Leviticus 24 - Seqa Full Bible

Miatoykea ngaji no bereti moyra Kea te kue Iaova

¹ Iaova savoy te kue Mosese,

² Voytuni oyra boysi ni Izireli mara iro me oela olivi popoqusu sa dara vanoyi mara nite te ngaji voy ngaji me katu taru.

³ Te paqarania pua dodu ngoyni sa takabulae kuokuo te Iaova te toypaka variere, Eroni me vakete oyra ngaji mara tu taru te vakomamanae Iaova te vilu me doka te saruku. Tamana goyti mara miatoyke te oyra sapoko aba ka la kuo me ne.

⁴ Oyra ngaji ka kuo te diedierena ngaji ka joyjuni ni qolu te vakomamanae Iaova mara katu taru.

⁵ Pale palava sa noyi sua no vamoja manokeri pobo bereti, vajaju keri kiloqaramu palava te kieke pubo.

⁶ Loypo te keri lalapo, unomo te kieke lalapo, te tevolo qolu te vakomamanae Iaova

⁷ Te susupae lalapo toyru ni la kavia pita nanabu noyi mara noyko te nako sa seva lalae pouboa bereti mara noyne toyro no me kieke keke ram kam joyjuni te kue Iaova te nako.

⁸ Bereti goyti mara toyro la te vakomamanae Iaova susupae sada, te oyra tava taboyna, jaju goyti sa taveni mara joyjuni oyra boysi ni Izireli sa seva kieke vato arapokitini me kuo taba sadasada

⁹ Bereti goyti ona Eroni no oyra sokutu arasumae soy, mara oyke te ngoyni taboyna, bati sa kieke takodekea kenakena sa taboyna sua te oyra boysi sisiama ka joyjuni te kue Iaova te nako.

Taka te Boysi sa doynguni Bangara

¹⁰ Kieke sada toytulieke doyru oyru quole ni Izireli no lieke ni Ijipi sa juolo kesini oyra boysi ni Izireli te ona toypaka, no sa la aratara koype kieke boysi ni Izireli.

¹¹ Toytu liekea quole ni Izireli sa doynguni Bangara; si oyra ka koype la oye te kue Mosese. Ritongoa sinae oye Selomiti, toytu quole Dibiri te sinaqi te Dani.

¹² Oyra ka vasoypani oyra palata mara miatoyke oye me doka te sada Iaova me vautinini oyra pita oyra mara joyjuni te kue oye.

¹³ Sinani Iaova savoy te kue Mosese:

¹⁴ Koype kesini oye te ngoyni kam kue. Tabae boysi ka ase oye sa aradango mara voyko la koyrisi doyra te boytu oye, no boysi taba mara vaneni oye katora.

¹⁵ Soynani oyra boysi ni Izireli: Ka oye sa doynguni ona Bangara, oye me pale takae ona jaju roka;

¹⁶ ka oye sa doynguni ritongoa Iaova mara voyevale moyna to. Boysi taba ni Izireli mara vaneni oye katora. Moyna oye sa boysi kuokapa ba boysi vatasuku ni Izreli, sada oye sa doynguni Bangara, oye mara voyevale moyna to.

¹⁷ Sada ka boysi sa voyevale kieke boysi, boysi ta mara voyevale moyna to.

¹⁸ Ka boysi sa voyevale pitapupura te ka boysi ne me soka, pitapupura tu to ka majala sokani tu te pitapupura ka voyevale.

¹⁹ Ka boysi sa vamaura udinia ne, pita oye sa joyjuni te kue boysi ta mara joyjuni te kue oye:

²⁰ sada ka oye sa kobele poydae kieke boysi mara kobele poydae, sada ka oye sa vakuba matae kieke boysi mara vakuba matae, sada ka oye sa voye mamere kiekere kieke boysi mara voye mamere kiekerea, pita oye sa joyjuni te kue ka boysi mara joyjuni te kue oye.

²¹ Ka oye sa voyevale pitapupura ne me soka velini, ba ka oye sa voyevale kieke boysi ne mara voyevale moyna to.

²² Ram boysi kuokapa no ram boysi vatasuku ni Izireli ram sa araviri to tamana mam koype. aro Iaova mina Bangara.

²³ Te rokusua Mosese sa soynani oyra boysi ni Izireli oyra tamana goyti, oyra ka koype kesini te paqarania ngoyni ka kue boysi sa doynguni Bangara no ka vane vale to oye. Oyra boysi ni Izireli ka joyjuni to pita Iaova sa voytuni te kue Mosese.