أَعْمَالْ 3 - العهد الجديد بالدارجة التونسية 2022

المَشْلُولْ يِتْشْفَى

¹ نْهَارْ مِالنْهَارَاتْ، مْشَى بُطْرُسْ ويُوحَنَّا لِلْهَيْكِلْ فِي وَقْتْ صْلَاةْ الثْلَاثَة مْتَاعْ العْشِيَّة.

² وكَانْ بَحْذَا بَابْ الهَيْكِلْ الِّي يِتْسَمَّى بَابْ جْمِيلْ، رَاجِلْ مَشْلُولْ مِلِّي تُولِدْ، يْجِيبُوهْ النَّاسْ كُلْ يُومْ ويْحُطُّوهْ غَادِي ويُقْعُدْ يُطْلُبْ فِي الصَّدْقَة مِنْ عَنْدْ النَّاسْ الدَّاخْلِينْ.

³ ووَقْتِلِّي شَافْ بُطْرُسْ ويُوحَنَّا دَاخْلِينْ لِلْهَيْكِلْ، طْلَبْ مِنْهُمْ صَدْقَة.

⁴ يَاخِي خَزْرُولُوا بُطْرُسْ ويُوحَنَّا بِالڨْدَا وقَالُّو بُطْرُسْ: «أُخْزْرِلْنَا!».

⁵ خْزَرِّلْهُمْ، مَاشِي فِي بَالُو بِشْ يَاخِذْ مِنْهُمْ حَاجَة.

⁶ يَاخِي قَالُّو بُطْرُسْ: «لَا عَنْدِي فُضَّة ولَا ذْهَبْ، آمَا الِّي عَنْدِي نَعْطِيهُولِكْ: بْإِسْمْ يَسُوعْ المَسِيحْ النَّاصْرِي قُومْ وامْشِي!».

⁷ وشَدُّو مِنْ يِدُّو اليْمِينْ وقَوْمُو. وبِالوَقْتْ رَجْعِتْ القُوَّة فِي سَاقِيهْ وقْدَامُو.

⁸ ونَڨِّزْ ووْقِفْ وبْدَا يِمْشِي. ودْخَلْ مْعَاهُمْ لِلْهَيْكِلْ وهُوَّ يِمْشِي ويْنَڨِّزْ وطَايِرْ مِالفَرْحَة ويِحْمِدْ فِي اللَّهْ.

⁹ والحَاضْرِينْ الكُلْ شَافُوهْ يِمْشِي ويِحْمِدْ فِي اللَّهْ.

¹⁰ وعَرْفُوهْ الِّي هُوَّ الرَّاجِلْ المَشْلُولْ الِّي مِسْتَانِسْ يُقْعُدْ يُطْلُبْ قُدَّامْ بَابْ جْمِيلْ مْتَاعْ الهَيْكِلْ، يَاخِي بِهْتُوا وتْعَجْبُوا مِلِّي صَارْلُو.

بُطْرُسْ يُخْطُبْ فِي الهَيْكِلْ

¹¹ وفِي الوَقْتْ الِّي كَانْ فِيهْ الرَّاجِلْ المَشْلُولْ شَادِدْ جْنَبْ بُطْرُسْ ويُوحَنَّا فِي أَقْوَاسْ الهَيْكِلْ المَعْرُوفَة بْأَقْوَاسْ سُلَيْمَانْ، تْلَمُّوا عْلِيهُمْ بَرْشَة نَاسْ وكَانُوا بَاهْتِينْ.

¹² وَقْتِلِّي شَافْ بُطْرُسْ هَاذَا، قَالِلْهُمْ: «يَا بَنِي إِسْرَائِيلْ، عْلَاشْ بَاهْتِينْ مِلِّي صَارْ؟ وعْلَاشْ تُخْزْرُولْنَا تْقُولِشْ عْلِينَا أَحْنَا بْقُدْرِتْنَا وَلَّا بِالتَّقْوَى مْتَاعْنَا رَدِّينَا الرَّاجِلْ هَاذَا يِمْشِي؟

¹³ رَاهُو إِلَاهْ إِبْرَاهِيمْ وإِسْحَاقْ ويَعْقُوبْ، إِلَاهْ جْدُودْنَا، هُوَّ الِّي مَجِّدْ خَادْمُو يَسُوعْ، الِّي إِنْتُومَا سَلَّمْتُوهْ لِلْمُوتْ ونْكَرْتُوهْ قُدَّامْ بِيلَاطُسْ رَغْمِلِّي كَانْ يْحِبْ يْسَيْبُو.

¹⁴ إِنْتُومَا نْكَرْتُوا القُدُّوسْ الصَّالَحْ، وطْلَبْتُوا مِنْ بِلَاطُسْ بَاشْ يْسَامَحْ وَاحِدْ قَاتِلْ.

¹⁵ قْتَلْتُوا مَنْبَعْ الحَيَاةْ، آمَا اللَّهْ قَوْمُو مِالمُوتْ، وأَحْنَا شْهُودْ عْلَى هَاذَا.

¹⁶ والرَّاجِلْ هَاذَا الِّي تْشُوفُوا فِيهْ ولِّي تَعْرْفُوهْ رَجْعِتْلُو صَحْتُو عْلَى خَاطِرْ إِيمَانَّا بْإِسْمْ يَسُوعْ. الإِيمَانْ بْيَسُوعْ هُوَّ الِّي عْطَاهْ الصَّحَّة الكَامْلَة قُدَّامْكُمْ الكُلْ.

¹⁷ «آنَا نَعْرِفْ يَا خْوَاتِي، الِّي جَهْلْكُمْ هُوَّ الِّي خَلَّاكُمْ إِنْتُومَا وشْيُوخْكُمْ تِتْصَرْفُوا هَكَّا مْعَ المَسِيحْ.

¹⁸ آمَا هَكَّا، تَمِّمْ اللَّهْ الِّي وْحَى بِيهْ مِنْ قْبَلْ لِلأَنْبِيَاءْ الكُلْ، الِّي المَسِيحْ بِشْ يِتْعَذَّبْ.

¹⁹ مَالَا تُوبُوا وإِرْجْعُوا لِلَّهْ بَاشْ يِغْفْرِلْكُمْ ذْنُوبْكُمْ.

²⁰ وتْجِيكُمْ أَيَّامَاتْ الفْرَجْ مِنْ عَنْدُو، ويَبْعْثِلْكُمْ مَرَّة أُخْرَى يَسُوعْ المَسِيحْ الِّي اخْتَارْهُولْكُمْ مِنْ قْبَلْ.

²¹ آمَا تَوَّا، لَازْمُو يُقْعُدْ فِي السْمَاء حَتَّى يْجِي الوَقْتْ الِّي يِتْصَلَّحْ فِيهْ كُلْ شَيْ، كِيمَا وْحَى اللَّهْ لِلأَنْبِيَاءْ الصَّالْحِينْ، مِنْ قْدِيمْ الزْمَانْ.

²² ومُوسَى قَالْ: "الرَّبْ إِلَاهْكُمْ بِشْ يِبْعْثِلْكُمْ نَبِيْ كِيفِي مِنْ بِينْ خْوَاتْكُمْ. إِسْمْعُوا كْلَامُو فِلِّي يْقُلْكُمْ عْلِيهْ الكُلْ.

²³ آمَا الِّي مَا يِسْمَعْشْ كْلَامُو رَاهُو بِشْ يِتِمْحَى مِالشَّعْبْ".

²⁴ وزَادَا الأَنْبِيَاءْ الكُلْ، مِنْ صَمُوئِيلْ حَتَّى لِلِّي جَاوْ بَعْدُو، تْنَبْؤُوا عَالأَيَّامْ هَاذِي.

²⁵ وإِنْتُومَا وْلَادْ الأَنْبِيَاءْ هَاذُومَا ووْلَادْ العَهْدْ الِّي عَمْلُو اللَّهْ مْعَ جْدُودْنَا، وَقْتِلِّي قَالْ لْإِبْرَاهِيمْ: "بِشْ نْبَارِكْ شْعُوبْ الأَرْضْ الكُلْ عْلَى طْرِيقْ ذِرِّيتِكْ".

²⁶ واللَّهْ قَيِّمْ خَادْمُو وبْعَثْهُولْكُمْ لِيكُمْ إِنْتُومَا الأُولَانِينْ، بَاشْ يْبَارِكُّمْ ويْخَلِّي كُلْ وَاحِدْ فِيكُمْ يِرْجَعْ عَالشَّرْ الِّي يَعْمِلْ فِيهْ».