1 पतरस 1 - Bagheli Bible

पतरस के अभिबादन

¹ हम पतरस आहेन, अउर इआ चिट्ठी काहीं लिख रहेन हय, जउन यीसु मसीह के खास चेला आहेन, हम इआ चिट्ठी परमातिमा के चुने उन मनइन काहीं लिख रहेन हय, जउन पुन्तुस, अउर गलातिया, अउर कप्पदूकिया, अउर आसिया, अउर बिथुनिया प्रदेसन माहीं तितर-बितर होइके रहत हें।

² तूँ पंचे पिता परमातिमा के भबिस्य ग्यान के मुताबिक, पबित्र आत्मा से पबित्र कीन जाँय के व्दारा, यीसु मसीह के हुकुम काहीं पालन करँइ के खातिर, अउर उनखे खून से छिनके जाँइ के खातिर चुने गए हया, तोंहईं पंचन काहीं परमातिमा के किरपा, अउर सान्ति बहुतायत से मिलत रहय।

जिअत आसा के खातिर परमातिमा काहीं धन्यबाद

³ हमरे पंचन के प्रभू यीसु मसीह के पिता परमातिमा के धन्यबाद होय, जउन यीसु मसीह काहीं मरेन म से जिआइके, अपने बड़ी दया से हमहीं पंचन काहीं अनन्त जीबन पामँइ के खातिर, जउन जिअत आसा ही, ओखे खातिर नबा जनम दिहिन हीं।

⁴ कि जउने हम पंचे बारिसदार होंइ के उआ हक्क पाय जई, जउन हमरे खातिर स्वरग माहीं सुरच्छित हय, काहेकि उआ हक्क कबहूँ न नास होई, न कबहूँ खतमय होई, बलकिन उआ निरमल रही।

⁵ अउर तोंहार पंचन के रक्छा परमातिमा के सक्ती के द्वारा, बिसुआस से उआ मुक्ती पामँइ के खातिर कीन जात ही, जउन अन्तिम न्याय के दिन माहीं प्रगट होंइ बाली हय।

⁶ अउर इहय कारन से तूँ पंचे खुब आनन्दित होते हया। जबकि इआ बात जरूर हय, कि तूँ पंचे अबे कुछ दिना तक अनेकव प्रकार के परिच्छन माहीं परँइ के कारन, दुखी हया।

⁷ अउर इआ एसे होत हय, कि तोंहार पंचन के बिसुआस, परिच्छा के द्वारा खरा निकरय, अउर तोंहार पंचन के जाँचा-परखा बिसुआस, आगी माहीं ताबा ग, नास होंइ बाले सोन से जादा कीमती हय, जब यीसु मसीह दुसराय अइहँय, त बिसुआस माहीं बने रहँइ के कारन, तोंहईं पंचन काहीं परमातिमा से बड़ाई, महिमा, अउर मान-सम्मान मिली।

⁸ काहेकि तूँ पंचे यीसु काहीं नहीं देखे आह्या, तऊ उनसे प्रेम करते हया, अउर अब त उनहीं बिना देखेन, उनखे ऊपर बिसुआस कइके अइसन आनन्दित अउर मगन होते हया, जउन बखान से बाहर अउर महिमा से भरा हय।

⁹ अउर तूँ पंचे अपने बिसुआस के कारन अपने आत्मा काहीं मुक्ती देबाय रहे हया।

परमातिमा के सँदेस बतामँइ बालेन के गबाही

¹⁰ अउर इहय मुक्ती के बारे माहीं, अउर तोंहईं पंचन काहीं परमातिमा से मिलँइ बाली किरपा के बारे माहीं, परमातिमा के सँदेस बतामँइ बाले, बड़ी सावधानी के साथ, इआ खोजबीन कइके भबिस्यबानी किहिन रहा हय।

¹¹ अउर उनखे भीतर जउन मसीह के आत्मा रहा हय, उआ पहिलेन से इआ बताबत रहा हय, कि मसीह के ऊपर कइसन दुख अइहँय, अउर ओखे बाद कइसन उनखर महिमा होई। अउर मसीह के आत्मा उनहीं पंचन काहीं इहव बताबत रहा हय, कि ईं बातँय कउने समय, अउर कउने दसा माहीं होइहँय, अउर ओखे बाद इआ संसार के का होई।

¹² अउर उनहीं पंचन काहीं इआ बताबा ग रहा हय, कि ऊँ पंचे ईं बातन काहीं बताइके आपन नहीं, बलकिन तोंहार पंचन के सेबा करत हें। अउर जउन खुसी के खबर अब तोंहईं पंचन काहीं, ऊँ मनइन के द्वारा मिली हय, जिनहीं स्वरग से पबित्र आत्मा मिला रहा हय, अउर ऊँ पंचे ओहिन के बताए से, तोंहईं पंचन काहीं खुसी के खबर सुनाइन रहा हय, अउर स्वरगदूत घलाय ईं बातन काहीं देखँइ के बड़ी लालसा करत हें।

पबित्र जीबन जिअँइ के खातिर बोलाहट

¹³ एसे तूँ पंचे मानसिक रूप से सचेत रहा, अउर खुद काहीं काबू माही रखिके, उआ किरपा के खातिर पूरी आसा रक्खा, जउन तोंहईं पंचन काहीं यीसु मसीह के दुसराय आमँइ के समय मिलँइ बाली हय।

¹⁴ एसे तूँ पंचे हुकुमन काहीं मानँइ बाले लड़िकन कि नाईं बना, इआ नहीं कि जइसन तूँ पंचे पहिले, जब मसीह के ऊपर बिसुआस नहीं करत रहे आह्या, त बुरी इच्छन के मुताबिक जीबन जिअत रहे हया, त अब पहिले कि नाईं पुनि न बना।

¹⁵ बलकिन जइसन तोंहईं पंचन काहीं बोलामँइ बाले परमातिमा पबित्र हें, उहयमेर तुहूँ पंचे अपने सगले चाल-चलन माहीं पबित्र बना।

¹⁶ काहेकि पबित्र सास्त्र माहीं घलाय इआ लिखा हय, कि परमातिमा कहत हें, “पबित्र बना, काहेकि हम पबित्र हएन।”

¹⁷ अउर परमातिमा जउन बिना पच्छपात किहे, सगले मनइन के उनखे कामन के मुताबिक न्याय करत हें, उनसे तूँ पंचे हे पिता, कहिके प्राथना करते हया, त अपने-आप काहीं परदेसी समझिके, परमातिमा काहीं सम्मान देत आपन जीबन बिताबा।

¹⁸ काहेकि तूँ पंचे खुदय जनते हया, कि तोंहार पंचन के निकम्मा चाल-चलन, जउन तोंहरे बाप-दादन से चला आय रहा हय, ओसे, तोंहईं पंचन काहीं मुक्ती, नास होंइ बाले सोन-चाँदी से नहीं मिली आय।

¹⁹ बलकिन उआ मुक्ती तोंहईं पंचन काहीं, निरदोस अउर निस्कलंक मेम्ना, अरथात मसीह के अनमोल खून के द्वारा मिली हय।

²⁰ अउर मुक्ती देंइ के खातिर यीसु मसीह काहीं, संसार काहीं बनामँइ से पहिलेन चुनि लीन ग रहा हय, पय अब इआ अन्तिम जुग माहीं तोंहरे खातिर उनहीं प्रगट कीन ग हय।

²¹ अउर तूँ पंचे उँइन यीसु मसीह के कारन, परमातिमा के ऊपर बिसुआस करते हया, जउन यीसु मसीह काहीं मरेन म से पुनि जिआइके, उनहीं महिमा दिहिन, कि जउने तोंहार पंचन के आसा अउर बिसुआस परमातिमा के ऊपर होय।

²² एसे जब तूँ पंचे, भाईचारा के प्रेम के खातिर, सत्य के पालन कइके, अपने-अपने आत्मन काहीं पबित्र किहा हय, त तन- मन लगाइके आपस माहीं एक दुसरे से प्रेम करा।

²³ काहेकि तूँ पंचे नास होंइ बाले बीज से नहीं, बलकिन कबहूँ न नास होंइ बाले बीज से, अरथात परमातिमा के जिन्दा अउर हमेसा ठहरँय बाले बचन से नबा जनम पाए हया।

²⁴ अउर पबित्र सास्त्र माहीं लिखा हय, कि “हरेक प्रानी चारा कि नाईं होत हय, अउर ओखर सगली सुन्दरता, चारा के फूल कि नाईं होत ही, अउर उआ चारा कि नाईं झुराय जात हय, अउर फूल कि नाईं झर जात हय।”

²⁵ “पय प्रभू के बचन जुगन-जुगन तक अटल बना रही। अउर इहय खुसी के खबर के बचन आय, जउन तोंहईं पंचन काहीं सुनाबा ग रहा हय।”