Leviticus 2 - Seqa Full Bible

Vavakatu vere

¹ Sada ka oye sa iro me te kue Iaova vavakatu vere, ona keke oye me joyjuni vapalava. Oye me jilingini la oela olivi no pita nanabu noyi

² no oye me iro la te kue oyra toytu lieke Eroni ka boysi sisiama. Boysi sisiama me gara kieke puda koyrisi palava no oela, no totongonia pita nanabu noyi, no me noyko tautae keke nanataru te sara barasi. Vavakatu ka joyjuni te nako, kakaurua sa vakima Iaova.

³ Sikia keke vere, ona Eroni no oyra toytu lieke; sa tataboyna sua, bati ka pale te keke ka joyjuni te nako ka kea te kue Iaova.

⁴ Sada re ko iro me vavakatu vere ko niqete te raka ne, bereti kasi lomirini isiti ba mo lomirini oela, bisikiti kasi lomirini isiti, mo tielini to oela.

⁵ Sada mo vavakatu vere ko vamoja te sireke tepatepa ne, re mo joyjunini palava soyru mo lomirini oela, ba kasi lomirini isiti.

⁶ Mo momere bereti no mo jilingini la oela; bereti goyti sa vavakatu vere.

⁷ Sada mo vavakatu vere ko vamoja te sireke tepatepa ne, mo joyjuni ni palava no oela olivi.

⁸ Iro me vavakatu vere ka joyjuni ni oyra pita goyti te kue Iaova; kea la te kue boysi sisiama, oye me iro la te sara barasi taboyna.

⁹ Oye me pale tautae keke nanataru te vavakatu vere no me noyko te sara barasi sa seva kieke keke ka joyjuni te nako, kakaurua sa vakima Iaova.

¹⁰ Sikia vavakatu vere, ona Eroni no oyra toytulieke; keke ta sa tataboyna sua, keke ka joyjuni te nako te kue Iaova.

¹¹ Susupae vavakatu vere ram kam iro me te kue Iaova, kasi lomirini isiti, bati ram kasi mina vavakatua ka isiti ba lukae qoyta te keke kam joyjuni te nako te kue Iaova.

¹² Ram kam majala iro me vavakatu vere te kue Iaova sa seva kieke kekea vere kinaka, ba kasi kea la te sara barasi taboyna sa seva keke nanabu noyi.

¹³ Tabae oyra mina keke poytu mina vala ni sua. Kasi toyrosia sua bati sua sa lalae vato arapokitini Bangara sa joyjuni te kue ram; suini sua tabae oyra mina keke.

¹⁴ Sada ram kam iro me vavakatu verea vere kinaka te kue Iaova, kea me vuiti varoqa kam moja no vanoqa te nako.

¹⁵ Valaeni oela no pita nanabu noyi; goyti sa vavakatu vere.

¹⁶ Boysi sisiama me noyko tautae keke nanatarua poytu sa tamoja no oela, mara noyko toringini taba pita nanabu noyi, sa seva keke ka joyjuni te nako te kue Iaova.