Leviticus 26 - Seqa Full Bible

Poraea aravautovo

¹ Kasi joyjuni bangara sosolaka ba tuteve vovoju ba kasi vadere kieke katora vojele, no kasi toyru ni katora ram kam tuteve te vodu ram kam kue voy mam vazaka. Aro Iaova mina Bangara.

² Miatoyke qo tava taboyna no me kuo mina padapada te ngoyni taboyna. Aro Iaova.

³ Sada ram kam koype oyra qo vato no kam vauteve vanoyi oyra qo tamana,

⁴ Aro me peqani moyqa te oyra sada sa taveni, no lua me masuru no oyra azu mara vere vataba.

⁵ Ram mam beleke lezu me doka te sada me miqa napu petae vaini mam papala no mam papala me doka te sada mam titiba, no ram mam pale pitanaki sa gae te mina soyko no mam kuo vasasapu te mina vodu.

⁶ Aro me kea bole te kue ram, no sada ram mam bokolo te pam, kareo ka pita me vaisi ram. Aro me vakoyu oyra pita peru te vodu ram kam kue, no oyra mina kana kama majala doyra aratara koype ram.

⁷ Ram mam koyle rokisini oyra mina kana, no ram mam voyvale taba oyra mina kana te aratara.

⁸ Loyma to ram mam voyevale kieke ubi boysi te aratara, no kieke ubi ram mam voyevale mano mau boysi te aratara, no ram mam voyevale oyra mina kana te aratara.

⁹ Aro me mi latu te kue ram no aro me vavere vataba ram no me vazadeve ram no aro me vavoto qo vato arapokitini te kue ram.

¹⁰ Ram aba mam oyke to oyra mina papala te ave sala ne me doka te sada ram mam vanukere sia oyra mina papala bana no mam sute la mina papala varoqa.

¹¹ Aro me kuo koype ram, no aro kama majala qo sukini ram.

¹² Aro me kuo te kue ram no me mina Bangara, no ram mam oyra qo boysi ro.

¹³ Aro Iaova mina Bangara, ko koype kesini ram Ijipi voy ram kasi mina kuo sika vele te kue oyra boysi ni Ijipi; Aro ko lopo mina ero noyqata no ko vamoyo ram mam zo vasagamana te ngoyni mam tae.

Taka te boysi sa voye vato

¹⁴ Ba sada ram kama vanata mina aqo ro no kama vauteve mina taba tamana goyti,

¹⁵ no sada ram kam sukini oyra qo vato no kam mia sia oyra qo tamana no kama padapadani mina qo vato arapokitini,

¹⁶ Aro me vataka ni ram te oyra zoka goyti: Aro me peqani taka te kue ram, me pale ram moro sa taka mara ole no voele karapota me vaborososa matae mina no me vatoko mina tu. Mina titiba ram me kareo to nanaziae, bati mara oyke oyra mina kana.

¹⁷ Aro me vititotaka ni ram voy oyra mina kana mara vangala ram; oyra ka kolini ram mara voyvoytuni ram, no ram mam isi voy mam paki sada kareo ka boysi sa koyle rokisini ram.

¹⁸ Te rokusua taba oyra pita goyti sada ram kama vanata mina aqo ro, Aro me vataka ni ram te mina zaqala vetu sada me koyini.

¹⁹ Aro me kobele karapotae mina vazaka napu no te maloykanae kasi vo tae me moyqa no lua me kava no me seva qemae aeana.

²⁰ Mina karapota me la te oyra jaju ram mam joyjuni, me vazae ram, bati lua kama majala vo putoa ka pita.

²¹ Sada ram aba kam vakoyu aqo ro no kama soyko mina vanata aqo ro, Aro me pema poka mina taka vetu sada me koyini, sa seva ngutae oyra mina zaqala.

²² Aro me peqani oyra pita peru mara vataka ni ram, no oyra pita peru mara voyevale oyra toytu mina, oyra mina pitapupura no kavia to ram mam kuo sua voy oyra mina zoka me bobosu.

²³ Sada taba taka goyti sa doka ba kama tasuka vo mina nanana ram voy mina liboro me te kue ro ba aba kam vakoyu aqo ro ne,

²⁴ Aro me vakoyu ram no me vatakani ram te oyra mina zaqala vetu sada me pema poka.

²⁵ No aro me vamoyo oyra mina kana mara aratara koype ram bati ram kam voye qo vato arapokiti. Sada ram kam araququni voy mina kakaolo te mina kumala lata, Aro me peqani moro poyu te kue ram, no aro me vala ram te koyrisia doyra oyra mina kana.

²⁶ Sada aro me pote vajele kenakenae bereti, kieke to niqoto mara oyke mano tatama, no oyra mina quole mara kena bereti ta te susupae tatama, ba ngoynisoi to me pale kieke tatama soy. Ram mam oyke, ba sa taka mina komani.

²⁷ Sada taba taka goyti sa doka ba ram aba kama vanata mina aqo ro ba kam vakoyu aqo ro,

²⁸ sinani te qo moma Aro me vakoyu to ram, no taqo to ro me valipulipu ram te oyra mina zaqala vetu sada me pema poka.

²⁹ Ram mam oyke zioa doyra oyra toytu lieke no toytu quole mina.

³⁰ Aro me piro sia oyra mina ngoyni vazaka te supu, me piro sia oyra sara vavakatu nanabu noyi kam vavakatu ni oyra katora kam tuteve vaseva ni ngada no me koani poka oyra momoqutua mina te oyra mina vuvuju kam vazaka, no Aro me mia sia ram.

³¹ Aro me pirosia oyra mina kumala no me pirosia oyra pade kam vazaka ni mina bangara, no Aro sa taka me kemani nanabu noyia oyra mina vavakatu.

³² Aro me vazalana mina vodu, voy oyra mina kana ka kuo te ngoyni ta mara puloso.

³³ Aro me vapiriparakata ram te kue oyra tubia boysi no me koyli ni ram qo lato aratara. Mina vodu me zalana, no mina kumala me tapiro.

³⁴ Savoy ta oye vodu sa kemani oyra avea mamana tabasada bati vodu sa zalana no ram mam la kuo te vodu te oyra mina kana.

³⁵ Tabasada vodu me zalana, vodu me pale mamana kama pale moyna vo te oyra sadae mamana sada ram kam kuo moyna te vodu.

³⁶ Seva te kue oyra ka kuo sua, Aro me vatotoqu pongoa doyra mara isi varoka te vodu te oyra doyra kana voy oyra mara poykini oselea vovosele sa vesele voyrangae azu. Oyra mara paki sa seva oyra ka poykini oyra doyra kana, no oyra mara suru, pitaulomo kareo ka boysi sa koyle rokisini oyra.

³⁷ Oyra mara arataqatoypara napua tana doyra sa seva ka poykini lato aratara pitaulomo kareo ka oye sa koyle rokisini oyra. Ram me takani ram diere vanadu no aratara koype oyra mina kana.

³⁸ Ram mam la lie te kue oyra tubia boysi; mara ludo ram te vodu te oyra mina kana.

³⁹ Oyra ka kuo sua mara sora te vodu te oyra doyra kana; bati te zaqala te oyra tamae doyra oyra mara sora seva oyra.

⁴⁰ Oyra mara varingini doyra zaqala no zaqala te oyra tamae doyra, doyra jaju roka te tarakenaka qu ro no doyra kuo vakoyu ni aqo ro.

⁴¹ Aro me kuo vakoyu te kue oyra voy Aro me peqani la oyra te vodu te oyra doyra kana, sada sa doka te oyra sada ta, pongoa doyra me tasuka no mara tuqini mara taka tae doyra zaqala,

⁴² Aro me noynetoyro qo vato arapokiti te kue Jekope no qo vato arapokitini te kue Aisake no qo vato arapokitini te kue Ebarami, no Aro me noyne toyro qo moynini te kue ram te zozoa vodu Aro ko koyna ram.

⁴³ Bati oyra boysi mara vazalana vodu no vodu me kemani mamana te sada sa zalana kama kue doyra oyra. Oyra mara taka tae doyra zaqala bati oyra ka pejae doyra koype qo tamana no ka mia sia oyra qo vato.

⁴⁴ Goyti kama bibietoa vo, te sada oyra kala kuo te vodu te oyra doyra kana, Aro kasi qo sukini oyra ba mia sia oyra no kasi qo vaupu oyra, kasi qo voye qo vato arapokiti te kue oyra. Aro Iaova doyra Bangara.

⁴⁵ Ba te noyia doyra oyra Aro me noynetoyro vato arapokiti te kue oyra tamae doyra, oye oyra ko koype kesini me ro Ijipi te matae doyra oyra tubia boysi Aro me doyra Bangara. Aro Iaova.

⁴⁶ Goyti oyra vato, tamana no aravautini Iaova sa kea Mosese te supu ni Sainai mara koype oyra boysi ni Izireli.