مُرْقُسْ 1 - العهد الجديد بالدارجة التونسية 2022

يُوحَنَّا الِّي يْعَمِّدْ يْحَضِّرْ الطْرِيقْ

¹ هَاذِي هِيَّ بِدَايِةْ البْشَارَة الِّي تْخُصْ يَسُوعْ المَسِيحْ إِبْنْ اللَّهْ.

² كِيمَا قَالْ اللَّهْ فِي كْتَابْ النَّبِيْ إِشَعْيَاءْ: «هَانِي بِشْ نِبْعَثْ قُدَّامِكْ رَسُولِي بَاشْ يْحَضَّرْلِكْ الطْرِيقْ

³ صُوتْ يْعَيِّطْ فِي الخْلَاء: "حَضّْرُوا طْرِيقْ الرَّبْ، إِسْتْوِيوْ الثْنِيَّة قُدَّامُو"».

⁴ كَانْ يُوحَنَّا فِي الخْلَاء يْنَادِي لِلنَّاسْ بَاشْ يْتُوبُوا ويِتْعَمْدُوا بَاشْ تِتْغْفِرْ ذْنُوبْهُمْ.

⁵ ومْشَاوْلُو النَّاسْ الكُلْ الِّي مِنْ مَنْطَقْةْ اليَهُودِيَّة وأُورْشَلِيمْ، وتْعَمْدُوا عْلَى يْدِيهْ فِي وَادْ الأُرْدُنْ بَعْدْمَا اعْتَرْفُوا بِذْنُوبْهُمْ.

⁶ وكَانْ يُوحَنَّا لَابِسْ وْبَرْ الجْمَالْ ومِتْحَزِّمْ بْجِلْدْ ويَاكِلْ فِي الجْرَادْ والعْسَلْ الجَّالِي.

⁷ وكَانْ يْبَشِّرْ ويْقُولْ: «بَعْدِي آنَا بِشْ يْجِي الِّي هُوَّ أَعْظَمْ مِنِّي، ولِّي مَا نِسْتَاهِلْشْ حَتَّى بَاشْ نْطَبِّسْ ونْحِلُّو رْبَايِطْ صَنْدَالُو.

⁸ آنَا عَمَّدْتْكُمْ فِي المَاء، آمَا هُوَّ بِشْ يْعَمِّدْكُمْ فِي الرُّوحْ القُدُسْ».

مَعْمُودِيِّةْ يَسُوعْ

⁹ فِي الوَقْتْ هَاذَاكَا جَاء يَسُوعْ مِالنَّاصْرَة الِّي فِي مَنْطَقْةْ الجَلِيلْ، وتْعَمِّدْ فِي وَادْ الأُرْدُنْ عْلَى يْدِينْ يُوحَنَّا.

¹⁰ ودُوبْ مَا خْرَجْ مِالمَاء، شَافْ السْمَاء تْشَقِّتْ والرُّوحْ القُدُسْ هْبَطْ عْلِيهْ كِالحْمَامَة.

¹¹ وجَاء صُوتْ مِالسْمَاء يْقُولْ: «إِنْتِ إِبْنِي الِّي نْحِبُّو، آنَا فَرْحَانْ بِيكْ».

الشِّيطَانْ يْجَرِّبْ يَسُوعْ

¹² وبِالوَقْتْ الرُّوحْ القُدُسْ هَزْ يَسُوعْ لِلْخْلَاء

¹³ وعَدَّى 40 يُومْ والشِّيطَانْ يْجَرِّبْ فِيهْ، وكَانْ فِي وِسْطْ الحَيَوَانَاتْ المِتْوَحْشَة والمْلَايْكَة تِخْدِمْ فِيهْ.

يَسُوعْ يَخْتَارْ تْلَامِذْتُو الأُولَانِينْ

¹⁴ وبَعْدْمَا تْحَطْ يُوحَنَّا فِي الحَبْسْ، مْشَى يَسُوعْ لْمَنْطَقْةْ الجَلِيلْ يُنْشُرْ فِي بْشَارِةْ اللَّهْ

¹⁵ ويْقُولْ: «جَاء الوَقْتْ وقُرْبِتْ مَمْلَكْةْ اللَّهْ. تُوبُوا وأَمْنُوا بِالبْشَارَة!».

¹⁶ وهُوَّ مَاشِي عْلَى شَطْ بُحَيْرِةْ الجَلِيلْ، شَافْ زُوزْ صَيَّادَة، سِمْعَانْ وخُوهْ أَنْدَرَاوُسْ، يَرْمِيوْ فِي الشْبَاكْ فِي البُحَيْرَة.

¹⁷ قَالِلْهُمْ يَسُوعْ: «تَبْعُونِي وآنَا بِشْ نْرُدْكُمْ صَيَّادِةْ نَاسْ».

¹⁸ وبِالوَقْتْ خَلَّاوْ الشْبَاكْ مْتَاعْهُمْ وتَبْعُوهْ.

¹⁹ وبَعْدْمَا زَادْ مْشَى شْوَيَّة شَافْ يَعْقُوبْ وِلْدْ زَبَدِي وخُوهْ يُوحَنَّا فِي الفْلُوكَة يْصَلْحُوا فِي الشْبَاكْ.

²⁰ بِالوَقْتْ عَيْطِلْهُمْ. يَاخِي خَلَّاوْ بُوهُمْ زَبَدِي مْعَ الخَدَّامَة فِي الفْلُوكَة وتَبْعُوهْ.

يَسُوعْ يْخَرِّجْ رُوحْ شِرِّيرْ

²¹ ومْبَعِّدْ مْشَاوْ لْكَفْرْنَاحُومْ، ونْهَارْ السِّبْتْ دْخَلْ يَسُوعْ لْمَعْبِدْ اليْهُودْ وبْدَا يْعَلِّمْ.

²² وقَعْدُوا الحَاضْرِينْ مِتْعَجْبِينْ مِنْ تَعْلِيمُو، عْلَى خَاطْرُو كَانْ يْعَلِّمْ كِيمَا وَاحِدْ عَنْدُو سُلْطَة، مُشْ كِيمَا عُلَمَاءْ الشَّرِيعَة.

²³ وفِي الوَقْتْ هَاذَاكَا، كَانْ فَمَّة فِي المَعْبِدْ رَاجِلْ سَاكْنُو رُوحْ شِرِّيرْ بْدَا يْصِيحْ

²⁴ وقَالْ: «آشْ تْحِبْ مِنَّا يَا يَسُوعْ النَّاصْرِي؟ جِيتْ بَاشْ تَقْضِي عْلِينَا؟ آنَا نَعْرِفْ إِنْتِ شْكُونْ، إِنْتِ القُدُّوسْ الِّي بَعْثُو اللَّهْ!».

²⁵ يَاخِي يَسُوعْ نْزَرْ عْلِيهْ وقَالُّو: «أُسْكُتْ! وأُخْرُجْ مِنُّو».

²⁶ صْرَعْ الرُّوحْ الشِّرِيرْ الرَّاجِلْ وصَاحْ بْصُوتْ عَالِي وخْرَجْ مِنُّو.

²⁷ النَّاسْ الكُلْ قَعْدُوا مِتْعَجْبِينْ وبْدَاوْ يِسْأْلُوا فِي بْعَضْهُمْ: «شْنُوَّة هَاذَا؟ تَعْلِيمْ جْدِيدْ، وعَنْدُو سُلْطَة! حَتَّى مِالأَرْوَاحْ الشِّرِّيرَة يُأْمُرْهُمْ وهُومَا يْطِيعُوهْ!».

²⁸ وفِيسَعْ تِشْهَرْ يَسُوعْ فِي مَنْطَقْةْ الجَلِيلْ الكُلْ.

يَسُوعْ يِشْفِي بَرْشَة نَاسْ

²⁹ ودُوبْ مَا خَرْجُوا مِالمَعْبِدْ، مْشَاوْ لْدَارْ سِمْعَانْ وأَنْدَرَاوُسْ، ومْعَاهُمْ يَعْقُوبْ ويُوحَنَّا.

³⁰ كَانِتْ حْمَاةْ سِمْعَانْ رَاقْدَة فِي الفَرْشْ عَنْدْهَا السْخَانَة. يَاخِي كَلْمُوا يَسُوعْ عْلِيهَا.

³¹ قْرُبِّلْهَا وشَدْهَا مِنْ يِدْهَا وقَيَّمْهَا وبِالوَقْتْ تْنَحَّاتْ عْلِيهَا السْخَانَة ووَلَّاتْ تِخْدِمْ فِيهُمْ.

³² وفِي العْشِيَّة، وَقْتِلِّي غُرْبِتْ الشَّمْسْ، جَابُولُو النَّاسْ المُرْضَى الكُلْ ولِّي سَاكْنِتْهُمْ الشْوَاطِنْ.

³³ والنَّاسْ الكُلْ الِّي فِي أُورْشَلِيمْ تْلَمُّوا قُدَّامْ البَابْ،

³⁴ وشْفَى بَرْشَة نَاسْ يْعَانِيوْ مِنْ بَرْشَة أَمْرَاضْ، وخَرِّجْ بَرْشَة شْوَاطِنْ، ومَا خَلَّاشْ الشْوَاطِنْ يِتْكَلْمُوا عْلَى خَاطِرْهُمْ عَرْفُوهْ شْكُونُو.

يَسُوعْ يْبَشِّرْ فِي مَنْطَقْةْ الجَلِيلْ

³⁵ ومِنْ غُدْوَة قْبَلْ الفَجْرْ قَامْ يَسُوعْ ومْشَى لْبُقْعَة خَالْيَة وبْدَا يْصَلِّي.

³⁶ ومْشَى سِمْعَانْ ولِّي مْعَاهْ يْلَوْجُوا عْلِيهْ

³⁷ ووَقْتِلِّي لْقَاوْهْ قَالُولُو: «رَاهُمْ النَّاسْ الكُلْ يْلَوْجُوا عْلِيكْ!».

³⁸ قَالِلْهُمْ: «هَيَّا نِمْشِيوْ لِلدْشُرْ الأُخْرَى القْرِيبَة بَاشْ نْبَشِّرْ فِيهَا زَادَا، عْلَى خَاطِرْ هَاذَاكَا عَلَاشْ جِيتْ».

³⁹ ومْشَى لِمْعَابِدْ اليْهُودْ الِّي فِي مَنْطَقْةْ الجَلِيلْ الكُلْ، يْبَشِّرْ ويْخَرِّجْ فِي الشْوَاطِنْ.

يَسُوعْ يِشْفِي المْرِيضْ بِالبْرَصْ

⁴⁰ وجَاهْ وَاحِدْ أَبْرِصْ يِتْشَحِّتْ فِيهْ، وهْبَطْ عْلَى رْكَايْبُو قُدَّامُو وقَالْ: «كَانْ تْحِبْ، تْنَجِّمْ اطَّهِّرْنِي مِالبْرَصْ».

⁴¹ حَنْ عْلِيهْ يَسُوعْ، ومَدْ يِدُّو ومَسُّو وقَالْ: «أَيْ نْحِبْ، أُطْهُرْ!».

⁴² ودُوبْ مَا تْكَلِّمْ يَسُوعْ تْنَحَّى عْلِيهْ البْرَصْ وطْهُرْ.

⁴³ وبِالوَقْتْ، نَبَّهْ عْلِيهْ يَسُوعْ قْبَلْ مَا يْخَلِّيهْ يِمْشِي،

⁴⁴ وقَالُّو: «رُدْ بَالِكْ! مَا تْقُولْ لْحَتَّى حَدْ. آمَا إِمْشِي وَرِّي رُوحِكْ لِلْكَاهِنْ، وعْلَى خَاطْرِكْ طْهُرْتْ، قَدِّمْ القُرْبَانْ الِّي أْمَرْ بِيهْ مُوسَى بَاشْ يْكُونْ شْهَادَة لِيهُمْ».

⁴⁵ آمَا هُوَّ مْشَى وبْدَا يُنْشِرْ فِي الخْبَرْ قُدَّامْ النَّاسْ، حَتَّى وَلَّى يَسُوعْ مَا عَادِشْ يْنَجِّمْ يُدْخُلْ لْحَتَّى بْلَادْ جْهَارْ، ووَلَّى قَاعِدْ فِي الخْلَاء، والنَّاسْ يْجِيوَهْ مِنْ كُلْ بْلَاصَة.