مَتَّى 3 - العهد الجديد بالدارجة التونسية 2022

يُوحَنَّا يْحَضِّرْ فِي الطْرِيقْ لْيَسُوعْ

¹ وفِي الزْمَانْ هَاذَاكَا، بْدَا يُوحَنَّا الِّي يْعَمِّدْ يْبَشِّرْ فِي خْلَاء مَنْطَقْةْ اليَهُودِيَّة

² ويْقُولْ: «تُوبُوا، رَاهِي مَمْلَكْةْ السْمَاوَاتْ قُرْبِتْ!».

³ ويُوحَنَّا هَاذَا هُوَّ الِّي حْكَى عْلِيهْ النَّبِيْ إِشَعْيَاءْ كِي قَالْ: «صُوتْ يْعَيِّطْ فِي الخْلَاء: حَضّْرُوا طْرِيقْ الرَّبْ، إِسْتْوِيوْ الثْنِيَّة قُدَّامُو!».

⁴ وكَانْ يُوحَنَّا لَابِسْ لِبْسَة مِنْ وْبَرْ الجْمَالْ، ومِتْحَزِّمْ بِحْزَامْ جِلْدْ، ويَاكِلْ فِي الجْرَادْ والعْسَلْ الجَّالِي.

⁵ وكَانُوا النَّاسْ يِمْشِيوْلُو مِنْ أُورْشَلِيمْ ومَنْطَقْةْ اليَهُودِيَّة الكُلْ والبْلَايِصْ الِّي بَحْذَا وَادْ الأُرْدُنْ،

⁶ بَاشْ يَعْتَرْفُوا بِذْنُوبْهُمْ، وهُوَّ يْعَمِّدْهُمْ فِي وَادْ الأُرْدُنْ.

⁷ ووَقْتِلِّي شَافْ بَرْشَة فِرِّيسِيِّينْ وصَدُّوقِيِّينْ جَايِّينُو بَاشْ يْعَمِّدْهُمْ، قَالِلْهُمْ: «يَا وْلَادْ الأَفَاعِي! شْكُونْ الِّي عَلَّمْكُمْ تُهْرْبُوا مِنْ غَضَبْ اللَّهْ الِّي بِشْ يْجِي؟

⁸ أَعْمْلُوا أَعْمَالْ تْوَرِّي الِّي إِنْتُومَا تُبْتُوا بِالحَقْ،

⁹ ومَا تْقُولُوشْ فِي قْلُوبْكُمْ: "أَحْنَا وْلَادْ إِبْرَاهِيمْ"، عْلَى خَاطِرْ آنَا نْقُلْكُمْ إِنُّو اللَّهْ قَادِرْ يَعْمِلْ مِالحْجَرْ هَاذَا وْلَادْ لْإِبْرَاهِيمْ.

¹⁰ هَاوْ الفَاسْ مِنْ تَوَّا حَاضِرْ بَاشْ يْقُصْ الشْجَرْ مِنْ عْرُوقُو، والشَّجْرَة الِّي مَا تْجِيبِشْ غَلَّة بَاهْيَة تِتْقَصْ وتِتْرْمَى فِي النَّارْ.

¹¹ آنَا نْعَمِّدْكُمْ بِالمَاء كِي اتُّوبُوا، آمَا الِّي بِشْ يْجِي بَعْدِي رَاهُو أَقْوَى مِنِّي، وآنَا مَا نِسْتَاهِلْشْ حَتَّى نْهِزْلُو صَنْدَالُو. هُوَّ بِشْ يْعَمِّدْكُمْ بِالرُّوحْ القُدُسْ والنَّارْ.

¹² ويْهِزْ المَذْرَى فِي يِدُّو ويِفْرِزْ صَابْتُو، يْلِمْ القَمْحْ فِي المَخْزِنْ، آمَا التْبِنْ يَحْرْقُو بْنَارْ مَا تِطْفَاشْ».

مَعْمُودِيِّةْ يَسُوعْ

¹³ فِي الوَقْتْ هَاذَاكَا جَاء يَسُوعْ مِنْ مَنْطَقْةْ الجَلِيلْ لْوَادْ الأُرْدُنْ، ومْشَى لْيُوحَنَّا بَاشْ يِتْعَمِّدْ عْلَى يْدِيهْ.

¹⁴ آمَا يُوحَنَّا مَا خَلَّاهِشْ وقَالُّو: «آنَا هُوَّ الِّي مِسْتْحَقْ نْجِيكْ تْعَمِّدْنِي، كِيفَاشْ إِنْتِ الِّي تْجِينِي؟»

¹⁵ يَاخِي جَاوْبُو يَسُوعْ: «خَلِّي هَاذَا يْصِيرْ تَوَّا، عْلَى خَاطِرْ هَكَّا نْتَمْمُوا كُلْ مَاهُو صَالَحْ». يَاخِي وَافْقُو يُوحَنَّا.

¹⁶ وبِالوَقْتْ بَعْدْمَا تْعَمِّدْ يَسُوعْ وخْرَجْ مِالمَاء، تْحَلِّتْلُو السْمَاء، وشَافْ رُوحْ اللَّهْ هَابِطْ كِالحْمَامَة وحَطْ عْلِيهْ.

¹⁷ وإِذَا بِيهْ صُوتْ مِالسْمَاء يْقُولْ: «هَاذَا هُوَّ إِبْنِي الِّي نْحِبُّو ولِّي آنَا فَرْحَانْ بِيهْ».