كُورِنْثُوسْ الثَّانْيَة 7 - العهد الجديد بالدارجة التونسية 2022

¹ يَا حْبَابِي، مَادَامْ الوُعُودْ هَاذِي الكُلْ لِينَا، مَالَا خَلِّينَا نَطَهْرُوا رْوَاحْنَا مِنْ كُلْ مَا يْنَجِّسْ البْدَنْ والرُّوحْ، ونَسْعَاوْ بَاشْ نْعِيشُوا فِي قَدَاسَة كَامْلَة ونْخَافُوا اللَّهْ.

بُولِسْ فَرْحَانْ بْتُوبِتْهُمْ

² أَعْطِيوْنَا بْلَاصَة فِي قْلُوبْكُمْ، عْلَى خَاطِرْ أَحْنَا مَا ظْلَمْنَا حَتَّى حَدْ، ومَا ضَرِّينَا حَتَّى حَدْ، ومَا اسْتْغَلِّينَا حَتَّى حَدْ.

³ ومَانِيشْ نْقُولْ فِي هَاذَا بَاشْ نُحْكُمْ عْلِيكُمْ، عْلَى خَاطِرْنِي قُلْتِلْكُمْ مِنْ قْبَلْ الِّي إِنْتُومَا فِي قْلُوبْنَا وأَحْنَا بِشْ نْكُونُوا مْعَاكُمْ فِي الحَيَاةْ وَلَّا فِي المُوتْ.

⁴ آنَا عَنْدِي ثِيقَة كْبِيرَة فِيكُمْ وفَخُورْ بِيكُمْ بَرْشَة. ورَغْمْ المَشَاكِلْ الكُلْ، مِتْشَجَّعْ، وقَلْبِي فَايِضْ بِالفَرْحَة.

⁵ وحَتَّى كِي وْصِلْنَا لْمَنْطَقْةْ مَقْدُونِيَّة بْدَنَّا مَا ذَاقِشْ الرَّاحَة، كَانِتْ المَشَاكِلْ جَايِتْنَا مِنْ كُلْ شِيرَة: العَرْكْ دَايِرْ بِينَا مِنْ بَرَّا، والخُوفْ زَادْ فِينَا مِنْ دَاخِلْ.

⁶ آمَا اللَّهْ الِّي يْشَجَّعْ المُحْبْطِينْ، شَجَّعْنَا بْجَيَّانْ تِيطُسْ،

⁷ مُشْ بْجَيَّانُو بَرْكْ، آمَا بِالتَّشْجِيعْ الِّي شَجَّعْتُوهْ بِيهْ. وفَرْحْتِي زَادِتْ أَكْثِرْ وَقْتِلِّي حْكَالْنَا الِّي إِنْتُومَا تْوَحَّشْتُونِي، وعْلَى حُزْنْكُمْ وغِيرِتْكُمْ عْلِيَّا.

⁸ وإِذَا كَانْ حَزَّنْتْكُمْ بْرِسَالْتِي، رَانِي مَانِيشْ نَادِمْ. وحَتَّى كَانْ نْدِمْتْ، وَقْتِلِّي شُفْتْ الِّي هِيَّ خَلَّاتْكُمْ تِحْزْنُوا حَتَّى ولَوْ شْوَيَّة،

⁹ آنَا تَوَّا فَرْحَانْ، مُشْ عْلَى خَاطِرْكُمْ حْزِنْتُوا، آمَا عْلَى خَاطِرْ حُزْنْكُمْ خَلَّاكُمْ اتُّوبُوا. وهُوَّ حُزْنْ كِيفْ مَا يْحِبْ اللَّهْ، وهَكَّا نْكُونُوا مَا ضَرِّينَاكُمْ فِي حَتَّى شَيْ.

¹⁰ عْلَى خَاطِرْ الحُزْنْ الِّي كِيمَا يْحِبُّو اللَّهْ، يْهِزْ لِلتَّوْبَة الِّي تْنَجِّي، ولِّي مَا فِيهَاشْ نْدَمْ. آمَا الحُزْنْ الِّي حَسْبْ العَالِمْ ومَا يْبَدَّلْشْ القَلْبْ، يْهِزْ لِلْمُوتْ.

¹¹ شُوفُوا آشْ عْمَلْ فِيكُمْ الحُزْنْ الِّي كِيمَا يْحِبُّو اللَّهْ: خَلَّاكُمْ تَاخْذُوا المَوْضُوعْ بْجِدِّيَّة، وزِيدْ طْلَبْتُوا السْمَاحْ عَلِّي صَارْ، وتْغَشَّشْتُوا وتْقَلَّقْتُوا، وبَيَّنْتُوا الِّي إِنْتُومَا تْحِبُّونِي وتْوَحَّشْتُونِي، وعَاقِبْتُوا المُذْنِبْ، وظَهَّرْتُوا الِّي إِنْتُومَا أَبْرِيَاءْ فِلِّي صَارْ الكُلْ.

¹² مَالَا، الرِّسَالَة الِّي كْتِبْتْهَالْكُمْ مَا كَانِتِشْ عْلَى خَاطِرْ الظَّالِمْ ولَا عْلَى خَاطِرْ المَظْلُومْ، آمَا بَاشْ يْبَانِلْكُمْ قُدَّامْ اللَّهْ قَدَّاشْ إِنْتُومَا لَاهِينْ بِينَا،

¹³ وهَاذَا الِّي خَلَّانَا نِتْشَجْعُوا. وفُوقْ التَّشْجِيعْ هَاذَا، زِدْنَا فْرَحْنَا أَكْثِرْ عْلَى خَاطِرْ تِيطُسْ كَانْ فَرْحَانْ بَعْدْمَا رَتَّحْتُولُو بَالُو.

¹⁴ ومَا حَشِّمْتُونِيشْ إِنِّي تْفَخِّرْتْ بِيكُمْ قُدَّامْ تِيتُوسْ. وكِيفْ مَا كُنَّا صَادْقِينْ فِلِّي قُلْنَاهُولْكُمْ الكُلْ، كُنَّا زَادَا صَادْقِينْ وَقْتِلِّي تْفَخِّرْنَا بِيكُمْ قُدَّامُو.

¹⁵ ورَاهِي مْحَبْتُو لِيكُمْ قَاعْدَة تْزِيدْ، كُلْ مَا يِتْفَكِّرْ كِيفَاشْ الكُلْكُمْ سْمَعْتُوا كْلَامُو، وكِيفَاشْ إِسْتَقْبِلْتُوهْ بْخُوفْ وإِحْتِرَامْ.

¹⁶ وآنَا فَرْحَانْ الِّي انَّجِّمْ نَاثِقْ فِيكُمْ فِي كُلْ شَيْ.