FILEMƆŊ 1 - Bafia Nouveau Testament

Pol à faa ɗii ɗii à tògsì ɓɔ

¹ Mɛ̀ Pol ànɛ ǹɗì kìmbùŋ ɓisuu Yeesus Kiris ɓɛɛ̀ geni wɛ̀m ànɛ lɛ Timote, ɓìsi yɛɛ kani lɛ rì Filemɔŋ à reŋkàŋ wìs a ǹɗem, ànɛ ti kìki kisay kifog rì nyi,

² rì geni wìs a giɓ anɛ lɛ Apya, rì reŋkàŋ wìs anɛ lɛ Arisip ànɛ ti ɗùùɗuu nɗaŋ ɗi nyi, rì Kìseŋi ki Kiris ki ki ti ki taŋzàg ɓi naa yɔ̀ɔ̀.

³ Bɛ̀ll à Seŋi wìs rì Kan Yeesus Kiris ɓɛɛ fa mìni lɛ rì geesɛ̀n rì fyòoog.

⁴ Ǹti ǹfafà Bɛ̀ll wɛ̀m ɓìtògsɛ̀n cààmɛ̀n kìcèm, ǹki yiiyitì wɔ̀ ɓi bɔ̀ŋzɛ̀n yɛm̀,

⁵ lɛ ǹti ǹwowòg di ɓɛɛ̀ kpaakpaa nkɔ̀nɛ̀n, rì ntyweeyi, ɓi u rèresi ɓi san ànɛ yɛ̀ɛ Kan Yeesus rì ɓisuu ɓɛgherɛ̀n ɓɛ̀cèm.

⁶ Ǹti ǹtɔkì nyi lɛ, rìɓa ɗi ù rì ǹɗàrɛn ri ɓìsi ɓi rìgherɛ̀n ɗyɛɛ ki lɛ u konag kì yiì kìrɔɔ kìcèm ki tì rì rì kɔ ɓi cɛɓ ki ti ghɛghɛɓ nɗaŋ ri Kiris.

⁷ Lɛ mɛ̀ɛ nwoogh kìnyàà lɛɛ̀gwey nɗem wu ki kpì mɛ ɓi ɗùm lɛ ǹkɔ̀nɛ̀n ànɛ ù rì rì nyi; ɓisuulɛ mɛ̀rem mɛ ɓɛgherɛ̀n mɛ mmaa lɛ fyòoog lɛ kìsay kɔɔ, geni wɛ̀m.

Pol à ɓɔ̀ŋzaagh nyi ɓisuu Onezim

⁸ Kìɓan kiǹ kɛɛ̀ki, nsoò yɛ̀ɛ Kiris à mɛ fa mɛ ìtèɗ lɛɛ̀gwey lɛ nsiŋdɛn wɔ̀ ɓìɓan ɓi ù ghɛ̀ɛ̀sɛɛ lɛ ù kìkì,

⁹ ki mɓiisɛɛ mɛ̀ kì kɔ̀ni lɛ mɓɔŋzi wɔ̀ ɓi nkɔ̀nɛ̀n. Ɓi rìɓa ɗi mɛ̀ Pol ǹɗì ɗi kìtùg ki mum, à kɛ̀ɛ̀dì kì ɓaà lɛ ɓigomìnɛ ǹɗì kìmbùŋ ɓisuu Yeesus Kiris.

¹⁰ M̀ɓɔ̀ŋzaagh wɔ̀ ɓisuu Onezim à man wɛm̀ ànɛ ǹ-yali ɓi Kiris di ǹɗì ɓi naà-zày.

¹¹ Nnyɛɛ ǹɗìlàg wɔ̀ kɛ̀ɛ̀ gɛɓsɛ̀n abɛ̀y; wɔ̀lɛ ɓigomìnɛ, à ti ɓìsi rì gɛɓsɛ̀n lɛ rì mɛ̀ rì wɔ̀.

¹² M̀pɛ̀ɛ̀zii yì wɔ̀ nyi kìromìì; nyii ri fɛlɛ yɛ̀ɛ kìkàɓ kɛm̀ ki nyoo kidɛŋ.

¹³ Mɛ̀ m̀mɛɛ̀ ɓa ri zày ìnɛ lɛ nɗɔɓ fɛ rì nyi, lɛ a ghɛɛ̀ghɛ̀ɓsì mɛ̀ ɓi sìg wɔ̀ɔ̀ cààmɛ̀n ki ǹkaka rì bɛn ɓisuu Syeesyee à Ɓɔlɛ.

¹⁴ Wɔ̀lɛ mɛ̀ ǹkɔ̀ni ɓi lɛ nki fɔlɔɔ di ǹka wog ɓi fèg wɔ̀ɔ̀, lɛ kìrɔɔ ki ù rì lɛ ù kì mɛ̀ kɛ̀ kɛɛ̀ ɓa yɛ̀ɛ ù kìi kɔ ɓi kàŋbɛn, kɛɛ ɓa kìɓan ki wɛ̀ɛmiɗ ù ɓekii rì syeesyee wɔ̀ɔ̀ a ǹɗem.

¹⁵ Ɓaà yi ɓi Onezim àa nɗì lɛ à ghasɛ̀n ɗì wɔ̀ ɓi maa cààmɛ̀n lɛ di a sugtiì wɔ̀ ɓi ɓyàg rìsugtìì ɗi isuùcèm,

¹⁶ kɛ̀ɛ ɓa ti ǹkpàn, kìɓan kifog rìɓa ɗii ɗi cee ɗi ǹkpàn a zɛy, à ɓa maaseŋi wìs a ǹɗem; i à ki ti maaseŋi wɛ̀m à ǹɗem, à rì ɓiì ɓaà girig aŋkɔ̀ɔ̀ à cee fɔlɔɔ, lɛ rì ɓi bee inɛ ɓi mɛ̀mùù rì ɓi ìnɛ ɓi rìgeni ɗi ɓi Kan ɓiɗùm.

¹⁷ I ki ri lɛ, u seesee mɛ lɛ roŋkàŋ, ghàɓa nyi yɛ̀ɛ ù rì lɛ ù ghàɓ mɛ̀.

¹⁸ I à sɛ̀rìghà kìɓan kidɛŋ rì wɔ̀ nsoò lɛ à rì wɔ̀ rì pon, foŋa ɓi nɗem lɛ ntɛ̀g wu miì wu seesee mɛ̀.

¹⁹ Mɛ̀ Pol yɛɛ kaniì kìɓan kiǹ rì càg kɛm̀ lɛ, ǹɗì wɔ̀ ɓyɔ ɓiì lèɓi; yɛ̀ɛ kɛ̀ɛ n-yiti wɔ lɛ ù rì mɛ̀ rì pon, pon anɛ̀n yɛɛ ri lɛ cɛɓ kɔɔ kɔmiɗ.

²⁰ Ɛ̀ɛ̀ geni wɛ̀m, kìya mɛ̀ kìsay kiǹ ɓi nkɔ̀nɛ̀n à Kan, fɔɔsi mɛ̀ ǹɗem ɓi Kiris ɓiɗùm.

²¹ Yɛ̀ɛ ǹɗì rì ǹtyweeyi lɛ ù ɓiì kìi com ki ǹtɔɔgh, fɔɔnnɛ ǹkàniì wɔ̀; ǹki yii lɛ ù ɓiì kìi com ki ǹkpaa, ù ceesàg.

Pol à romgii ɓɔ ɓìtɔkì

²² Ǹkpaatii wɔ̀ lɛ u pegsɛn mɛ̀ kìden ki naa ɓisuulɛ ǹɗì rì dyàɓɛn lɛ bɔ̀ŋzɛ̀n yin yi ri ɓiì kìi lɛ ɓɛɛ pɛɛ̀ziì mɛ̀ a lɔ̀ŋkin.

²³ Epafiras ànɛ à rì reŋkàŋ wɛ̀m ànɛ tì rì ɓi naà-zày rì nyi, ɓisuu Yeesus Kiris

²⁴ à tɔkii yì wɔ̀, Marikus rì Aristarikɛ rì Demas, rì Lukas ɓɛ ɓɛ ri ɓɛ̀reŋkàŋ ɓɛm ɓɛ kisay ɓɛ togsaagh yì girig wɔ̀.

²⁵ Geesɛ̀n ì Kan Yeesus Kiris yɛ̀ɛ ɓa rì mìni.