يُوحَنَّا 4 - العهد الجديد بالدارجة التونسية 2022

يَسُوعْ يْقَابِلْ مْرَا سَامِرِيَّة

¹ وَعْرَفْ يَسُوعْ الِّي الفِرِّيسِيِّينْ سَمْعُوا الِّي عْدَدْ تْلَامِذَتُو قَاعِدْ يْزِيدْ أَكْثِرْ مِنْ يُوحَنَّا ولِّي هُوَّ يْعَمِّدْ فِيهُمْ،

² رَغْمِلِّي مُشْ يَسُوعْ بِيدُو الِّي كَانْ يْعَمِّدْ آمَا تْلَامِذْتُو،

³ وَلَّى خْرَجْ مِنْ مَنْطَقْةْ اليَهُودِيَّة ورْجَعْ لْمَنْطَقْةْ الجَلِيلْ.

⁴ وكَانْ لَازْمُو يِتْعَدَّى عْلَى مَنْطَقْةْ السَّامْرَة.

⁵ وْصُلْ لِمْدِينَة فِي السَّامْرَة إِسْمْهَا سُوخَارْ، قْرِيبَة مِنْ قَطْعِةْ الأَرْضْ الِّي عْطَاهَا يَعْقُوبْ لْوِلْدُو يُوسِفْ،

⁶ وِينْ فَمَّة بِيرْ يَعْقُوبْ. تْعِبْ يَسُوعْ مِالمَشِي يَاخِي قْعَدْ بَحْذَا البِيرْ. وكَانْ وَقْتْهَا ظُهْرْ.

⁷ جَاتْ مْرَا سَامِرِيَّة بَاشْ تْعَبِّي المَاء، قَالِلْهَا يَسُوعْ: «أَعْطِينِي نُشْرُبْ».

⁸ وكَانُوا تْلَامِذْتُو فِي المْدِينَة يِشْرِيوْ فِي المَاكْلَة.

⁹ قَالِتْلُو المْرَا السَّامْرِيَّة: «إِنْتِ يْهُودِي وآنَا سَامْرِيَّة، كِيفَاشْ تُطْلُبْ مِنِّي بَاشْ نَعْطِيكْ تُشْرُبْ؟» قَالِتْلُو الكْلَامْ هَاذَا عْلَى خَاطِرْ اليْهُودْ مَا كَانُوشْ يِتْعَامْلُوا مْعَ السَّامِرِيِّينْ.

¹⁰ جَاوِبْهَا يَسُوعْ: «كَانْ جِيتْ تَعْرِفْ آشْ يَعْطِي اللَّهْ، وشْكُونْ الِّي قَلِّكْ "أَعْطِينِي نُشْرُبْ"، رَاكْ إِنْتِ تُطْلِبْ مِنُّو، وهُوَّ يَعْطِيكْ المَاء الحَيْ».

¹¹ قَالِتْلُو المْرَا: «يَا سِيدِي، مْنِينْ جَاكْ المَاء الحَيْ، وإِنْتِ مَا عَنْدِكْشْ سْطَلْ، والبِيرْ غَارِقْ؟

¹² يَاخِي إِنْتِ أَعْظَمْ مِنْ بُونَا يَعْقُوبْ الِّي عْطَانَا البِيرْ هَاذَا، وشْرَبْ مِنُّو هُوَّ وأَوْلَادُو والغْنَمْ مْتَاعُو؟»

¹³ جَاوِبْهَا يَسُوعْ: «كُلْ وَاحِدْ يُشْرُبْ مِالمَاء هَاذَا يْزِيدْ يُعْطِشْ مَرَّة أُخْرَى،

¹⁴ آمَا الِّي يُشْرُبْ مِالمَاء الِّي نَعْطِيهُولُو آنَا، عُمْرُو مَا عَادْ يُعْطِشْ. المَاء الِّي نَعْطِيهُولُو، يْوَلِّي فِيهْ مِنْ دَاخِلْ عِينْ تْفِيضْ وتَعْطِي الحَيَاةْ الأَبَدِيَّة».

¹⁵ قَالِتْلُو المْرَا: «يَا سِيدِي، أَعْطِينِي مِالمَاء هَاذَا، بَاشْ مَا عَادِشْ نُعْطِشْ، ومَا عَادِشْ نِرْجَعْ نْعَبِّي المَاء مِنْ هْنَا».

¹⁶ قَالِلْهَا: «إِمْشِي عَيِّطْ لْرَاجْلِكْ وإِرْجَعْ».

¹⁷ جَاوْبِتُّو المْرَا: «مَا عَنْدِيشْ رَاجِلْ». قَالِلْهَا يَسُوعْ: «قُلْتْ الحَقْ وَقْتِلِّي قُلْتْ "مَا عَنْدِيشْ رَاجِلْ"،

¹⁸ عْلَى خَاطِرْ عَرِّسْتْ بْخَمْسَة رْجَالْ، والرَّاجِلْ الِّي عَايْشَة مْعَاهْ تَوَّا مُشْ رَاجْلِكْ. كْلَامِكْ صْحِيحْ».

¹⁹ قَالِتْلُوا المْرَا: «يَا سِيدِي، يُظْهُرْلِي فِيكْ نَبِيْ!

²⁰ جْدُودْنَا عِبْدُوا اللَّهْ فِي الجْبَلْ هَاذَا، وإِنْتُومَا اليْهُودْ تْقُولُوا الِّي لَازِمْ النَّاسْ يِعْبْدُوهْ فِي أُورْشَلِيمْ».

²¹ جَاوِبْهَا يَسُوعْ: «صَدَّقْنِي يَا مْرَا، بِشْ يْجِي وَقْتْ تِعْبْدُوا فِيهْ الآبْ، لَا فِي الجْبَلْ هَاذَا ولَا فِي أُورْشَلِيمْ.

²² إِنْتُومَا السَّامِرِيِّينْ تِعْبْدُوا فِلِّي مَا تَعْرْفُوهِشْ، وأَحْنَا اليْهُودْ نِعْبْدُوا فِلِّي نَعْرْفُوهْ. عْلَى خَاطِرْ النْجَاةْ تْجِي مِنْ عَنْدْ اليْهُودْ.

²³ آمَا بِشْ يْجِي وَقْتْ ورَاهُو تَوَّا جَاء، الِّي فِيهْ النَّاسْ الِّي يِعْبْدُوا بِحْقِيقَة بِشْ يِعْبْدُوا الآبْ بِالرُّوحْ والحَقْ. والآبْ يْلَوِّجْ عْلَى نَاسْ كِيمَا هَاذُومَا.

²⁴ اللَّهْ رُوحْ. هَاذَاكَا عْلَاشْ الِّي يِعْبْدُوهْ، لَازِمْهُمْ يِعْبْدُوهْ بِالرُّوحْ وبِالحَقْ».

²⁵ قَالِتْلُو المْرَا: «آنَا نَعْرِفْ الِّي المَسِيَّا، الِّي يْقُولُولُو المَسِيحْ، بِشْ يْجِي. ووَقْتِلِّي يْجِي بِشْ يْقُولِلْنَا عْلَى كُلْ شَيْ».

²⁶ قَالِلْهَا يَسُوعْ: «آنَا هُوَّ، آنَا الِّي قَاعِدْ نْكَلِّمْ فِيكْ».

²⁷ وفِي الوَقْتْ هَاذَاكَا، رَجْعُوا تْلَامِذْتُو وتْعَجْبُوا كِي لْقَاوَهْ يَحْكِي مْعَ مْرَا. آمَا حَتَّى حَدْ مِنْهُمْ مَا قَالُّو: «آشْ تْحِبْ مِنْهَا؟» وَلَّا «عْلَاشْ تْكَلِّمْ فِيهَا؟».

²⁸ يَاخِي المْرَا خَلَّاتْ قُلِّتْهَا، ورَجْعِتْ لِلْمْدِينَة، وقَالِتْ لِلنَّاسْ:

²⁹ «إِيجَاوْ شُوفُوا رَاجِلْ قَلِّي عَلِّي عْمَلْتُو الكُلْ. زَعْمَة يْكُونِشْ هُوَّ المَسِيحْ؟»

³⁰ وَلَّاوْ خَرْجُوا مِالمْدِينَة ومْشَاوْلُو.

³¹ وفِي الوَقْتْ هَاذَاكَا، قَالُولُو تْلَامِذْتُو: «يَا مُعَلِّمْ، كُولْ».

³² آمَا هُوَّ قَالِلْهُمْ: «آنَا عَنْدِي مَاكْلَة نَاكِلْهَا، إِنْتُومَا مَا تَعْرْفُوهَاشْ».

³³ بْدَاوْ التْلَامْذَة يِسْأْلُوا فِي بْعَضْهُمْ: «يَاخِي فَمَّة شْكُونْ جَابْلُو مَاكْلَة؟»

³⁴ وقَالِلْهُمْ يَسُوعْ: «مَاكِلْتِي هِيَّ إِنِّي نَعْمِلْ آشْ يْحِبْ الِّي بْعَثْنِي، ونْكَمِّلْ خِدْمْتُو.

³⁵ يَاخِي مُشْ تْقُولُوا: "الحْصَادْ يْجِي بَعْدْ أَرْبْعَة شْهُرْ؟" آمَا آنَا نْقُلْكُمْ، حِلُّوا عِينِيكُمْ وشُوفُوا الزَّرْعْ كِيفَاشْ بْيَاضْ وحْضَرْ لِلْحْصَادْ.

³⁶ وبْدَا الِّي يَحْصِدْ يَاخُذْ فِي أُجْرْتُو، ويْلِمْ صَابَة لِلْحَيَاةْ الأَبَدِيَّة، وهَكَّا الِّي يَزْرَعْ ولِّي يَحْصِدْ يِفْرْحُوا مْعَ بْعَضْهُمْ.

³⁷ ويُصْدُقْ المَثَلْ الِّي يْقُولْ: "وَاحِدْ يَزْرَعْ والآخِرْ يَحْصِدْ".

³⁸ وآنَا بْعَثْتْكُمْ تَحْصْدُوا زَرْعْ مَا تْعِبْتُوشْ عْلِيهْ. غِيرْكُمْ تْعِبْ وإِنْتُومَا تِسْتَنْفْعُوا مِنْ تْعَبْهُمْ».

بَرْشَة سَامِرِيِّينْ يَمْنُوا

³⁹ وأَمْنُوا بِيهْ بَرْشَة سَامِرِيِّينْ مِالمْدِينَة هَاذِيكَا، عْلَى خَاطِرْ المْرَا شِهْدِتْلُو وقَالِتْ: «قَالِّي عَلِّي عْمَلْتُو الكُلْ».

⁴⁰ ووَقْتِلِّي جَاوَهْ السَّامِرِيِّينْ، لَحُّوا عْلِيهْ بَاشْ يُقْعُدْ بَحْذَاهُمْ. يَاخِي قْعَدْ عَنْدْهُمْ نْهَارِينْ.

⁴¹ وزَادُوا كُثْرُوا الِّي أَمْنُوا بِيهْ وَقْتِلِّي سَمْعُوهْ يِتْكَلِّمْ،

⁴² وقَالُوا لِلْمْرَا: «أَحْنَا تَوَّا نَمْنُوا بِيهْ، مُشْ عْلَى خَاطِرْ كْلَامِكْ، آمَا عْلَى خَاطِرْ أَحْنَا بِيدْنَا سْمَعْنَاهْ، وعْرَفْنَا إِنُّو بِالحَقْ هُوَّ الِّي يْنَجِّي العَالِمْ».

⁴³ وبَعْدْ نْهَارِينْ، مْشَى يَسُوعْ لْمَنْطَقْةْ الجَلِيلْ،

⁴⁴ رَغْمِلِّي هُوَّ بِيدُو قَالْ: «حَتَّى نَبِيْ مَا عَنْدُو قْدَرْ فِي بْلَادُو».

⁴⁵ وَقْتِلِّي وْصُلْ لِلْجَلِيلْ، رَحْبُوا بِيهْ إِمَّالِيهَا، عْلَى خَاطِرْهُمْ شَافُوا الِّي عْمَلُو الكُلْ، وَقْتِلِّي كَانُوا فِي أُورْشَلِيمْ فِي عِيدْ الفِصْحْ.

يَسُوعْ يِشْفِي طْفُلْ صْغِيرْ

⁴⁶ ومْشَى مَرَّة أُخْرَى لْقَانَا فِي الجَلِيلْ، وِينْ بَدَّلْ المَاء لِشْرَابْ. وكَانْ فَمَّة فِي كَفْرْنَاحُومْ، رَاجِلْ تَابَعْ المَلِكْ، وِلْدُو مْرِيضْ.

⁴⁷ وَقْتِلِّي سْمَعْ الِّي يَسُوعْ جَاء مِاليَهُودِيَّة لِلْجَلِيلْ، مْشَالُو وطْلَبْ مِنُّو بَاشْ يِمْشِي مْعَاهْ ويِشْفِيلُو وِلْدُو، الِّي كَانْ قْرِيبْ يْمُوتْ.

⁴⁸ قَالُّو يَسُوعْ: «إِنْتُومَا مَا تَمْنُوا كَانْ مَا تْشُوفُوا عْجَايِبْ ومُعْجْزَاتْ!».

⁴⁹ قَالُّو الرَّاجِلْ: «يَا سِيدِي، إِيجَا مْعَايَا قْبَلْ مَا وِلْدِي يْمُوتْ».

⁵⁰ قَالُّو يَسُوعْ: «إِمْشِي! رَاهُو وِلْدِكْ حَيْ». صَدِّقْ الرَّاجِلْ الكِلْمَة الِّي قَالْهَالُو يَسُوعْ ومْشَى.

⁵¹ وهُوَّ رَاجِعْ، عُرْضُوهْ الخُدَّامْ مْتَاعُو وبَشْرُوهْ بِلِّي وِلْدُو حَيْ.

⁵² سْإِلْهُمْ: «وَقْتَاشْ بْرَا؟» قَالُولُو: «تْنَحَّاتْ عْلِيهْ السْخَانَة البَارِحْ مْعَ مَاضِي سَاعَة».

⁵³ وفْهِمْ البُو الِّي هَاذَاكَا نَفْسْ الوَقْتْ الِّي قَالُّو فِيهْ يَسُوعْ: «وِلْدِكْ حَيْ»، يَاخِي أَمَّنْ هُوَّ وعَايِلْتُو الكُلْ.

⁵⁴ وهَاذِي المُعْجْزَة الثَّانْيَة الِّي عْمَلْهَا يَسُوعْ، وَقْتِلِّي مْشَى مِاليَهُودِيَّة لِلْجَلِيلْ.