الرُّؤْيَا 8 - العهد الجديد بالدارجة التونسية 2022

الخِتْمْ السَّابَعْ

¹ وكِي حَلْ الخَرُوفْ الخِتْمْ السَّابَعْ، صَارْ سْكَاتْ فِي السْمَاء قْرِيبْ النُّصْ سَاعَة.

² وشُفْتْ المْلَايْكَة السَّبْعَة الِّي وَاقْفِينْ قُدَّامْ اللَّهْ، تِعْطَالْهُمْ سَبْعَة أَبْوَاقْ.

³ وجَاء مَلَاكْ آخِرْ هَازِزْ مَبْخْرَة ذْهَبْ ووْقِفْ بَحْذَا المَذْبَحْ، وتِعْطَالُو بَرْشَة بْخُورْ بَاشْ يْقَدْمُو مْعَ صْلَاوَاتْ القِدِّيسِينْ عْلَى مَذْبَحْ الذَهَّبْ الِّي قُدَّامْ العَرْشْ.

⁴ يَاخِي طْلَعْ مِنْ يِدْ المَلَاكْ دُخَّانْ البْخُورْ ومْعَاهْ صْلَاوَاتْ القِدِّيسِينْ قُدَّامْ اللَّهْ.

⁵ ومْبَعِّدْ هَزْ المَلَاكْ المَبْخْرَة، وعَبَّاهَا بِجْمَرْ مِالمَذْبَحْ، ورْمَاهَا عَالأَرْضْ، يَاخِي صَارِتْ أَصْوَاتْ وبَرْشَة بْرَقْ ورْعَدْ وزْلَازِلْ.

الأَبْوَاقْ السَّبْعَة

⁶ والسَّبْعَة مْلَايْكَة، الِّي عَنْدْهُمْ الأَبْوَاقْ السَّبْعَة، حَضّْرُوا رْوَاحْهُمْ بَاشْ يُنْفْخُوا فِيهَا.

⁷ نْفَخْ المَلَاكْ الأُوِّلْ فِي بُوقُو يَاخِي هْبَطْ عَالأَرْضْ تَبْرُورِي ونَارْ مْخَلْطِينْ بِالدَّمْ، وتِحْرَقْ ثْلُثْ الأَرْضْ وثْلُثْ الشْجَرْ والحْشِيشْ الأَخْضِرْ الكُلْ.

⁸ ونْفَخْ المَلَاكْ الثَّانِي فِي بُوقُو، وحَاجَة كَايِنْهَا جْبَلْ عْظِيمْ شَاعِلْ بِالنَّارْ طَاحِتْ فِي البْحَرْ، وثْلُثْ البْحَرْ وَلَّى دَمْ،

⁹ ومَاتِتْ ثْلُثْ المَخْلُوقَاتْ الِّي فِي البْحَرْ، وادَّمْرِتْ ثْلُثْ البَابُورَاتْ.

¹⁰ ونْفَخْ المَلَاكْ الثَّالِثْ فِي بُوقُو يَاخِي طَاحِتْ مِالسْمَاء نِجْمَة كْبِيرَة كَايِنْهَا مِشْعَلْ مِنْ نَارْ، وطَاحِتْ عْلَى ثْلُثْ الوِدْيَانْ وعْيُونْ المَاء.

¹¹ والنِّجْمَة اسْمْهَا عَلْقَمْ. يَاخِي ثْلُثْ المَاء وَلَّى مُرْ كِيفْ العَلْقَمْ، وبَرْشَة نَاسْ مَاتُوا مِنْ مْرَارِةْ المَاء.

¹² ونْفَخْ المَلَاكْ الرَّابَعْ فِي بُوقُو، يَاخِي تِضْرَبْ ثْلُثْ الشَّمْسْ وثْلُثْ الڨَمْرَة وثْلُثْ النْجُومْ، حَتَّى لِينْ ظَلِّمْ ثْلُثْ ضَوْهُمْ، ووَلَّى ثْلُثْ النْهَارْ ظْلَامْ وثْلُثْ اللِّيلْ زَادَا.

¹³ وشُفْتْ وسْمَعْتْ نِسْرْ طَايِرْ فِي قَلْبْ السْمَاء يْصِيحْ بْصُوتْ عَالِي: «يَا وِيلْهُمْ! يَا وِيلْهُمْ! يَا وِيلْهُمْ سُكَّانْ الأَرْضْ مِلِّي يِسْتَنَّى فِيهُمْ وَقْتِلِّي يُنْفْخُوا المْلَايْكَة الثْلَاثَة الِّي مَزَّالُوا فِي أَبْوَاقْهُمْ».