Leviticus 25 - Seqa Full Bible

Ave Mamana

¹ Iaova savoy te kue Mosese te supu ni sainai,

² Soynani oyra boysi ni Izireli: Sada ram kam la puka te vodu Aro me koyna ram, ram moyna kam zetuni ka pita te vodu noyene te ave mamana, voy mam noyne vamajele Iaova.

³ Te unumo ave ram mam titiba, mam ngongotoni, no papala te mina barue vaini.

⁴ Ba te vavetua ave kasi zetuni ka pita te vodu, sa ave ram mam toyro bieto oyra mina jaju no mam padapadani Iaova. Kasi titiba te mina barue ba ngongotoni oyra mina barue vaini.

⁵ Kasi pale verea pita sa puto to tani ba kasi joke oyra verea vaini kama ngongotoni mina. Lua mam vamamene te avea mamana.

⁶ Ka poytu sa puto te ave ta kama teba doyra, mam oyke ram, mina nabulu lieke no nabulu quole, no oyra mina boysi jaju kam koyna oyra nguta no oyra boysi kuokapa ka me kuo te kue ram soy,

⁷ taba pitanaki ta mam purini oyra mina pitapupura no oyra pita peru te mina vodu. Oyra pita ka puto tana doyra te vodu kam majala oyke.

Avea lopo vavelini oyra pita

⁸ Ngea vetu vuiki te vetu ave, tunurinia ne vatingulu zia ave.

⁹ Savoy ta oye, poqo kuili te susupae ngoyni ram kam kue te vamanoa tava te vavetua ukene; te tava ka sivere mina zaqala.

¹⁰ Vatoybo valoymangulua ave no soyna vatakabola lopo vavelinia oyra pita te kue oyra boysi taba te vodu ram kam kue. Sa sadae ram mam lopo vavelini oyra lua te boysi ram kam ngota moyna; susupae sika mara lopo vavelini te kue ona tatama no te kue ona pupu soy.

¹¹ Te valoymangulua ave sa sadae lopo vavelinia oyra pita te kue ram, kasi mina titiba no kasi mina pale oyra pita ka puto tana doyra ba kasi mina joke verea vaini kama ngongotoni mina.

¹² Ave goyti sa sadae lopo vavelinia oyra pita no sa ave taboyna te ram; oyke to pita sa puto to tani te oyra mina barue.

¹³ Te avea lopo vavelinia oyra pita, ram mam la tungene noypo oyra lua ram kam tungene moyna me.

¹⁴ Sada re ko vangunguta lua te kue kieke boysi ni Izireli ba ko ngota ka lua te kue oye, kasi aravaquqo napu tanamibu.

¹⁵ Sada re ko ngota velini mo lua te kue boysi ni Izireli mo ngota te tunuria ave sa kuo sinani me doka napu ave ram mam noyne toyro noypo sada ta. No oye me vangunguta te kue re lua te tunuria ave sa kuo sinani me doka napu avea ram mam noyne toyro noypo sada ta soy.

¹⁶ Sada sa taba ave sa kuo me doka sada mara noyne toyro ave lopo vavelini ne, re mo vapoyu nguta, no sada kama taba vo ave sa kuo mara noyne toyro ave lopo vavelini ne, re mo vasoi nguta, bati pita oye sa vangunguta te kue re ne tabae oyra pita titiba sa poro me te lua.

¹⁷ Kasi aravaquqo napu tanamina, ba mam padapadani mina Bangara. Aro Iaova mina Bangara.

¹⁸ Koype oyra qo vato no mam vauteve oyra qo tamana, no ram mam kuo vanoyi te vodu Aro me koyna ram.

¹⁹ Vodu me masurua oyra pita titiba, no ram mam pale pitanaki sa gae te kue ram no mam kuo vasasapu te ngoyni ta.

²⁰ Moyna ram mam tana, ata pita rami mami oyke te vavetua ave sada rami kama titiba mami ba sada rami kama pale mami pitanaki?

²¹ Aro me manani lua te vaunomoa ave soy lua me masuru me poroa me pitanaki me gae mara oyke tulu ave.

²² Te sada ram mam titiba te vaviua ave, ram mam oyke pita titiba bana no mina oyke toyro pitanaki ta me doka te sada me miqa pita titiba te vaziae ave.

²³ Boysi sa ngota lua kasi vo tungene lua ta te ngavae ona tu, bati lua sa qo ro no ram kam seva oyra boysi kuokapa no kam qo boysi aramitaki.

²⁴ Poyua vodu ram kam tungene, ram mam vamoyo mara ngota velini.

²⁵ Sada kieke te boysi ni Izireli sa oza no sa vangunguta kavia lua oye sa tungene, torae petae oye me ngota velini oyra pita sa vangunguta oye.

²⁶ Sada kieke boysi sa kareo ka torae me ngota velini koyna oye lua ba oye sa tungene tani kisa no sa majala tani ngota velini ona lua ne,

²⁷ oye me utini ave oye sa vangunguta lua no me ngota oyra pita titiba te sada sa kuo me doka te sada oyra mara noyne toyro noypo ave lopo vavelini, sinani me vele napu te kue oye oyra ona pita tutungono.

²⁸ Ba sada oye kama tungene vo kisa me majala ngota velini ni oyra ona pita tutungono, oyra pita oye sa vangunguta me kuo to te karapota te boysi sa ngota me doka te ave oyra mara noyne toyro avea lopo vavelini.

²⁹ Sada kieke boysi sa vangunguta kieke pade te luboro pusae kumala lata ne, te luboro kieke ave oye sa majala ngota velini pade ta te kue boysi sa ngota moyna. Te sada ta oye sa majala ngota vavelini noypo ona pade.

³⁰ Sada oye kama ngota velini vo ona pade sa bieto la kieke ave ne, pade sa kuo te luboro pusa te kumala lata me tungene vatasuku to boysi sa ngota no ona pupu soy. Boysi sa vangungutae kama majala vo ngota velini te sada mara noyne toyro ave lopo vavelini

³¹ Ba oyra pade ka kuo te kumala kama posa doyra. Oyra pade ta ka majala ngota velini, no oyra pade ta mara vavelini te sada mara noyne toyro ave lopo vavelini.

³² Oyra boysi te juojulo te livai mara ngota velini oyra doyra pade te doyra kumala tana doyra.

³³ Si oyra pita ka tungene oyra juojulo te livai mara ngota velini, kieke pade ka vangunguta te ka kumala oyra ka tungene ne, mara lopo vavelini te sada oyra mara noyne toyro ave lopo vavelini, bati oyra pade te kumala te oyra juojulo te livai ne sa oyra doyra pita tutungono moyna to oyra sa kuo te kue oyra boysi ni Izireli.

³⁴ Ba lua sa puoto vanoyia sisiu te aralequtua kumala te oyra juojulo te livai kasi doyra vangunguta; ta sa doyra ngoyni ka tungene vatasuku oyra.

³⁵ Sada kieke boysi ni Izireli sa oza no sa takani me saete noypo tani, saete vanoyi oye sa seva ram kam saete oyra boysi kuokapa ba oyra boysi aratuda, voy oye me kuo koype ram.

³⁶ Kasi pale ka adoa kisa puka te kue oye. Ba mam padapadani mina Bangara, voy oye me kuo vanoyi te kue ram.

³⁷ Kasi pale kisa puka te kue oye sada kam koyna oye kisa ba kasi pale koyini pitanaki te kue oye sada kam koyna oye pitanaki.

³⁸ Aro Iaova mina Bangara, ko koype kesini ram Ijipi me koyna ram vodu ni kenani no me mina Bangara.

³⁹ Sada kieke te oyra boysi ni Izireli sa oza no sa vangunguta noypo tani te kue ram, kasi vajaju vaseva ni oye kieke sika.

⁴⁰ Mam vaseva ni oye kieke mina boysi jaju kam ngota ba kieke boysi aratudae; oye me jaju koyna ram me doka te sada ram mam noyne toyro ave lopo vavelini.

⁴¹ Sinani oye no oyra toytu mara talopu, no oye me vele napu te ona pupu no te kue oyra ona boysi.

⁴² Bati oyra boysi ni Izireli ka qo nabulu ro, oyra boysi ko koype kesini me ro oyra Ijipi, kasi doyra vangunguta vasevani oyra sika.

⁴³ Kasi vapitauleme oyra, ba mam padapadani mina Bangara.

⁴⁴ Oyra mina sikalieke no sika quole mara tae me te oyra tubia boysi te aralequtua mina ram; te kue oyra mam ngota ni ram oyra mina sika.

⁴⁵ Ram mam ngota vele kavia boysi kuokapa aba ka me kuo koype to ram no oyra boysi kuokapa ka tae me te pupu te oyra ka puodo te mina vodu, no oyra mara mina boysi sika.

⁴⁶ Ram kam majala voyko soma oyra te kue oyra mina so voy oyra mara tungene oyra no me doyra sika te ngavae doyra tu, ba ram kasi vasisideke oyra boysi ni Izireli.

⁴⁷ Sada boysi kuokapa ba boysi aratudae aba sa me kuo koype to ram sa tutupari no kieke te oyra boysi ni Izireli sa oza no oye sa vangunguta noypo tani te kue boysi kuokapa sa kuo koype ram ba te kue kieke boysi kuokapa sa tae me te pupu te oyra boysi kuokapa,

⁴⁸ oye ka majala to ngota velini te rokusua sada oye sa vangunguta noypo tani. Kieke te oyra torae sa majala ngota velini oye:

⁴⁹ Tamae lata ba likae lata ba ka torae madakae to oye te ona pupu sa majala ngota velini oye. Ba sada oye sa boysi majala oye me ngota velini noypo tani.

⁵⁰ Oye no boysi sa ngota velini oye muru ngea toto te ave oye sa vangunguta noypo tani me doka te sada ram mam noyne toyro ave lopo vavelini. Ngutae talopu te oye me lolo nguta ka koyna oyra boysi ka ngota oyra te jaju oyra ka joyjuni te tabae ave.

⁵¹ Sada aba taba ave sa kuo sinani oye me talopo oye me ngota koyini tunurinia kisa ka ngota ni oye.

⁵² Sada kavia to ave sa kuo me doka te ave lopo vavelini, oye me ngea oyra sada ta no me ngota te tunurinia kisa sa gae oye me kea.

⁵³ Oye mara vasevani kieke boysi jaju ka ngota te oyra ave; ram mam mia vale boysi sa ngota oye kasi vo vasisideke oye.

⁵⁴ Moyna sada oye kama ngota velini doyra te oyra zoka goyti, oye no oyra ona so mara talopu moyna to te ave lopo vavelini,

⁵⁵ Bati oyra boysi ni Izireli ka qo nabulu ro ko koype kesini me oyra Ijipi. Aro Iaova mina Bangara.