كُورِنْثُوسْ الثَّانْيَة 2 - العهد الجديد بالدارجة التونسية 2022

¹ هَاذَاكَا عْلَاشْ قَرَّرْتْ بَاشْ مَا نْجِيكُمْشْ، بَاشْ مَا نْحَزِّنْكُمْشْ مَرَّة أُخْرَى.

² إِذَا كَانْ نْحَزَّنْكُمْ، مَالَا شْكُونْ بِشْ يْفَرَّحْنِي بِخْلَافْ الِّي حَزَّنْتْهُمْ؟

³ وكْتِبْتِلْكُمْ الِّي كْتِبْتُو، عْلَى خَاطِرْ وَقْتِلِّي نْجِيكُمْ مَا نْحِبِّشْ نِحْزِنْ بِسْبَبْ الِّي مِالمَفْرُوضْ يْفَرْحُونِي. وآنَا نَاثِقْ إِنُّو الِّي يْفَرَّحْنِي يْفَرَّحْكُمْ الكُلْ.

⁴ وكْتِبْتْهُولْكُمْ وقَلْبِي حْزِينْ ومَهْمُومْ، ودْمُوعِي فِي عِينَيَّا. مَا كَانِشْ قَصْدِي نْحَزِّنْكُمْ، آمَا حَبِّيتْكُمْ تَعْرْفُوا قَدَّاشْ نْحِبْكُمْ.

سَامْحُوا المُذْنِبْ

⁵ ولِّي خَلَّانِي حْزِينْ، مَا حَزَّنِّيشْ آنَا وَحْدِي، آمَا حَزَّنْكُمْ الكُلْ حَتَّى ولَوْ شْوَيَّة، قُلْتْ «حَتَّى ولَوْ شْوَيَّة» بَاشْ مَا نْبَالِغْشْ.

⁶ والرَّاجِلْ هَاذَا يِزِّيهْ العِقَابْ الِّي أَغْلَبِيِّتْكُمْ عَاقْبُوهْ بِيهْ.

⁷ وتَوَّا مِالأَحْسِنْ كَانْ تْسَامْحُوهْ وتْشَجْعُوهْ بَاشْ مَا يُغْرُقْشْ فِي الحُزْنْ.

⁸ هَاذَاكَا عْلَاشْ نُطْلُبْ مِنْكُمْ بَاشْ تْبَيْنُولُو الِّي إِنْتُومَا تْحِبُّوهْ بِالحَقْ.

⁹ وهَاذَا عْلَاشْ كْتِبْتِلْكُمْ، بَاشْ نْجَرَّبْكُمْ ونْشُوفْ إِذَا كَانْ اطِّيعُونِي فِي كُلْ شَيْ.

¹⁰ الِّي تْسَامْحُوهْ آنَا زَادَا نْسَامْحُو، وإِذَا كَانْ فَمَّة حَاجَة سَامَحْتْ عْلِيهَا تِسْتْحَقْ السْمَاحْ، رَانِي سَامَحْتْ قُدَّامْ المَسِيحْ عْلَى خَاطِرْكُمْ إِنْتُومَا،

¹¹ بَاشْ الشِّيطَانْ مَا يِغْلِبْنَاشْ، عْلَى خَاطِرْ أَفْكَارُو مَا تَخْفَاشْ عْلِينَا.

أَحْنَا غَالْبِينْ فِي المَسِيحْ

¹² وَقْتِلِّي وْصِلْتْ لْمْدِينِةْ تَرُوَاسْ بَاشْ نْبَشِّرْ بِبْشَارِةْ المَسِيحْ، لْقِيتْ الِّي الرَّبْ حَلِّي بَابْ لِلْخِدْمَة.

¹³ آمَا تْقَلَّقْتْ بَرْشَة عْلَى خَاطِرْ مَا لْقِيتِشْ خُويَا تِيطُسْ، وَلِّيتْ وَدَّعْتْ الإِخْوَة وسَافِرْتْ لْمَنْطَقْةْ مَقْدُونِيَّة.

¹⁴ الحَمْدْ لِلَّهْ الِّي دِيمَا يْقُودْنَا فِي مَحْفِلْ نَصْرُو بْصِيفِتْنَا مُؤْمْنِينْ بِالمَسِيحْ، ولِّي عْلَى طْرِيقْنَا يْخَلِّي مَعْرِفْةْ المَسِيحْ تُوصِلْ لِلنَّاسْ كِي الرِّيحَة البْنِينَة الِّي تْفُوحْ فِي كُلْ بْلَاصَة.

¹⁵ عْلَى خَاطِرْنَا أَحْنَا بِالنِّسْبَة لِلَّهْ رِيحِةْ المَسِيحْ الطَّيْبَة، الِّي تْفُوحْ بِينْ النَّاجِينْ وبِينْ الهَالْكِينْ،

¹⁶ رِيحِةْ مُوتْ تْوَصِّلْ الهَالْكِينْ لِلْمُوتْ، ورِيحِةْ حَيَاةْ تْوَصِّلْ النَّاجِينْ لِلْحَيَاةْ. وشْكُونْ قَدْ المَسْؤُولِيَّة هَاذِي؟

¹⁷ أَحْنَا مَا نْتَاجْرُوشْ بِكْلَامْ اللَّهْ كِيمَا يَعْمْلُوا بَرْشَة نَاسْ أُخْرِينْ، آمَا نِتْكَلْمُوا بِكْلَامْ صَادِقْ قُدَّامْ اللَّهْ بْصِيفِتْنَا مِتَّحْدِينْ مْعَ المَسِيحْ ومَبْعُوثِينْ مِنْ اللَّهْ.