Leviticus 27 - Seqa Full Bible

Vavotoa pui te kue Iaova

¹ Iaova savoy te kue Mosese,

² Soynani oyra boysi ni Izireli: Sada ka oye sa kea kieke boysi te kue Iaova te vavotoa ona moynini, boysi ta sa majala talopu te oyra nguta goyti,

³ ngutae boysi lieke sa karabite doka te unomongulu ave, sa loymangulu siliva, sa nadu te nguta ka kodo ni oyra boysi sisiama,

⁴ no sada quole sa karabite doka te unomongulu avea, tolongonu siliva.

⁵ Sada boysi sa loyma doka te karabite avea, boysi lieke: karabite siliva no boysi quole: mano siliva.

⁶ Sada oyra soso sa kieke ukene doka te loyma avea doyra, oyra lieke: loyma siliva no oyra quole: tulu siliva.

⁷ Sada boysi kaji sa unomongulu sa zopuka avea, boysi lieke, manoloyma siliva no boysi quole, mano siliva.

⁸ Sada kieke boysi oza sua sa moynini me ngota nguta ka vanoydo oyra boysi sisiama ba kama moyuni vo, oye me koype la boysi ta te kue boysi sisiama, boysi sisiama me vajele nguta te pada sa gae boysi ta sa majala ngota.

⁹ Sada oye sa moynini me vavakatua pitapupura te kue Iaova, oyra pitapupura sa seva ta ka kea te kue Iaova sa tataboyna.

¹⁰ Oye kasi vo arasokani pitapupura sa tu vanoyi te pitapupura kama tu vanoyi vo, ba kasi vo arasokani pitapupura kama tu vanoyi vo te pitapupura sa tu vanoyi; sada oye sa arasokani pitapupura, keria to pita pupura sa tataboyna.

¹¹ Sada pitapupura oye sa moynini kama dalo vo, pitapupura ta kama gae vo mara kea la te kue Iaova, pitapupura ta mara iro la te kue boysi sisiama,

¹² oye me aratanaeni noyia ba rokae pitapupura ta. Ka nguta sa koduni to boysi sisiama oye to ta nguta mara ngota ni pitapupura ta.

¹³ Sada boysi sa tungene pitapupura sa soyko me ngota velini ona pitapupura, oye me kea poka kieke loyma te ngutae pitapupura.

¹⁴ Sada kieke boysi sa kea ona pade saseva kieke pita sa taboyna te kue Iaova, boysi sisiama me aratanae ni pade ta moyna sa noyi ba kama noyi vo. Ata ka nguta sa koduni boysi sisiama, oye to ta nguta mara ngota ni pade ta.

¹⁵ Sada boysi sa kea ona pade sa ngota velini, oye me pema poka kieke loyma te ngutae pade, no pade ta me tungene noypo oye.

¹⁶ Sada kieke boysi sa kea te kue Iaova takodea lua te ona pupu, ngutae lua ta mara vanoydo te tunurinia pita titiba ka majala teba te lua ta, mano siliva mara ngota ni karabite kiloqaramu poytua bali.

¹⁷ Sada oye sa kea ona lua te kue Iaova te ave lopo vavelini, nguta sa kuo vanadu moyna to.

¹⁸ Ba sada oye sa kea ona lua te kue Iaova te rokusua ave lopo vavelini, boysi sisiama me kodo vajele ngutae me voto te tabae ave aba sa kuo me doka napu ave lopo vavelini.

¹⁹ Sada boysi sa kea lua te kue Iaova sa soyko me ngota velini ona lua, oye me pema poka kieke loyma te ngutae lua, no oye me tungene noypo ona lua.

²⁰ Sada oye kama ngota velini vo ona lua, ba sada oye sa vangunguta te kue ka oye vele ona lua, lua ta kama majala vo oye me ngota velini noypo.

²¹ Sada lua sa talopu te ave lopo vavelini, lua ta me tataboyna, sa seva kieke lua sa tavoylaka veke te kue Iaova; lua ta mara tungene vatasuku oyra boysi sisiama.

²² Sada kieke boysi sa kea te kue Iaova lua oye sa ngota, lua noyene kama takodekea vo lua te oyra ona pupu,

²³ boysi sisiama me joyjuni ngutae lua ta me voto te pasi ave aba sa kuo doka te ave lopo vavelini, no boysi sa tungene lua me ngota velini moyna to ona lua te tava ta te pasi ka koduni sa seva kieke pita sa taboyna te kue Iaova.

²⁴ Te ave lopo vavelini, lua mara kea velini te kue boysi sa tungene.

²⁵ Susupae nguta mara koype nguta ka vanoydo oyra boysi sisiama, mara pada te mano qaramu.

²⁶ Kareo ka boysi me kea pitapupura puodo kinaka te kue Iaova, bati pitapupura puodo kinaka ona moyna to Iaova; moyna kieke bulumakao ba kieke sipi, pitapupura ta ona moyna to Iaova.

²⁷ Sada pitapupura ta kama dalo vo, oye sa majala ngota velini te nguta ka kodu ni oyra boysi sisiama, mara pema poka kieke loyma te nguta ka koduni oyra boysi sisiama soy. Sada oye kama ngota velini vo, boysi sisiama sa majala vangunguta pitapupura ta te kue ka boysi vele.

²⁸ Kareo ka pita boysi sa tungene oye sa majala vangunguta ba ngota velini te kue Iaova, moyna kieke boysi ba kieke pitapupura ba lua kam tungene te kue oyra mina pupu; oyra pita ta sa tungene vatasuku Iaova.

²⁹ Boysi sa joyjuni pita sa roka sua kama majala vo me talopu; oye mara voyevale moyna to.

³⁰ Kieke manoa doyra oyra pita ka poto me te lua, moyna poytu te lua ba oyra verea azu, sa ona Iaova; sa tataboyna te kue Iaova.

³¹ Sada kieke boysi sa soyko me ngota velini kieke manoa oyra ona pita titiba te lua, oye me pema poka kieke loyma te nguta ka koduni oyra boysi sisiama.

³² Kieke manoa bulumakao no sipi kam ngea, susupae vamanoa doyra oyra pitapupura ka koye puru te sepati, ka tataboyna te kue Iaova.

³³ Oye kasi vo vene oyra pitapupura ka mimi noyi no toyro sia oyra ka mimi roka ba kasi vo arasokani. Sada oye sa arasokani pitapupura, keria to pitapupura kuru tataboyna no kama majala doyra mara ngota velini.

³⁴ Goyti oyra tamana Iaova sa koyna Mosese te supu ni sainai mara vauteve oyra boysi ni Izireli.