङ्एनान चेप। खो दे य़ङ साङ्आछाङ अ़तुप्तुन, सेङ्लावादा खो अ़कोङ्य़ङ्चि चेप। 3 मेन निनाम्हाङ्य़ङ खाकालु मो म़नाचिएनान्ङा चेप। मोचिओ सावा पोन्मा, राक पोन्मा खोन्कि सोम्सेत्माओ निम्पाङ खो चेप। 4 साङ नि य़ङ चेप खोसाआ अ़सावा पोइसु। मेन निनाम्हाङ्य़ङ खाकालुआ साम्भुङ्ओ अ़सावा पोइसु। 5 खानानिन झारा निय़ङ्चि चेवानिन्नि अ़ङ्का मिन्ङा, मेन मोदाङ्का च़लोक निनाम्हाङ्य़ङ खालुसानिन्नि अ़ङ्का मिन्ङा। साम्भुङ्ओ लावामि पोन्मा निम्पाङ अ़क्छाआ अ़तुप्माय़ङ अ़फान्तुन्नालो नि य़ङ्दा काचेप्दाङ्का निनाम्हाङ्य़ङ खाकालु अ़च़वाङ ओ। 6 हान, ब़ब़, नाना खोन्कि निछाचि ओ, अ़ङ्का खानानिन्एदा निय़ङ्चि चेप्याङ्सा ताङा, मेन खानानिन्एदा दियाकोछाङ कोङ्दुम खाङ्मुमा माङ्लो ताया माङ्लो निनाम्हाङ्य़ङ खालुमा माङ्लो चिन्माय़ङ अ़तात्ऩङ्नालो अ़ङ्काएदाङ्का खानानिन दि त़तोक्तुम? 7 बासुरि खोन्कि वाकेन्वाको अ़साक्मा मात्द़ङ्ओ केन एन्नुलो अ़साङ्निन्नालो दि साङ्याङ्ओ देत्नि सिन्मा ऱम? 8 खोन्कि थुथुरि नुलोक अ़साङ्निन्नालो ङेन्ओ निम्पाङ साङ चुम्नान्चिन कि? 9 खानानिन्छाङ ओवात्निङा त़लिसिन। म़नाचिआ तुप्मा ऩऱन्ओ य़ङ्सिवाचि त़चेविन्नालो खानानिन्आ त़चेविन्येन्ओ य़ङ्चि खोचिआ देत्नि अ़सिन कि? खानानिन ह़क्दा चेविन्येन्वात्नि त़लिसिन। 10 अ़नुछ्याङा हेन्खामादा ब़द्धेकाखालाओ य़ङ्चि म़युङ्याङ। मोचिएदा खाक्कोछाङ अ़तुप्माय़ङ मात्द़ङ्ओ ऩमुनिनिन। 11 मेन अ़क्छा चेप्याङ्ओ य़ङ्ओ अ़तुप्मायु अ़ङ्का अ़तुप्ऩङ्नालो काचेप्ओ निम्पाङ अ़ङ्का निहेन्कोप्याओ लिङा, खोन्कि खो अ़ङ्को निम्पाङ निहेन्कोप्याओ लि। 12 खोन्ओसा खानानिन्छाङ ओवात्निङा लिसानिन। खानानिन सेङ्लावाओ सावाचि तोक्मा अ़न्नुनु आम्नुओ छेमाकात्याङ्ओसा साम्भुङ पोन्माओ निम्पाङ अ़न्नुनु नुलोक मुमा लामानिन। 13 खोन्ओसा, नि य़ङ काचेप्आ मोसोओ अ़तुप्माय़ङ फान्मा ऱमाओ निम्पाङ यामात्ने। 14 देकिनालो अ़ङ्का नि य़ङ्दा यामात्ङानालो अ़ङ्लावा यामात, मेन अ़ङ्खारुआ अ़सिन्तुन। 15 खोन्नालो अ़ङ्का दे च़मा म़ल़क? अ़ङ्का अ़ङ्लावाआ यामात्ङा, खोन्कि अ़ङ्खारुआछाङ यामात्ङा। अ़ङ्लावाआ छाम्लु, खोन्कि अ़ङ्खारुआछाङ छाम्लु। 16 माङ्नालोना खाना आम्लावादा निनाम्हाङ त़चोन्तुङुहिदा मान्तुप्युक्तुओ म़नाआ आलाङ्ओ यामात्मादा “आमेन”नि देत्नि य़ङ? मोन्ग़रि खाना दे त़य़ङ्याङ्ओ मो खोसाआ अ़तुप्तुन। 17 खाना ना नुलोक्ङा आलाङ त़प़ ओन्दे, मेन ओसाआ नि म़ना अ़फासुन। 18 अ़ङ्का निनाम्हाङ आलाङ प़ङ, देकिनालो खानानिन झाराएदाङ्का च़लोक अ़ङ्का नि य़ङ्चिदा चेप्ङा। 19 खोन्नुछाङ, साम्भुङ्दा नि य़ङ्दा दस हजाराकाय़ङ्चिदा चेप्मादाङ्का ना तुप्तुम्ओ पाच्का य़ङ्आ निचि चिन्माचि अ़ङ्का चेप्मा स़ङा। 20 ब़ब़, नाना खोन्कि निछाचि ओ, मिन्मादा छाचिवात्नि मान्लिदानिन। अ़अ़त्पाओ निम्पाङ छाचिवात्नि लिसानिन, मेन मिन्मा काचिदा काले लिसानिन। 21 य़ङ्हुप्दा छाप्तायुङ्सा, “निय़ङ्चि काचेप म़नाचिएदाङ्का खोन्कि हेन्कोप्चिदाओ म़नाचिओ अ़चुदोलाम्पा ओ म़नाचिएनान अ़ङ्का चेप्ङा, खोन्नुछाङ मोचिआ अ़ङ्य़ङ ऩएनुन”नि हाङ्पा निनाम्हाङ म़य़ङ्याङ। 22 खोन्ओसा निय़ङ्चि चेप्मा साकोङ्छ़ङ कामुचिओ निम्पाङ माआङ, मेन साकोङ्छ़ङ मान्मुम़युक्ओचिओ निम्पाङ बुन ओ। मेन निनाम्हाङ्य़ङ खालुमा, साकोङ्छ़ङ मान्मुकादाचिओ निम्पाङ माआङ, मेन साकोङ्छ़ङ कामुचिओ निम्पाङ ओ। 23 मोवात्नि झारा साम्भुङ म़कोप्नान्चिन खोन्कि झारा निय़ङ्दा म़चेप, खोन्कि साकोङ्छ़ङ मान्मुकादाचि खोन्कि मान्तुप्कादाचि म़तानालो दि मोचिआ खानानिन हिम्साले नि ऩलोन्मिन कि? 24 मेन झारासा निनाम्हाङ्य़ङ खाम़लुयाङ्हिदा अ़क्छा साकोङ्छ़ङ मान्मुकादा माङ्लो बुङ्खायाओ म़ना मोदा तानालो मोन्ग़रि खोसाआ एनुकि हेवामि कान्नान्चिन खोन्कि एनुओ य़ङ्चिआ खो छ़ङ्छेन्नान्चिन। 25 मोसोओ अ़साकोङ्वा हुत्याओ य़ङ्चि खाङ्म़मुनान्चिन, खोन्कि बोम्नान्चिन्कि मोसाआ निनाम्हाङ ब़क्तु, खोन्कि मोसाआ “निनाम्हाङ आम्नुओ रादा म़युङ्याङ”नि खालुसु। तोङ्लो ब़क्मा 26 खोन्नालो ब़ब़, नाना खोन्कि निछाचि ओ, आन्कान्का दे य़ङिन्का? खानानिन अ़क्नि त़कोविन्चिन्हिदा झाराकापाङ्एनान साम्ऱङ लुमा, चिन्मा, कोङ्दुम खालुमा, निय़ङ चेप्मा खोन्कि य़ङ्फान्मा लावामि सावा याक। ओ झारा य़ङ्चि साम्भुङ पोन्माओ निम्पाङ म़मुने। 27 खाक्को निय़ङ्दा चेप्नालो ह़वाङ्साआ ओन्ङा माङ्लो ब़द्धेलो सुम्पाङ्साआ अ़क्छा चेप्चिन्कि नि चेप्ने, खोन्कि अ़क्छाआ फान्तुने। 28 मेन काफान मोदा साङ्छाङ मात्द़ङ्नालो काचेप म़ना साम्भुङ्दा वाइवेत युङ्ने, खोन्कि खो आप्पिएनान खोन्कि निनाम्हाङ्एनान चेप्ने। 29 निनाम्हाङ्य़ङ खाकालुचि ह़वाङ माङ्लो सुम्पाङ म़चेप्ने, खोन्कि निचिआ मोचि म़चेप्ओ य़ङ नुलोक छ़ङ अ़छेन्ने। 30 मेन मोदा युङ्याङ्ओ अ़क्छाएदा कोङ्दुम खाङ्मुमा तानालो बुदा काचेप वाइवेत युङ्ने। 31 खानानिन अ़क्छा चिन खोन्कि नि निनाम्हाङ्य़ङ खालुमा त़ऱन, खोवात्निओसा झारासा खेङ्मा अ़ऱ, खोन्कि झारासा राक अ़तोक। 32 निनाम्हाङ्य़ङ खालुमा सावा कातोक्चि निनाम्हाङ्य़ङ खाकालुचिओ अ़चुक़म्मादा युङ्मादोत। 33 देकिनालो निनाम्हाङ कापुप्खान निनाम्हाङ ऩमुनिनिन, मेन सेवाङ्निओ म़मुयाङ। निनाम्हाङ्ओ अ़चुम़नाचिओ झारा साम्भुङ्दावात्नि, 34 मेत्छामाचि साम्भुङ्चिदा वाइवेत म़युङ्ने। मोचि चेप्मा मान्प़म़युक, मेन य़ङ्हुप य़ङ्याङ्वा मोचि क़म्मादा म़युङ्ने। 35 दि-दिसोओ अ़तुक्वादा मोचि सिन्मा म़स़याङ्नालो खिम्दा अ़चुखिम्हाङ्पाचि म़सेनुचिने। देकिनालो साम्भुङ्दा मेत्छामा चेप्मा लेजो ओ। 36 दि निनाम्हाङ्ओ अ़चुय़ङ खानानिन्एदाङ्का पुङ्सा ओ? माङ्लो दि खानानिन्एदा ओन्ङा ता ओ? 37 अ़क्छाआ निनाम्हाङ्य़ङ खाकालु माङ्लो लावामि म़नानि मित्नान्चिन्नालो दि अ़ङ्का छाप्तुङ्योङ, मो हाङ्पाओ अ़चुलोमाय़ङ्ओ निकिना मोसाआ लोउने। 38 मेन खोसाआ ओ अ़सिन्तुन्नालो खोछाङ अ़सिन्निन। 39 खोन्ओसा, ब़ब़, नाना खोन्कि निछाचि ओ, निनाम्हाङ्य़ङ खालुमानि अ़न्नुनु मिनानिन, खोन्कि निय़ङ काचेप्चि मान्छेक्दानुम्च़म। 40 मेन झारा य़ङ नुलोक खोन्कि तोङ्लो लिमादोत। |
© Wycliffe Bible Translators, Inc. All rights reserved.
Wycliffe Bible Translators, Inc.