Ruti 3 - Seqa Full Bible

Ruti na Boazi Te Ngoyni Ka Borete ni Busoa Bali

¹ Kike tava Naomi ravae Ruti savoy goyti te kue oye, Toqu, aro sa gae me poyta ka namo re kike like, soy re me ku mo kumala no mo ku vanoyni.

² Oye Boazi goyti, sa tungene oyra nabulu qule re ko la jaju una oyra te barue, oye torae qo boysi ro. Vatana! Kose ini oye mela borete oyra busoa bali.

³ Re mo siqe vanoyi no mo talani seninim lum, no mo vapoka oyra mo bubute noyinoyi. Bito ta, re mo zo julo la te ngoyni ka borete ni bali, ba moyna ko vamoyo oye me utini re ko la ku ge, me doka te sada oye me bito oykea ona pitaniaki no luka.

⁴ Sada oye sa bokolo, re mo mia vanoyi la ngoyni oye sa la bekoloa. No re mo zo la mo la takele tomana suae ona bubute lata te teteparae nikini no mo la bokolo. Oye me soynani amo re pita mo joyjini.

⁵ Sanoyi to! Aro me joyjini bito to oyra pisipita ko soyna re, Ruti sa vatavele la.

⁶ Si oye sa zo julo la te ngoyni ka borete ni bali no sa joyjini bito to oye oyra pisipita ravae sa soynani oye.

⁷ Sada Boazi sa bito oykea pitaniaki no luka vaini no sa kola varoka pongoa, oye sa zo la te tomanasuae ngoyni ka quqeni busoa bali, sa la bokolo. Ruti sa zo qanuele la, sa la takele tomana suae bubute lata te teteparae nikini oye no sa la bokolo.

⁸ Te luboro kose like sa pupulema, no sada oye sa boytanga no sa pulisini kike qule sa bokolo vatenge nikinia.

⁹ Ada re, ne? Oye sa tana. Aro mo nabulu Ruti, oye sa vatavele la. Mo riqese kotae mo bubute lata no mo sapeneni aqo, bati re ko boysi aramitaki.

¹⁰ Savoy goyti Boazi, Iaova me manani amo re, toqu, savoy. Tu kamonae goyti sa poyu koye oyra pita ko vatakabola moyna re: Re kama poyta mo kike like varoqa, moyna oye sa boysi tutupari ba sa boysi oza.

¹¹ No sinani, toqu, moyna ko isi. Aro me joyjini koyna amo re oyra pisipita re ko pine. Oyra boysi taba te kumala goyti ka utini re ko kike qule noyi sua.

¹² Sa tuna to aro ko boysi aramitaki, ba sa ku vele kike boysi aramitaki sa vatenge varoka mo like re, sa koye aqo ro.

¹³ Re mo ku aba to goyti kose ini, no te saruku aro me la tanani oye, sada oye sa tuqe me miatoyke amo re, sanoyi to, oye me miatoyke amo re. Ba sada oye kama tuqinivo me miatoyke amo re ne, aro ko pokitini qo ngeoro te tarakenakae Iaova tu, aro me miatoyke amo re. Re mo bokolo, mo ku goyti me doka te saruku.

¹⁴ Savoy ta oye si, Ruti sa bokolo napu vatenge teteparae nikini Boazi, doka te saruku, ba oye sa surutapadire te saruku longoro korovita ka boysi me mia utini tarakenakae ka oye; bati Boazi kama soyko vo ka oye me utini, qule sa me te ngoyni ka borete ni bali.

¹⁵ Boazi savoy vele, Mo kea me aqo ro pua ko speneni avaram no mo zoybuni la te lua. Sada Ruti sa joyjini pita oye sa soyna, Boazi sa vuneke la te bubute vatanga tolongonu kiloqaram bali no sa kea la te kue Ruti. Bito ta, oye sa iro la bali, sa sipele la te kumala.

¹⁶ Sada Ruti sa la doka te kue ravae, Naomi sa tanani oye, Besa jaju voy oyra pita ne, toqu? Savoy ta oye, Ruti sa soynani ravae tabae oyra pita Boazi sa joyjini te kue oye

¹⁷ no Ruti sa soma vele savoy, Boazi sa kea aqo ro vatanga tolongonu kiloqaram bali, oye savoy, kasi zo vele saru la te kue ravam.

¹⁸ Bito ta, Naomi savoy goyti, Mo peri, toqu, me doka sada mutu mia oyra pita me takabula. Boysi goyti sa taka me zengo me doka te sada me vatutungene vanoyi oyra pita goyti te tava ini, savoy.