यूहन्ना 21 - Bagheli Bible

तिबिरियास झील के किनारे चेलन काहीं यीसु देखाई दिहिन

¹ एखे बाद यीसु तिबिरियास नाम के झील के किनारे अपने-आप काहीं चेलन के आँगे प्रगट किहिन, अउर इआमेर से प्रगट किहिन।

² जब समौन पतरस अउर थोमा जउन दिदुमुस नाम से घलाय जाने जात रहे हँय, अउर गलील प्रदेस के काना गाँव के नतनएल अउर जब्दी के लड़िका, अउर उनखे चेलन म से दुइ जने अउर एकट्ठा रहे हँय।

³ समौन पतरस उनसे कहिन, “हम मछरी पकड़ँइ जइत हएन”: तब ऊँ पंचे उनसे कहिन, “हमहूँ पंचे तोंहरे साथ चलब”: तब ऊँ पंचे उहाँ से निकरिके नाव माहीं चढ़िके गें, पय उआ रात माहीं एक्कवठे मछरी नहीं पकड़े पाइन।

⁴ भिनसार होतय यीसु झील के किनारे आइके ठाढ़ भें; तऊ चेला लोग नहीं जाने पाइन, कि ऊँ यीसु आहीं।

⁵ तब यीसु उनसे कहिन, “हे लड़िकव, का तोंहरे लघे कुछू खाँय क हय?” ऊँ पंचे जबाब दिहिन, “कुछू नहिं आय।”

⁶ तब यीसु उनसे कहिन, “नाव के दहिने कइती जाल डारा, त मछरी पइहा”, तब ऊँ पंचे दहिने कइती जाल डारिन, अउर एतनी मछरी जाल माहीं आय गईं, कि ऊँ पंचे जाल काहीं खींच नहीं पाबत रहे आँय।

⁷ एसे ऊँ चेला जिनसे यीसु जादा प्रेम करत रहे हँय, पतरस से कहिन, “ईं त प्रभू आहीं।” तब समौन पतरस इआ सुनिके, कि ऊँ प्रभू आहीं, करिहा माहीं अँगउछी काहीं बाँध लिहिन, काहेकि ऊँ निपरदा रहे हँय, अउर झील माहीं कूद परें।

⁸ पय अउर चेला लोग नाव माहीं चढ़े मछरिन से भरी जाल काहीं खींचत-खींचत आएँ, काहेकि ऊँ पंचे किनारे से जादा दूरी नहीं, बलकिन दुइ सव हाँथ के करीब रहे हँय।

⁹ जब ऊँ पंचे किनारे माहीं नाव से उतरें, त कोइला के आगी जलत देखिन, अउर ओहिन माहीं कुछ मछरी, अउर रोटी पकँइ के खातिर धरी देखिन।

¹⁰ तब यीसु उनसे कहिन, “जउन मछरी तूँ पंचे अबे पकड़े हया, उनमा से कुछ लइ आबा।”

¹¹ तब समौन पतरस नाव माहीं चढ़िके एक सव तिरपन बड़ी-बड़ी मछरिन से भरा जाल, किनारे माहीं खींच लाएँ, अउर एतनी मछरी जाल माहीं रही, हईं तऊ जाल नहीं फाट।

¹² तब यीसु उनसे कहिन, “आबा खाना खा” अउर उन चेलन म से कोहू के हिम्मत नहीं परी कि उनसे पूँछय, कि “अपना को आहेन?” काहेकि ऊँ पंचे जानिगें तय, कि “ऊँ प्रभुअय आहीं।”

¹³ तब यीसु उनखे लघे आएँ, अउर रोटी लइके उनहीं दिहिन, अउर उहयमेर मछरिव दिहिन।

¹⁴ इआ तिसरइआ आय, जब यीसु मरेन म से जिन्दा होए के बाद, चेलन काहीं देखाई दिहिन।

यीसु अउर पतरस

¹⁵ जब ऊँ पंचे खाना खाय चुके, तब यीसु समौन पतरस से कहिन, “हे समौन, यूहन्ना के लड़िका, का तूँ इनसे जादा हमसे प्रेम करते हया?” तब समौन उनसे कहिन, “हाँ प्रभू, अपना त जनतय हएन, कि हम अपना से प्रेम करित हएन”: इआ सुनिके यीसु उनसे कहिन, “हमरे मेम्नन काहीं चराबा।”

¹⁶ तब यीसु समौन पतरस से दुसराय कहिन, “हे समौन, यूहन्ना के लड़िका, का तूँ हमसे प्रेम करते हया?” तब समौन उनसे कहिन, “हाँ प्रभू, अपना त जनतय हएन, कि हम अपना से प्रेम करित हएन”: इआ सुनिके यीसु उनसे कहिन, “हमरे गड़रन के रखबारी करा।”

¹⁷ तब यीसु समौन पतरस से तिसराय कहिन, “हे समौन, यूहन्ना के लड़िका, का तूँ हमसे प्रेम करते हया?” तब पतरस उदास होइगें, कि यीसु तिसराय अइसन कहिन हीं; कि “का तूँ हमसे प्रेम करते हया?” तब समौन उनसे कहिन, “हे प्रभू, अपना त सबय जानित हएन, अउर इहव जानित हएन, कि हम अपना से प्रेम करित हएन”, इआ सुनिके यीसु उनसे कहिन, “हमरे गड़रन काहीं चराबा।”

¹⁸ यीसु पुनि उनसे कहिन, “हम तोंहसे सही-सही कहित हएन, जब तूँ जमान रहे हया, त अपने से तइआर होइके जहाँ चाहत रहे हया, उहाँ चले जात रहे हया; पय जब तूँ बुढ़ाय जइहा, त अपने हाँथ काहीं फइलइहा, अउर दूसर तोंहईं तइआर कइके, जहाँ तूँ न जाँय चइहा, उहाँ तोंहईं लइ जई।”

¹⁹ यीसु ईं बातन से बताय दिहिन, कि पतरस कइसन मउत से परमातिमा के बड़ाई करिहँय; अउर इआ कहे के बाद समौन से कहिन, “हमरे पीछे चलत रहा।”

यीसु अउर उनखर पियार चेला

²⁰ (तब पतरस मुड़िके उआ चेला काहीं पीछे आबत देखिके, जउने से यीसु जादा प्रेम करत रहे हँय, अउर जउन खाना खात माहीं यीसु के छाती कइती झुकिके पूँछिन रहा हय, कि “हे प्रभू अपना काहीं पकड़ामँइ बाला को आय?”)

²¹ उनहीं देखिके पतरस यीसु से पूँछिन, “हे प्रभू, इनखर का हाल होई?”

²² तब यीसु उनसे कहिन, “अगर हम चाही, कि ऊँ हमरे आमँइ तक इहाँ रुके रहँय, त तोंहईं एसे का लेन-देन हय? तूँ हमरे पीछे चलत रहा।”

²³ एसे भाइन माहीं इआ बात फइलगे, कि “ऊँ चेला न मरिहँय;” तऊ यीसु उनसे इआ नहीं कहिन तय, कि “ऊँ न मरिहँय, पय इआ, कि अगर हम चाही, कि ऊँ हमरे आमँइ तक रुके रहँय, त तोंहईं एसे का लेन-देन हय?”

उपसंहार

²⁴ ईं उँइन चेला आहीं, जउन ईं बातन के गबाही देत हें, अउर जउन ईं बातन काहीं लिखिन हीं, अउर हम पंचे जानित हएन, कि उनखर गबाही सच्ची हय।

²⁵ अउरव खुब काम हें, जउन यीसु किहिन रहा हय; अगर ऊँ सगले एक-एक कइके लिखे जातें, त हम समझित हएन, कि जउन किताबँय लिखी जातीं, ऊँ संसार माहीं न समातीं।