यूहन्ना 19 - Bagheli Bible

मउत के सजा के हुकुम

¹ इआ सुनिके राजपाल पिलातुस यीसु काहीं चाबुक मरबाइन।

² अउर सिपाही लोग काँटन काहीं गुँथिके मुकुट बनाइके, यीसु के मूँड़े माहीं धरिन, अउर उनहीं बैगनी रंग के ओन्हा पहिराइन।

³ अउर उनखे लघे आय-आइके कहँइ लागें, “हे यहूदी लोगन के राजा नबस्कार!” अउर थापड़ मारँइ लागें।

⁴ तब राजपाल पिलातुस बहिरे निकरिके उनसे कहिन, “देखा, हम उनहीं पुनि तोंहरे लघे बहिरे लए अइत हएन; जउने तूँ पंचे जानिल्या, कि हम उनखे ऊपर कउनव दोस नहीं पाएन।”

⁵ तब यीसु काँटन के मुकुट अउर बैगनी रंग के ओन्हा पहिरे बहिरे निकरें, अउर राजपाल पिलातुस कहिन, “देखा, ईंन आहीं ऊँ मनई।”

⁶ जब प्रधान याजक लोग, अउर मन्दिर माहीं पहरा देंइ बाले सिपाही उनहीं देखिन, त चिल्लाइके कहँइ लागें, कि “ओही क्रूस माहीं चढ़ाबा, क्रूस माहीं”: तब राजपाल पिलातुस उनसे कहिन, “तुहिन पंचे उनहीं लइ जाइके क्रूस माहीं चढ़ाबा; काहेकि हम उनखे ऊपर कउनव दोस नहीं पाई।”

⁷ तब यहूदी लोग उनहीं जबाब दिहिन, कि “हमरेव पंचन के बिधान हय, अउर उआ बिधान के मुताबिक ऊँ मारि डारँइ के काबिल हें, काहेकि ऊँ अपने-आप काहीं परमातिमा के लड़िका बनाबत हें।”

⁸ जब राजपाल पिलातुस इआ बात काहीं सुनिन, त अउर जादा डेराइगें।

⁹ अउर पुनि किला के भीतर गें, अउर यीसु से कहिन, “तूँ कहाँ से आया हय?” पय यीसु उनहीं कउनव जबाब नहीं दिहिन।

¹⁰ तब पुनि पिलातुस उनसे कहिन, “तूँ हमसे काहे नहीं बोलते आह्या?” काहे तूँ नहीं जनते आह्या, कि “हमहीं तोंहईं छोंड़ि देंइ के अधिकार हय, अउर तोंहईं क्रूस माहीं चढ़ामँइ के घलाय अधिकार हय।”

¹¹ तब यीसु उनहीं जबाब दिहिन, कि “अगर तोंहईं परमपिता के तरफ से अधिकार न दीन जात, त तोंहार हमरे ऊपर कुछू अधिकार न होत; एसे जे हमहीं तोंहरे हाँथ माहीं पकड़ाइस ही, ओखर पाप जादा हय।”

¹² इआ सुनिके राजपाल पिलातुस यीसु काहीं छोंड़ देंइ के उपाय ढूँढ़ँइ लागें, पय यहूदी लोग चिल्लाय-चिल्लाइके कहिन, “अगर तूँ उनहीं छोंड़ि देहा, त तूँ राजा कैसर के साथी न कहइहा; अउर जे कोऊ अपने-आप काहीं राजा बनाबत हय, उआ राजा कैसर के बिरोधी आय।”

¹³ ईं बातन काहीं सुनिके पिलातुस यीसु काहीं बहिरे, उआ जघा माहीं लइगें, जउन “पथरा के चबूतरा” कहाबत रहा हय, जउने काहीं इब्रानी भाँसा माहीं गब्बता कहत रहे हँय, अउर उहाँ राजपाल पिलातुस न्याय के सिंहासन माहीं बइठिगें।

¹⁴ (काहेकि उआ दिना फसह नाम के तेउहार के तइआरी करँइ बाला दिन रहा हय, अउर दुपहर के करीब बारा बजे रहे हँय।) तब ऊँ यहूदी लोगन से कहिन, “देखा, ईंन आहीं तोंहार राजा!”

¹⁵ पय ऊँ पंचे चिल्लाने कि “लइ जा! लइ जा! ओही क्रूस माहीं चढ़ाबा।” तब राजपाल पिलातुस उनसे कहिन, “का हम तोंहरे राजा काहीं क्रूस माही चढ़ाई?” तब प्रधान याजक लोग उनहीं जबाब दिहिन, कि “राजा कैसर काहीं छोंड़िके, हमार कोऊ दूसर राजा न होय।”

¹⁶ तब पिलातुस यीसु काहीं उनखे हाँथ माहीं सँउप दिहिन, जउने ऊँ क्रूस माहीं चढ़ाए जाँय।

क्रूस माहीं चढ़ाबा जाब

¹⁷ तब ऊँ पंचे यीसु काहीं लइगें, अउर यीसु आपन क्रूस उठाए यरूसलेम सहर से बहिरे उआ जघा तक गें, जउन “खोपड़ी के जघा” कहाबत रही हय, अउर ओही इब्रानी भाँसा माहीं “गुलगुता” कहत रहे हँय।

¹⁸ उहाँ ऊँ पंचे यीसु के साथ दुइठे अउर मनइन काहीं, क्रूस माहीं चढ़ाइन, एकठे काहीं दहिने कइती, अउर दुसरे काहीं बाएँ कइती, अउर बीच म यीसु काहीं।

¹⁹ अउर राजपाल पिलातुस एकठे अरोप-पत्र लिखिके, क्रूस माहीं लगाय दिहिन, अउर ओमाहीं इआ लिखा रहा हय, “यीसु नासरी यहूदी लोगन के राजा।”

²⁰ उआ दोस पत्र काहीं खुब यहूदी लोग पढ़िन, काहेकि जहाँ यीसु क्रूस माहीं चढ़ाए गे रहे हँय, उआ जघा सहर के लघेन रही हय, अउर उआ पत्र इब्रानी, लतीनी अउर यूनानी भाँसा माहीं लिखा रहा हय।

²¹ तब यहूदी लोगन के प्रधान याजक लोग, राजपाल पिलातुस से कहिन, “उआ पत्र माहीं यहूदी लोगन के राजा न लिखा।” पय इआ लिखा “जउन यीसु कहिन हीं, कि हम यहूदी लोगन के राजा आहेन।”

²² तब पिलातुस उनहीं जबाब दिहिन, “जउन हम लिख दिहेन, त लिख दिहेन, ओही बदल नहीं सकी।”

²³ जब सिपाही यीसु काहीं क्रूस माहीं चढ़ाय चुके, तब यीसु के जेतने ओन्हा रहे हँय, उनहीं लइके चार हिस्सन माहीं बाँट दिहिन, हरेक सिपाही के खातिर एक हिस्सा, अउर ऊँ उनखे कुरथा काहीं घलाय लिहिन, पय कुरथा बिना सिए ऊपर से नीचे तक बिना रहा हय: एसे ऊँ पंचे आपस माहीं कहिन, “हम पंचे एही न फारी, बलकिन इआ केही मिली, एखे खातिर परची डारी।”

²⁴ इआ एसे भ, कि जउने पबित्र सास्त्र माहीं लिखी बात पूर होय, कि “ऊँ पंचे हमरे ओन्हन काहीं आपस माहीं बाँट लिहिन, अउर हमरे ओन्हा के खातिर परची डारिन।” अउर सगले सिपाही अइसनय किहिन।

²⁵ पय यीसु के क्रूस के लघे उनखर महतारी, अउर उनखे महतारी के बहिनी मरियम, जउन क्लोपास के मेहेरिआ आहीं, अउर मगदल गाँव के मरियम ठाढ़ रही हँय।

²⁶ तब यीसु अपने महतारी अउर उआ चेला काहीं जेसे ऊँ जादा प्रेम करत रहे हँय, लघे ठाढ़ देखिके, अपने महतारी से कहिन; “हे अम्मा, देखा, ईं तोंहार लड़िका आहीं।”

²⁷ पुनि यीसु अपने ऊँ चेला से कहिन, “ईं तोंहार महतारी आहीं”, अउर उहय समय ऊँ चेला उनखर देख-भाल करँइ के खातिर उनहीं अपने घरय लइगें।

यीसु के मउत

²⁸ एखे बाद यीसु इआ जानिके कि अब सब कुछ पूर होइ चुका हय; एसे कि पबित्र सास्त्र माहीं लिखी बात पूर होय, कहिन, “हम पिआसे हएन।”

²⁹ उहाँ सिरका से भरा एकठे बरतन धरा रहा हय, एसे ऊँ पंचे एकठे सोक्खा काहीं, सिरका माहीं बुड़ाइके, जूफा नाम के बिरबा के लकड़ी माहीं धइके, उनखे मुँहे माहीं लगाइन।

³⁰ जब यीसु उआ सिरका पीन, तब कहिन, “पूर होइगा।” अउर ऊँ आपन मूँड़ नीचे काहीं झुकाइके, प्रान छोंड़ दिहिन।

भाला से छेदा जाब

³¹ अउर एसे कि उआ फसह नाम के तेउहार के तइआरी के दिन रहा हय, पबित्र दिन काहीं उनखर लहासँय क्रूस माहीं न लटकी रहँय, काहेकि पबित्र दिन खुब महत्वपूर्न रहा हय। एखे खातिर यहूदी लोग पिलातुस से बिनती किहिन, कि ऊँ हुकुम देंय, कि उनखर टागँय, टोर दीन जाँय, अउर उनखे लहासन काहीं उहाँ से हटाय दीन जाय।

³² तब कुछ सिपाही आइके पहिल मनई के टागँय टोरिन, एखे बाद दुसरे मनई के टोरिन, जउन यीसु के साथ क्रूस माहीं चढ़ाए गे रहे हँय।

³³ पय जब ऊँ सिपाही यीसु के लघे आइके देखिन, कि ऊँ मर चुके हँय, त उनखर टागँय नहीं टोरिन।

³⁴ पय उन सिपाहिन म से एक जने भाला से उनखे पँजरे माहीं छेदिस, त हरबिन उनखे खून अउर पानी निकरा।

³⁵ जउन मनई इआ देखिस रहा हय, उहय इआ गबाही दिहिस ही, अउर ओखर गबाही सच्ची हय; अउर उआ जानत हय, कि हम इआ बेलकुल सही कहित हएन, जउने तुहूँ पंचे बिसुआस करा।

³⁶ ईं बातँय एसे भईं, कि पबित्र सास्त्र माहीं लिखी बात पूर होय, कि “उनखर कउनव हड्डी न टोरी जई।”

³⁷ पबित्र सास्त्र म एकठे अउर जघा माहीं इआ लिखा हय, कि “जिनहीं ऊँ पंचे भाला से छेदिन हीं, ऊँ पंचे उनहिन काहीं देखिहँय।”

यीसु काहीं गाड़ा जाब

³⁸ एखे बाद अरमतिया गाँव के रहँइ बाले यूसुफ, जउन यीसु के ऊपर बिसुआस करत रहे हँय, (पय यहूदी धारमिक अँगुअन के डेरन के मारे इआ बात काहीं बताबत नहीं रहें, कि ऊँ यीसु के ऊपर बिसुआस करत हें) ऊँ पिलातुस से बिनती किहिन, कि “हम यीसु के लहास काहीं लइ जाँइ चाहित हएन”, तब पिलातुस उनखे बिनती काहीं सुनिके, कहिन “लइ जा”, अउर ऊँ आइके उनखे लहास काहीं लइगें।

³⁹ अउर नीकुदेमुस घलाय जउन पहिले यीसु के लघे रात माहीं गे रहे हँय, गन्धरस अउर एलबा नाम के महकँइ बाली दोनव चीजन काहीं मिलाइके, तीस किलो के करीब लइ आएँ।

⁴⁰ तब ऊँ पंचे यीसु के लहास काहीं लइके यहूदी लोगन के गाड़ँइ के बिधी के मुताबिक, यीसु के लहास माहीं महकँइ बाली चीजन काहीं कफन के साथ लपेटिन।

⁴¹ उआ जघा माहीं जहाँ यीसु क्रूस माहीं चढ़ाए गे रहे हँय, उहाँ एकठे बगइचा रहा हय, अउर उहय बगइचा माहीं, एकठे नई कब्र रही हय, जउने माहीं अबे तक कोहू काहीं नहीं धरा ग तय।

⁴² एसे यहूदी लोगन के पबित्र दिन के तइआरी करँइ के दिन होंइ के कारन, ऊँ पंचे यीसु के लहास काहीं उहय कब्र माहीं धरिन, काहेकि उआ कब्र लघे रही हय।