Ruti 1 - Seqa Full Bible

Naomi na Ruti

¹ Te oyra sada oyra Bue veveni ka kinikini moyna oyra boysi ni Izireli, ngada poyu sa voye vodu naoyene, no kike boysi ni Betilema te kolabae vodu ni Juda, sa koype ona qule no keri toytulike soy, oyra ka sopo, ka la ku boysi gagalea te vodu ni Moabi.

² Ritongoa boysi goyti ne Elimeleki, ritongoa ona qule ne Naomi, no ritongoa keri ona so ne Maloni na Kilioni. Oyra ka boysi ni te pupu ni Eparaiti ka ku Betilema, te kolabae vodu ni Juda. No oyra ka zo la Moabi no ka la ku ge.

³ Sinani Elimeleki, like te Naomi, sa li, no Naomi sa naboko, sa vakakue to keri toytulike.

⁴ Oyru kuru reke keri qule ni Moabi, ritongoa doyru ne, kike Opa no vakeria Ruti. Totakae sada oyra ka la ku Moabi gae mano ave,

⁵ oyru Maloni na Kilioni kuru li napu vele, no Naomi sa ku veke to tani, kuru kareo keri toytulike no sa kareo ona like soy.

⁶ Sada oye sa ba la ku Moabi, Naomi sa ase Iaova sa me tude noypo oyra ona boysi, no sa va masuru noypo doyra barue, Naomi no keri ravae qule ka aquru ka kesini vodu ni Moabi ka vele la te vodu vatasuku te Naomi.

⁷ Naomi no keri ravae ka kesini ngoyni ka kue no oyra ka vakike tasoybaka la te zoka sa zo vele voyla te vodu ni Juda.

⁸ Te luboro doyra tasoybaka, Naomi sa soynani keri ravae qule, Sipele vele, keria mibu to, te pade te sinae mibu. Iaova me vatere kamonae te kue ram, sasoyva ram kam vatere kamonae te kue oyra ka li, ka kesini moyna aqo ro no soyva aqo ro soy.

⁹ Iaova me vamoyo rabu mibu pale noypo mibu like voy mibu la ku vanoyni te ona kumala, savoy. Savoy ta oye, Naomi sa noko kukuloyini oyru no oyru kuru qila uku ukulu,

¹⁰ no oyru kuru voy goyti te kue oye, Raru muru vele koype to amo re te kue oyra mo boysi re, kuru voy.

¹¹ Ba Naomi savoy te kue oyru, Kareo, rabu toqu, rabu mibu sipele vele temibu kumala. Besavoy rabu kabu soyko koype aqo ro, ne? Rabu kabu nanana aro ko majala vanganuru vele ka solike te pipisiqu, me mibu like kabu voy, ba?

¹² Vele napu, rabu keri toqu; Aro ko balava varoka kama gae vo aqo me pale vele ka like. Ba moyna aro sa ku qo kokomeni me mao me pale ka like kutae te kose ini te no me vapudo vele ka toqulike soy ne,

¹³ besavoy, rabu kabu majala perini sada oyru muru zopuka te kaji, ba? Besavoy, kama majala mibu soyko reke ka like veke vele, ba? Kareo rabu toqu. Bati taba oyra pita aro ko tepere sa paza varoka te kue aqo ro no te kue rabu, bati koyrisi Iaova sa aratara te kue aqo ro!

¹⁴ Te ngoyni goyti oyru kuru qila napu. Savoy ta, Opa sa noko kukuloyini ravae, ba Ruti sa kange toyro to Naomi.

¹⁵ Mi la, savoy Naomi, ravam Opa kiti sipele vele la te kue oyra ona boysi no ona bangara soy. Re mo koype la oye, mibu sipele vele rabu, savoy.

¹⁶ Ba savoy goyti Ruti te kue oye, Moyna ko peqani aqo me kesini amo re o me zo vele ni amo re, bati ngoyni mo lae re, aro me lae to, ngoyni mo la kue re te kuse ini, aro me la kue, oyra mo boysi re moyra boysi vatasuku te ro no mo Bangara re me qo Bangara ro soy.

¹⁷ Ngoyni re mo lia, aro me lia, no te ngoyni ta moyra la luduni aqo ro. Li to me ota amo re no aqo ro, ba sada aro ko vamoyo ka pita me ota itu ne, Lipulipu poyu sua te Iaova me doka te kue aqo ro, savoy.

¹⁸ Sada Naomi sa miautini Ruti sa karapota varoka ona nanana me koype oye si oye kama soyna veleo ka pita te kue oye.

¹⁹ Si oyru kuru zo la to, kuru la doka Betilema. Sada oyru kuru la doka Betilema, oyra boysi taba te kumala lata ka nunutirini oyru bati oyru kuru la doka no oyra qule ni Betilema ka tana vaga, Oye moyna to Naomi te goyti, ba? kavoy.

²⁰ Moyna kam kelikini aqo Naomi, oye sa soynani oyra. Ba mina kelikini aqo ro Mara, bati Bangara Varavaranga sa va paza varoka qo tu.

²¹ Sada aro ko kesini ngoyni goyti ko puda, ba sinani te Iaova sa koype velini me aqo, ko vele saru me. Besavoy ram kam kelikini aqo Naomi ne? Iaova sa va tepere ni aqo taba taka; Bangara Varavaranga sa va pioka sua aqo ro, savoy.

²² Savoy ta oye si, Naomi sa kesini Moabi, sa koype ravae Ruti, qule ni Moabi, oyru kuru la doka Betilema te tototua sadae papala te barue bali.